صدر آصف علی زرداری ءَ گوئٹے مالا ءِ پیسریگیں صدر ءُ پارلیمنٹ ءِ اسپیکر جیمی مورالیز ءَ گوں گند ءُ نند

اسلام آباد۔ 12نومبر (اے پی پی): صدر آصف علی زرداری ءَ گوئٹے مالا ءِ پیسریگیں صدر ءُ پارلیمنٹ ءِ اسپیکر جمی مورالیز ءَ گوں گند ءُ نند کتگ ءُ دو نیمگی سیادی، بیپاری، سرمایہ کاری ءُ بین الاقوامی پارلیمانی کمک ءِ دیمروئی ءِ بابت ءَ گپ ءُ تران کتگ۔ چار شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر آصف علی زرداری ءَ پاکستان ءُ گواتیمالا ءِ نیام ءَ تجارتی، سرمایہ کاری ءُُ مردم آنی نیام ءَ مردم آنی سیادی ءَ را گیش مھکم کنگ ءِ سر ءَ زور پر دات۔ آئی ءَ گوشت کہ پاکستان ءُ گوئٹے مالا ءَ را دیہی دیمروئی، چاگردی چیلنج ءُ اقتصادی جدید کنگ ءِ وڑیں یکجائی جیڈھ آنی دیم ءَ انت، ایشانی گیواری ءِ واستہ وت مہ وتی کمک ءِ ضلورت انت۔ آئی ءَ گوشت کہ دوئیں ملک آنی تہ ءَ کشت ءُ کشاری، جوانیں توان ءُ طبی زانت آنی پڑ ءَ عملی کمک ءِ واستہ مزنیں گنجائش است انت۔ آئی ءَ جمی مورالس ءَ را ھاسیں سرمایہ کاری ءِ آسراتی کونسل ءِ فریم ورک ءِ بابت ءَ سرپدی دات ءُ گوئٹے مالا ءَ را ایشی ءِ چیر دستی ءَ یکجائی سرمایہ کاری ءُ منصوبگ آنی تہ ءَ بھر زوری ءِ دعوت دات۔ صدر ءِ مملکت ءَ اقوام متحدہ ءِ تہ ءَ پاکستان ءِ کمک ءِ سر ءَ گوئٹے مالا ءِ شگر ءُ منت گپت ءُ گوشت کہ دوئیں ملک آں کثیر نیمگی فورم آنی تہ ءَ دیم ءَ کمک کنگ لوٹ ایت۔ آئی ءَ اے گپ ءِ سر ءَ ھم زور پر دات کہ پاکستان ءُ گوئٹے مالا ءِ نیام ءَ پارلیمانی ءُ ادارکی سیادی ءَ را گیش مھکم کنگ بہ بیت ءُ جغرافیائی دوری ءَ را دوستی ءِ راہ ءَ اڑاند جوڑ کنگ ءِ موہ دیگ مہ بیت۔ اے موہ ءِ سر ءَ جمی مورالس ءَ صدر آصف علی زرداری ءِ شگر ءُ منت گپت کہ آئی ءَ پاکستان ءِ میزبانی کتگ ءُ آئی ءَ را انٹر پارلیمانی اسپیکر کانفرنس ءَ بہر زورگ ءِ دعوت داتگ۔ آئی ءَ گوشت کہ اے رنگیں سیادی ءَ چہ دوئیں ملک آنی نیام ءَ کمک ءُ شریکداری ءِ نوکیں موہ پیداک بنت۔ جمی مورالیز ءَ گوشت کہ گوئٹے مالا میاں اوستمانی امریکہ ءِ مزنیں ملک اِنت، ما پاکستان ءِ دیمروئی ءِ تجربگ آنی چہ دربرگ ءِ واھشت مند ایں ۔ آئی ءَ گوشت کہ پاکستان ءُُ گواتیمالا ءِ نیام ءَ بیپاری ءُُ کاروبار ءِ نوکیں دروازگ آنی پچ کنگ ءِ جزم ءِ گوما ادا اتکگ آں ۔ گند ءُ نند ءَ چیئرمین سینیٹ سید یوسف رضا گیلانی، سینیٹر شیری رحمان ءُ سینیٹر سلیم مانڈوی ھم ساڑی بوتگ انت۔