نائب وزیراعظم و وزیرخارجہ سینیٹر محمد اسحاق ڈار نا بین الپارلیمانی اسپیکرز کانفرنس آن تران

اسلام آباد۔ 12 نومبر (اے پی پی) نائب وزیراعظم و وزیرخارجہ سینیٹر محمداسحاق ڈار امن، سوگوی و شونداری ءِ پک کننگ کن مذاکرات، سفارتکاری و کثیر الجہتی نا پاکستان نا بدل مفروک عزم انا درشانی ءِ کرسا پارینے کہ پاکستان نا خارجہ پالیسی اقوام متحدہ نا چارٹرنا اصول یعنی وتواجہ مساوات، جھیڑہ غاتا پرامن ایسری، نیام تمپنگ و قوم تا نیام اٹ دوستانہ تعلقداری آ تالان ءِ۔ داخیال آتا درشانی ءِ او چارشنبے نادے آ داڑے بین الپارلیمانی اسپیکرز کانفرنس آن تران کرساکرے۔ اوعلاقائی کمکاری، جھیڑہ غاتا توننگ و بریبرشونداری کن پاکستان نا پدریسہ وکالت نا ذکر ءِ کرسا پارے کہ سوگوی وشونداری کن گپ وتران مدامی ننا اولیتی ذریعہ مسنے۔ اومچ آ دنیا غان بروک پارلیمنٹ نا باسک، مندوبین و بشخ ہلوک آتیان تران کرسا پارے کہ اوفتا ساڑی گری دا اسیجائی یقین نا عکاسی ءِ کیک کہ قوم تا نیام اٹ کمکاری امن و شونداری نا غٹ آن یقینی کسر ءِ۔ اوپارے کہ چیئرمین سینیٹ و بین الپارلیمانی اسپیکرز کانفرنس نا بانی چیئرمین سینیٹر سید یوسف رضاگیلانی نا وژن نا رداٹ سینیٹ آف پاکستان نا رداٹ اڈ ہلوک کانفرنس کثیر الجہتی نا کمک اٹ امن، سلامتی و شونداری ءِ مون آ دننگ کن پاکستان نا پدریسہ کوشست آتیٹی اسہ پین مزل نانشان اسے۔ نائب وزیراعظم پارے کہ جہانی کہول آ پاکستان نا سفر نا ستا مدام ریزیلیئنس ، مکالمہ و شریداری اٹ مریک، بین الپارلیمانی اسپیکرز کانفرنس دا اصول آتے پبی نتیجہ غاتیٹی بدل کننگ کن اسہ یکتا پلیٹ فارم اس فراوان کرینے، ہرا علاقائی سوگوی ءِ سوگو کیک۔ اوپارے کہ اینو سفارتکاری وزارت و روایتی مشن تیان مون آہنانے، السی بیداری و پارلیمانی مصروفیت آن سوگوی ملک۔ نائب وزیراعظم پارے کہ پارلیمانی سفارتکاری السی نمائندہ غاتا نقطہ نظر ءِ جہانی گپ وتران اٹی اتسا روایتی سفارتکاری نا تکمیل ءِ کیک۔ اوپارے کہ داوڑنا تعاملات جہانی کمکاری ءِ سوگوی ایترہ و داہیت ءِ پک کیرہ کہ سفارت کاری مچ آ دنیا نا شاری تا است خواہی و فائدہ غاتا عکاسی ءِ کیک۔ نائب وزیراعظم پارے کہ علاقائی رابطہ ، واپاری آسودہی و زرکاری نا شریداری نا کمک اٹ زرگزرانک اسیجائی شونہالی دوئی کننگ کیرہ۔ برجا جہانی چیلنج آتا ذکر ءِ کرسا اوپارےکہ دنیا بدلی نا ہندن ءُ دور اسے نا مشاہدہ ءِ کننگ ءِ ہراٹی کثیر الجہتی ادارہ غاتیا پت اٹی کمتی، ودوک آ جغرافیائی سیاسی دشمن، موسمیاتی تنکی، دہشت گردی و ودوک آ بے بریبری نا پیدواری ءِ کننگانے، داحالیت آتیٹی داوڑنا فورم بھلو اہمیت اس تخرہ۔ نائب وزیراعظم پارے کہ کثیر جہتی ءِ نئے بیرہ رکھ کننگے بلکن آجو، شمولیت و السی نمائندہ غاتا فعال بشخ ہلنگ نا کمک اٹ اودے بایدے زندہ کننگے۔ اوپارے کہ داسال انا تھیم ’’امن، سلامتی و شونداری‘‘ اسہ سادہ ولے واکدار سچائی آ زور شاغک کہ امن شونداری نا قابل کیک، شونداری امن ءِ برقرار و سلامتی شونداری ءِ سوگو کیک۔ اوداہیت آ زور شاغا کہ ادارہ غاک جوابدہ و جامع بایدے مریر تانکہ امن و شونداری نا بھرمک غٹ مخلوق اسکان سرمریر۔