وفاقی وزیر برائے میری ٹائم جنید انور چوہدری ءَ نوکیں بندرگاہ آنی جوڑ کنگ ءِ تیاری ءِ واستہ کمیٹی جوڑ کتگ

اسلام آباد۔13نومبر  (اے پی پی): وفاقی وزیر برائے میری ٹائم محمد جنید انور چوہدری ءَ پاکستان ءِ دراجیں کوسٹ لائن ءِ سر ءَ نوکیں گہتریں بندرگاہ آنی جوڑ کنگ ءِ واستہ جوانیں جاھ آنی پجارینگ ءِ واستہ یک مزن تک ءِ کثیر ادارگ کمیٹی ءِ جوڑ کتگ۔ اے گامگیج ءِ مول ءُ مراد ملک ءِ میری ٹائم سیکٹر ءَ را آیوکیں کرن ءِ دیمروئی ءُ اقتصادی بدلی ءِ واستہ تیار کنگ اِنت۔ پنچ شمبے ءِ روچ ءَ وفاقی وزیر ءَ وتی بیان ءِ تہ ءَ گوشت کہ اے منصوبگ آئی ءِ 100سالی وژن 2047-2147 ءِ بھر اِنت کہ آئی ءَ اے ماہ ءَ کراچی ءَ راجی سمندری ھپتگ ءِ بنگیج ءِ مراگش ءِ ساھت ءَ جار جتگ۔ آئی ءَ گوشت کہ آیوکیں ھپتگ ءَ 12باسکی کمیٹی ئِ اولی دیوان ءَ ذاتی رنگ ءَ بھر زوری کناں۔ اے دیوان بندرگاہ 1، 2 ءُ 3 ءِ دراجیں مدتی منصوبگ بندی ءِ بنداتی نقطہ بیت۔کیمیٹی ہر دو ہفتگ ءَ پد دیوان کنت ءُ سئے ماہ ءِ تہا وزارت بحری امور ءَ را یک جامع فزیبلٹی رپورٹ پیش کنت، ایشی ءِ تہا تکنیکی جائزہ، ہائیڈروگرافک نقشہ، سیٹلائٹ پروپوزل ڈیٹا ءُ سرمایہ کاری ءِ تجویز ھوار بنت۔ پاکستان ءِ کش ءُ گور ءِ دمگ سندھ ءِ سر کریک ءَ بگر داں بلوچستان ءِ جیوانی ءَ 1024 کلومیٹر ءَ چہ گیش اِنت ءُ ایشی ءِ ھاسیں اقتصادی زون 240000 مربع کلومیٹر ءُ کانٹینینٹل شیلف 50000 مربع کلومیٹر اِنت۔ ملک ءِ معیشت ءِ 2030 ءَ چہ 2035 ءِ نیام ءَ یک کھرب ڈالر ءِ جی ڈی پی ءِ رسگ ءِ گمان اِنت کہ ایشی ءَ چہ سمندری تجارت ءُ ایشی ءَ گوں سیادی داروکیں صنعت آنی تہ ءَ مزنیں کساسے ءَ گیشی ءِ گمان اِنت۔ وفاقی وزیر ءَ گوشت کہ پورٹ قاسم اتھارٹی 65درسد، کراچی پورٹ ٹرسٹ 52درسد ءُ گوادر پورٹ 5 ءَ چہ 10درسد گنجائش ءِ سر ءَ کار کنگ ءَ اِنت۔ ماہرین ءِ رد ءَ اے سئیں بندرگاہ 2035ءَ چہ 2045ءِ نیام ءَ صنعتی کاروائی، دمگی ٹرانزٹ تجارت ءُ جہاز رانی ءِ حجم ءِ گیش بوھگ ءِ سبب ءَ وتی سرجمیں گنجائش ءَ سر بنت۔ آئی ءَ ھشدار دات کہ اوگانستان، میاں اوستمانی ملک، خلیج ءُ مشرقی افریقہ ءَ چہ ٹرانس شپمنٹ ءِ ممکنہ ٹریفک ءَ چہ استیں بندرگاہ آنی سر ءَ سک باز دباؤ بوت کنت۔ آئی ءَ گوشت کہ کوہ ءِ دمگ آنی تہ ءَ آبادی، سیل ءُ سواد ءُ نجی ہاؤسنگ اسکیم آنی تہ ءَ ترندیں گیشی ءَ چہ نوکیں میری ٹائم انفراسٹرکچر ءِ واستہ زمین ءِ دستیابی ءَ را محدود کنگ بوھگ ءَ اِنت۔ جنید چوہدری ءَ گوشت کہ 100سالی وژن ءِ چیر دستی ءَ ملک ءَ سئے چہ چار نوکیں ڈیپ سی پورٹ جوڑ کنگ بنت ایشی ءِ تہ ءَ کارگو ہینڈلنگ، گرین انرجی انٹیگریشن ءُ ڈیجیٹل پورٹ مینجمنٹ سسٹم ھوار بنت۔ اے منصوبگ آنی وسیلگ ءَ سی پیک، میری ٹائم اکانومی ءُ دمگی تجارت ءَ را مھکم کنگ بیت ءُ پاکستان ءَ را بحر ہند ءِ تہ ءَ یک ھاسیں میری ٹائم ہب ءِ رنگ ءَ پدر کنگ بیت۔ کمیٹی ءِ تہ ءَ پورٹ قاسم اتھارٹی، کراچی پورٹ ٹرسٹ، گوادر پورٹ اتھارٹی، وزارت ءِ دریائی کار، ھاسیں سرمایہ کاری آسراتی کونسل، سروے جنرل آف پاکستان، ہائیڈروگرافر ءُ سندھ ءُ بلوچستان حکومت ءِ نمائندہ ھوار انت۔ کمیٹی ءِ دائرہ کار ایش انت کہ آ درستیں سیٹلائٹ ءِ عکس، سروے رپورٹ، ماحولیاتی ءُ ہائیڈروگرافک ڈیٹا ءِ چار ءُ تپاسی ءَ چہ کوسٹل بیلٹ ءِ سرا بالقوه بندر، بندر شہر، شپ یارڈ ءُ توانائی ءِ مراکز ءِ ھاتر ءَ موزوں جاہ ءِ نشاندہی بہ کنت۔ ایشی ءَ ابید اے زمین ءِ دستیابی، چاگردی حساسیت، سیکورٹی ءِ تک ءُ پہنات، تجارتی راہ ءُ رابطہ ءِ نیٹ ورک ءِ نزیکی ءِ وڑیں چیزاں ھم ھیال ءَ دار ایت۔ وفاقی وزیر برائے میری ٹائم امور ءَ گوشت کہ منصوبگ آنی سر ءَ جوانیں پیشرفت ءَ را دل یکیمی کنگ ءِ واستہ صوبائی حکومت ءُ وفاقی ادارگ آنی نیام ءَ نزیکیں رابطہ کاری ءَ را اولیت دیگ بیت۔ محمد جنید انور چوہدری ءَ گوشت کہ آیوکیں کرن ءَ بحر آنی کرن بیت۔ پاکستان ءَ مرچی بندرگاہ، تجارتی راہ ءُ دریائی صنعت آنی واستہ منصوبہ بندی کنگی اِنت کہ آ باندا ءِ آیوکیں وھد ءِ بُن ھشت ءَ ایر کن اَنت۔