پاکستان ہچ وڑیں ناشرکاری ءَ سگ ءُ اوپار نہ کنت، بیرسٹر دانیال چوہدری

راولپنڈی۔12نومبر  (اے پی پی): وفاقی پارلیمانی سیکرٹری برائے انفارمیشن اینڈ براڈکاسٹنگ ءِ بیرسٹر دانیال چوہدری ءَ گشتگ کہ پاکستان ہچ وڑیں ناشرکاری ءَ سگ ءُ اوپار نہ کنت ءُ ناشرکاری ءِ کارانی سرا سرجمیں ءُ موثر پسو دیگ بیت۔ ھما عناصر کہ درائیں کمک یا پراکسی ءِ وسیلگ ءَ پاکستان ءَ بے رھبند کنگ ءِ جھد ءَ اَنت آھاں ھما ھساب ءَ پسو دیگ بیت۔ اے ھیالانی درشانی آئی ءَ گوستگیں روچ ءَ لیاقت باغ اسپورٹس کمپلیکس ءَ نوکیں سوئمنگ پول ءُ لیب کنوک آنی واستہ ہاسٹل ءِ بنگیج ءِ مراگش ءَ کت۔ صوبائی وزیر اسپورٹس ءُ دود ءُ ربیدگ ملک فیصل ایوب کھوکھر، اسمبلی ءِ باسک، ڈپٹی کمشنر، اسپورٹس شخصیت، لیب کنوک ءُ اسپورٹس ڈیپارٹمنٹ ءِ کارندہ آں افتتاحی مراگش ءَ بہر زرتگ۔ بیرسٹر دانیال چوہدری ءَ گوشت کہ حکومت پنجاب ءِ سر وزیر مریم نواز ءِ پنت ءُ شون ءِ رد ءَ ورنا آنی واستہ جان سلامتی ءِ واستہ چست ءُ ایر آنی واستہ موہ آناں گیش کنگ ءَ انت۔ اے درگت ءَ نوکیں آسراتی آں چہ لیس سوئمنگ پول ءُ ہاسٹل ءِ جوڑ کنگ راولپنڈی ءِ لیب کنوک آنی واستہ ارزشتی ایں اثاثہ ءِ ثابت بیت۔ اے منصوبگ ءِ کلیں ھرچ ءُ درچ 600 ملین کلدار ءِ نزیک ءَ انت۔ آئی ءَ گوشت کہ اولی رند ءَ اے کمپلیکس ءَ کھڈکار آنی جاہ ءِ واستہ ھاسٹل جوڑ کنگ بوتگ ایشی ءَ چہ راجی ءُ میاں اوستمانی ٹیم آنی میزبانی ءِ موہ رس ایت ءُ مراگش آنی وھد ءَ ھرچ ءُ درچ ھم کم بیت۔ سر وزیر پنجاب ءِ ھاسیں پنت ءُ شون ءِ سرا زالبولانی واستہ جتاہیں جم جوڑ کنگ بوتگ ۔ ھمے رنگ ءَ گوستگیں وھداں مئے سرکار ءَ زالبولانی ھاکی ءِ دیمروئی ءِ ھاترا زالبولانی ھاکی ءِ میدان ءَ نوکیں اسٹرو ٹرف ایر کتگ ات کہ زالبول آسانی ءَ کھیبانی تہ ءَ بھر زورگ ءَ بہ بنت۔ آئی ءَ گوشت کہ راولپنڈی ءِ دیمروئی ءِ واستہ مسلم لیگ مدام دیم ءَ بوتگ۔ شہر ءِ بنیاتی ڈھانچہ ءُ ٹرانسپورٹ ءِ منصوبہ ، خاص کر میٹرو بس سروس ءَ شہریاں مزنیں آسراتی داتگ۔ دانیال چوہدری ءَ منشیات فروش ءُ زمین چیر کنوکیں مافیا ءِ حلاف ءَ چست کتگیں گامگیج آناں ساڑات ءُ گوشت کہ اے عناصر ءِ حلاف ءَ کارروائی برجاہ بیت۔ وھدے مسلم لیگ ن ءَ سرکار گپتگ پاکستان سکیں گرانیں جاوراں گوں دوچار بوتگ، ملک ڈیفالٹ ءِ ھترہ ءَ گوں دوچار بوتگ ءُ گلوبل لیول ءَ ایزولیشن بوتگ، ھچ ملک مئے گوما دست ءُ گپ کنگ ءَ تیار نہ بوتگ، بلے مرچی جاور بدل بوتگ اَنت، پاکستان ءَ میاں اوستمانی براتی ءَ وتی نام پدا پدا زرتگ۔ آئی ءَ اے سوبمندی ءِ سوب مزن وزیر شہباز شریف ءُ فیلڈ مارشل سید عاصم منیر ءِ بے مٹیں کار ءُ جزبگ ءَ لیک اِت ءُ گوشت کہ پاکستان یکجائی کوشستاں گوں یک رندے پدا دیمروئی ءُ برجائی ءِ کشک ءَ رھادگ بوتگ۔ گوستگیں ناشرکاری وئیل ءِ سر ءَ اپسوز ءِ درشان کنان ءَ آئی ءَ گوشت کہ پاکستانی راج یک مُشت اِنت ءُ گوست ءِ وڑ ءَ دژمن ءِ ارادہ آناں ناکام کنگ ءَ دیم ءَ روان کنت۔ آئی ءَ گوشت کہ مئے قوت ءُ سیکورٹی ادارگ آنی قربانی بے سوب نہ رو اَنت۔ آئی ءَ گوشت کہ سرحدی دمگ یا شھر آنی تہ ءَ ناشرکار آزات یلہ کنگ نہ بنت، ما ھندوستان ءَ را پیسر ءَ ھم ھپت نل ءَ شکست داتگ ءُ ھر جاگہ ​​ءَ کہ اے پندل سازگ بوھگ ءَ انت آھانی سر ءَ مھکمیں پسو دیئگ بیت۔ آئی ءَ گوشت کہ میاں اوستمانی براتی ءَ گوستگیں ناشرکاری واکیہ آناں ھم مذمت کتگ ءُ بازیں ملک آنی سفارتی نمائندگ آں گوں پاکستان ءَ یکوئی درشان کتگ۔ اے موہ ءِ سرءَ صوبائی وزیر کھیڈ ءُ لیب ءُ دود ءُ ربیدگ ملک فیصل ایوب خوکھر ءَ گوشت کہ پنجاب حکومت ءِ اولی ترجی ورنا آنی وشھالی ءُ لیب ءُ گوازی ءِ دیمروئی کنگ اِنت۔ آئی ءَ گوشت کہ حکومت وتی اولویت آنی سر ءَ سک سنجیدہ اِنت ءُ ایشی ءِ عملی ثبوت ایش اِنت کہ ن لیگ ءِ استیں حکومت ءَ مخالف دور آنی منصوبگ آناں سرجم کنان ءَ السی نپ ءَ را اولیت داتگ۔ گوست ءَ ہر وھد ءَ کہ سرکار بدل بوت گڈا گوستگیں دور آنی پراجیکٹ بند کنگ بوت اَنت ایشی ءَ چہ ایوک ءَ مہلوک ءَ را تاوان رستگ، البت مسلم لیگ ن ءِ روایت ہمیش اِنت کہ آئی ءَ مدام سیاسی وابستگی ءَ چہ بُرز سرکاری پراجیکٹ سرجم کتگ اَنت۔ صوبائی وزیر ءَ گوشت کہ شہباز شریف ءِ سر وزیر ءِ دور ءَ سرجمیں پنجاب ءَ جدید اسپورٹس کمپلیکس جوڑ کنگ بوتگ بلے گوستگیں حکومت ءِ دور ءَ اے منصوبگ کھنڈرات ءِ رنگ ءَ گندگ ءَ لگ اتگ انت۔ آئی ءَ گوشت کہ گوستگیں سال ءَ 98 اسپورٹس کمپلیکس آنی بُن ھشت ایر کنگ بوتگ، اے سال ءَ سرجم کنگ بیت۔ صوبائی وزیر ءَ گوشت کہ پیسریگیں تحریک انصاف ءِ سرکار ءَ ورنا آنی واستہ ھچ جوانیں کار نہ کتگ بلکیں آھاں زھرشانی، آتش زنی ءُ آشوب ءِ واستہ دلبڈی داتگ۔ پنجاب ءِ سر وزیر مریم نواز شریف ءِ اولیت آنی تہ ءَ زالبول آنی وشھالی، وانگ ءُ زانگ ءِ دیمروئی ءُ لیب ءُ گوازی ءِ موہ آنی پجارینگ ھوار اِنت۔ آئی ءَ گوشت کہ پاکستان ءِ مستریں اسکواش کمپلیکس 1991ءَ چہ زیر التوا بوتگ آیوکیں ماہ ءَ لاہور ءَ بنگیج کنگ بیت۔ اے منصوبگ بنجاھی وزیر مریم نواز ءِ سروکی ءَ ایوک ءَ یک ءُ نیم سال ءِ تہ ءَ سرجم بوتگ کہ اے پنجاب حکومت ءِ وژن ءُ کارکردگی ءِ پدریں ثبوت اِنت۔ آئی ءَ جار جتگ کہ راولپنڈی ءِ ورنا آنی واستہ یک نوکیں کثیر مقصدی گراؤنڈ ءِ جوڑ کنگ بیت ایشی ءِ تہ ءَ جتا جتائیں لیب ءُ گوازی ءِ آسراتی پجاری کنگ بیت۔ صوبائی وزیر ءَ گوشت کہ مرچی پنجاب ءِ ورنا آناں لیپ ٹاپ، اسکالرشپ ءُ جوانیں وانگ ءُ زانگ ءُ تکنیکی موہ پجاری کنگ بوھگ ءَ انت ءُ درستاں چہ گیش زالبول سی سی ڈی ءِ برکت ءَ گیش ایمنی ءِ احساس ءَ کنگ ءَ انت۔ آئی ءَ گران بھائیں جانانی بیرانی ءِ سر ءَ سک باز رنج ءُ گم ءِ درشانی کت وھدیکہ گوستگیں ناشرکاری واکیہ آنی سر ءَ اپسوز ءِ درشانی کت ءُ گوشت کہ راج یک مُشت اِنت ءُ دژمن ءَ را لائکیں پسو دیئگ بیت۔