سینیٹ ءَ 27می آئینی ترمیم ءِ تہ ءَ گیش ترمیم ءِ منظوری گوں دو تہائی اکثریت ءَ داتگ

اسلام آباد۔13نومبر  (اے پی پی): سینیٹ ءَ 27می آئینی ترمیم ءِ تہ ءَ گیشیں ترمیم ءِ منظوری گوں دو تہائی اکثریت ءَ داتگ کہ ایشی ءِ تہ ءَ 64 ووٹ ترمیم ءِ منوگر ءُ 4 ووٹ ءِ ھلاپ ءَ بوتگ۔ پنچ شمبے ءِ روچ ءَ سینیٹ ءِ دیوان سینیٹ ءِ چیئرمین یوسف رضا گیلانی ءِ سروکی ءَ برجم دارگ بوت، ایشی ءِ تہ ءَ وفاقی کانود ءِ وزیر اعظم نظیر تارڑ ءَ راجی اسمبلی ءِ منظوری ءِ رد ءَ 27می آئین ترمیم ءِ تہ ءَ گیش ترمیم پیش کنگ ءِ تحریک پیش کت۔ تحریک ءِ منظوری ءَ پد آئی ءَ ایوان ءَ ترمیم ءِ مسودہ پیش کت۔ سینیٹ ءِ چیئرمین یوسف رضا گیلانی ءَ ایوان ءَ چہ ترمیم آنی شق ءِ رد ءَ منظوری زرتگ۔ آئینی ترمیم ءِ شق ءِ رد ءَ منظوری ءَ پد سینیٹ ءَ 5 منٹ ءِ واستہ ڈویژن ءِ گوما ووٹنگ کنگ بوتگ ءُ گھنٹی ءِ توار کنگ بوتگ کہ ایشی ءِ تہا سینیٹ ہال ءِ دروازگ ءُ درآہگ ءِ راہ بند کنگ بوتگ انت۔ ووٹنگ ءِ وھد ءَ 64 ووٹ بل ءِ حق ءَ ءُ 4 ووٹ مخالفت ءَ بوتگ انت۔ ایشی ءَ پد چیئرمین سینیٹ ءَ آسر ءِ جار جتگ ءُ گوشت کہ 27می ترمیم ءِ نوکیں ترمیم آنی سر ءَ ووٹنگ ءِ وھد ءَ بل ءِ حق ءَ 64 ءُ ایشی ءِ ھلاپ ءَ 4 ووٹ داتگ۔ سینیٹ ءِ چیئرمین یوسف رضا گیلانی ءَ دو تہائی اکثریت ءَ گوں ترمیم آنی منظوری ءِ جار جتگ۔ ترمیم ءِ منظوری ءِ وھد ءَ اپوزیشن ءَ ایوان ءَ شور ءُ شور کنگ برجاہ داشتگ ات کہ ایشی ءِ سر ءَ چیئرمین سینیٹ ءَ آھاں نعرہ چست کنگ ءَ چہ منع کتگ ات۔ سینیٹ ءِ نیمگ ءَ منظور بوتگیں 27می آئینی ترمیم ءِ تہ ءَ شش گیشیں ترمیم منظور کنگ بوتگ اَنت۔ آرٹیکل 6 ءِ شق 2اے ءَ ترمیم کنگ بوتگ کہ ایشی ءِ تہ ءَ سپریم کورٹ ءُ ہائی کورٹ ءِ گوما وفاقی آئینی آمید گس ءَ را ھم ھوار کنگ بوتگ وھدے کہ آرٹیکل 10 ءَ ھوار دگہ پنچ آئینی ترمیم آنی تہ ءَ پاکستان ءِ چیف جسٹس ءِ عہدہ ھوار کنگ بوتگ۔اے ترمیم ءِ چیر دستی ءَ آئینی آمید گس ءِ چیف جسٹس ءُ پاکستان ءِ چیف جسٹس ءِ سینئر جسٹس بیت۔ ترمیم ءِ رد ءَ پاکستان ءِ چیف جسٹس ءَ را صدر، چیف الیکشن کمشنر ءُ اٹارنی جنرل ءَ را سوگند دیگ ءِ اجازت دیگ بیت۔ آئینی ترمیم ءِ رد ءَ وفاقی آئینی آمید گس جوڑ کنگ بیت وھدے کہ چیف جسٹس آئینی آمید گس ءَ را سئے سال ءِ مدت ءِ واستہ گچین کنت ءُ جج آنی ریٹائرمنٹ ءِ عمر 68 سال بیت۔