مزن وزیر شہباز شریف ءِ سروکی ءَ وفاقی کابینہ ءِ دیوان، وفاقی آئینی آمید گس (پروسیجر اینڈ پریکٹس) ایکٹ 2025 ءِ مسودہ ءِ منظوری، پاک فوج ءِ ایکٹ، پاک فضائیہ ءِ ایکٹ ءُ پاک بحریہ ءِ ایکٹ ءِ تہا ترمیم

اسلام آباد۔13نومبر  (اے پی پی): وفاقی کابینہ ءَ وفاقی آئینی آمید گس (پروسیجر اینڈ پریکٹس) ایکٹ 2025 ءِ مسودہ ءُ پاک فوج ءِ ایکٹ، پاک فضائیہ ءِ ایکٹ ءُ پاک بحریہ ءِ ایکٹ ءِ تہا ترمیم ءِ منظوری داتگ۔ اے ترمیم آنی مول ءُ مراد پاکستان ءِ سلاہ بندیں اُرد ءِ ھوالگ ءَ آئین ءُ آئین ءِ گوما ہمگام کنگ انت۔

مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ پنچ شمبے ءِ روچ ءَ پارلیمنٹ گس ءَ مزن وزیر محمد شہباز شریف ءِ سروکی ءَ وفاقی کابینہ ءِ دیوان برجم دارگ بوت، ایشی ءِ تہ ءَ ھوالگیں کانود آناں آئین ءِ گوما ھمگرنچ کنگ ءِ ھوالگ ءَ ھاسیں پیسلہ کنگ بوت۔ بیان ءِ رد ءَ وفاقی کابینہ ءَ پاک فوج ءِ ایکٹ، پاک فضائیہ ءِ ایکٹ ءُ پاک بحریہ ءِ ایکٹ ءِ تہا ترمیم ءِ منظوری داتگ۔ اے ترمیم آنی مول ءُ مراد پاکستان ءِ سلاہ بندیں اُرد ءِ ھوالگ ءَ کانود آناں آئین ءِ گوما ھمگرنچ کنگ اِنت۔ ایکٹ ءِ آرٹیکل 243 ءَ کتگیں ترمیم آنی بنیاد ءَ المی ئیں کانود جوڑ کنگ بوتگ کہ ایشی ءِ تہ ءَ چیف آف ڈیفنس فورسز ءِ گچین کنگ ھم ھوار اِنت۔ اے ترمیم آنی رد ءَ انوگیں چیئرمین ءِ ریٹائرمنٹ ءَ پد جوائنٹ چیفس آف اسٹاف کمیٹی ءِ چیئرمین ءِ عہدہ بند بیت۔ ھمے رنگ ءَ فیلڈ مارشل، مارشل آف ایئر فورس، ایڈمرل آف دی فلیٹ ءِ عہدہ ھم اے کانود آنی تہ ءَ ھوار کنگ بوتگ اَنت۔ اے اسکیم ءُ ایشی ءِ ہمگرنچیں کانود نوکیں ءُ جنگی لوٹاں چہ دیم ءَ دارگ ءَ پیش کنگ بوتگ انت۔ وفاقی کابینہ ءَ وفاقی آئینی آمید گس (طریقہ کار ءُ عمل) ایکٹ 2025 ءِ مسودہ ءِ ہم منظوری داتگ۔وفاقی کابینہ ءَ 7نومبر 2025ءَ برجم داشتگیں اقتصادی ہم آہنگی کمیٹی ءِ دیوان ءِ شق آنی ہم منظوری داتگ۔