وفاقی داخلہ ءِ وزیر محسن نقوی ءَ قانون ءُ امن ءُ راجی سلامتی ءِ جیڈھ مئے اولی ترجی انت

اسلام آباد۔13نومبر  (اے پی پی): وفاقی تہی کارانی وزیر سینیٹر محسن نقوی ءَ گوشت کہ امن ءُ ایمنی ءِ جیڈھ مئے اولی ترجی اَنت۔ پنچ شمبے ءِ روچ ءَ ایوان بالا ءِ دیوان ءَ آئی ءَ گوشت کہ اسلام آباد تراک ءُ وانا ءَ انوگیں اُرش آنی تہ ءَ ھواریں کرد آنی پجار کنگ بوتگ ءُ ایشی ءِ سر ءَ پٹ ءُ پول برجاہ اِنت۔ تہی کارانی وزیر ءَ گوشت کہ پٹ ءُ پول ءِ عمل ءَ چہ اے گپ پدر بوتگ کہ اے وئیل آنی تہ ءَ ھواریں لھتیں مردم اوگانستان ءَ گوں سیادی دار اَنت۔ محسن نقوی ءَ گوشت کہ میاں اوستمانی تک ءَ ھم رابطہ جاری انت، گوستگیں روچ ءَ سری لنکا ءِ لیب کنوک آنی گوما گپ ءُ تران بوتگ، سری لنکا ءِ صدر ءَ وتی ٹیم ءِ گوما ھم رابطہ کتگ۔ آئی ءَ گوشت کہ زمبابوے ءِ کرکٹ ٹیم ھم گوستگیں شپ ءَ پاکستان ءَ سر بوتگ ءُ ھمگرنچیں سیکورٹی بندوبست گیش ترنگ کنگ بوتگ اَنت۔ فیلڈ مارشل ءَ اے ٹیم آنی سیکورٹی سروکاں گوں ھم رابطہ برجاہ داشتگ۔ وزیر داخلہ ءَ اے گپ ءِ نیمگ ءَ دلگوش گور کت کہ اوگانستان ءَ چہ آیوکیں عناصر برے برے ناجائزیں رنگ ءَ ادا کاینت ءُ اُرش آنی تہ ءَ ھوار بنت کہ ایشی ءَ چہ مئے دفاعی ءُ سیکورٹی چیلنج گیش بوھگ ءَ اِنت۔ آئی ءَ گوشت کہ اے جاور ھال ءِ رد ءَ حکومت ءِ اولی ترجی اد ءَ چہ ناجائزیں اوگان جاھمنند آنی درکنگ اِنت ءُ اے رد ءَ کانودی ءُ انتظامی گامگیج کنگ بوھگ ءَ اِنت۔ آئی ءَ گوشت کہ محکمہ داخلہ شفافیں پٹ ءُ پول ءَ را دل یکیمی کنت ءُ قربانی داتگیں مردم آنی کھول آناں ھمک رنگ ءِ کمک ءَ را دل یکیمی کنت۔ وزیر داخلہ ءَ امن ءُ ایمنی ءِ واستہ المی ئیں زانتکاری آنی کمک ءُ شیئر کنگ ءِ واستہ الس ءَ چہ ھم اپیل کتگ۔