پارلیمنٹ ءِ تہا ووٹ دیگ ہر باسک ءِ آئینی حق انت، ضمیر ءِ ردا فیصلہ جمہوریت ءِ روح انت، سینیٹر اسحاق ڈار

اسلام آباد۔13نومبر  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ پارلیمنٹ ءِ ھمک باسک ءَ را ووٹ دیگ ءِ آئینی ءُ جمہوری ھک است انت۔ اگاں باسک پارٹی ءِ پنت ءُ شون ءِ ھلاپ ءَ ووٹ بہ دنت ھم آئی ءِ ضمیر ءِ احترام کنگ بہ بیت، پرچا کہ سیاسی پیسلہانی تہا ذاتی ضمیر ءِ سرکوب کنگ جمہوریت ءِ ھلاپ اِنت۔ پنچ شمبے ءِ روچ ءَ ایوان بالا ءِ دیوان ءَ سینیٹر اسحاق ڈار ءَ گوشت کہ ووٹنگ ءِ عمل ءِ سرجمی ءَ پد ایوک ءَ قانونی رنگ ءَ کارآمد بیت ءُ ضمیر ءِ رد ءَ ووٹ دیوکیں باسک آناں باز براں اے پیسلہ ءِ سیاسی ھرچ ءُ درچ ءِ برداشت کنگی اِنت۔ آئی ءَ گوشت کہ پارٹی ءُ کارکن مقدسیں نام ءِ گوں کاگد آنی احترام ءَ بہ کن اَنت، ءُ جمہوری رنگ ءَ اختلافات ءَ را برداشت بہ کن اَنت۔ 27می آئین ءِ ترمیم ءِ منظوری ءِ موہ ءَ سینیٹر ڈار ءَ منت واری ءِ درشانی کنان ءَ گوشت کہ توامیں سینیٹر آنی منت ءَ گراں کہ آہاں اے ترمیم ءِ حق ءَ وتی حیال داتگ۔ اے ترمیم سرجمیں رھبند ءُ رھبندانی رد ءَ منظور کنگ بوتگ۔ من دعا کناں کہ اے درستیں کارروائی پہ ملک ءِ شری ءَ کارمرز کنگ بہ بیت۔ ووٹنگ ءِ سرجمیں عمل ءَ پد ایوک ءَ آسر ءِ سرپدی دیگ بیت وھدے کہ ھرچ باسک ءِ استعفیٰ ایوک ءَ نبشتھی رنگ ءَ کارآمد زانگ بیت۔ آئی ءَ اے گپ ءِ سر ءَ زور پر دات کہ زبانی یا اعلانیہ استعفیٰ ءِ آئینی بستار نیست۔ آئی ءَ گوشت کہ جمہوریت ءِ تہ ءَ اختلاف آنی گیواری بحث، گپ ءُ تران ءُ دلیل ءِ وسیلگ ءَ کنگ بہ بیت، اے ھما رھبند اِنت کہ راجی تپاکی ءُ پارلیمانی شرپ ءَ را گیش مھکم کنت۔