بارباڈوس ءُ روس ءِ پارلیمانی ڈل آں سینیٹ ءِ چیئرمین سید یوسف رضا گیلانی ءَ گوں گند ءُ نند کت، وت مہ وتی مفاد ءُ دو نیمگی سیادی آنی دیمروئی ءِ جیڈھ آنی سر ءَ گپ ءُ تران

اسلام آباد۔12نومبر  (اے پی پی): بارباڈوس ءُ روس ءِ پارلیمانی ڈل آں چیئرمین سینیٹ ءُ بانی چیئرمین انٹر پارلیمانی اسپیکر کانفرنس سید یوسف رضا گیلانی ءِ گوما جتا جتائیں گند ءُ نند کتگ، ایشی ءِ تہ ءَ وت مہ وتی مفاد ءِ جیڈھ، دو نیمگی سیادی ءُ پارلیمانی کمک ءِ دیمروئی ءِ امکانات ءِ سر ءَ جھان ءِ تک ءَ گپ ءُ تران کنگ بوتگ۔ سینیٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ چیئرمین سید یوسف رضا گیلانی ءَ ڈل آں گوں گپ ءُُ تران ءِ ساھت ءَ اے گپ ءِ سر ءَ زور پر دات کہ جھان ءِ امن ایمنی ءُُ پائیداریں دیمروئی ءِ واستہ پارلیمنٹ ءَ را یکجائی کوشست کنگ لوٹ ایت۔ آئی ءَ گوشت کہ بین پارلیمانی کمک ءَ چہ نا ایوک ءَ راج آنی نیام ءَ وت مہ وتی یکوئی ءِ دیمروئی بیت بلکینگ ءَ جھان ءِ جیڈھ آنی گیواری ءَ ھم ھاسیں کرد پیلو کنت۔ روس ءُ بارباڈوس ءِ پارلیمانی سروکاں بین پارلیمانی اسپیکر کانفرنس ءِ سوبمندیں برجم دارگ ءِ سر ءَ چیئرمین سینیٹ ءَ را مبارکی دات ءُ اے راجدپتری مراگش ءِ واستہ جوانیں بندوبست ءِ واستہ سینیٹ سیکرٹریٹ ءِ کوشست آناں ساڑات۔ ڈل آں پاکستان ءِ گوما پارلیمانی کمک ءُُ ادارگی سیادی ءَ را گیش مھکم کنگ ءِ جزم ءِ درشان کت۔ چیئرمین سینیٹ ءَ دوئیں ملک آنی گوما پارلیمانی سیادی ءَ را گیش وسعت دیگ ءِ وتی عزم ءِ ھم پدر کتگ۔