ڈبلیو ایچ او نا مشن نا بنجائی وزیر جان جوڑی مصطفیٰ کمال تون اوڑدہی

اسلام آباد۔ 12 نومبر (اے پی پی) جہانی ادارہ جان جوڑی (ڈبلیو ایچ او) نا مشن بنجائی وزیر جان جوڑی مصطفیٰ کمال تون اوڑدہی کرے، ہراٹی پاکستان کن ڈبلیو ایچ او لیول۔ تھری نا دوئی کننگ نا گام گیج آتا سرجمی اٹ جاچ ءِ ہلنگا۔ دیوان اٹی ڈبلیو ایچ او نا کنسلٹنٹ ، اسپیکر سیکرٹری جان جوڑی و چیف ایگزیکٹیو آفیسر ڈریپ ہم شریک ئس۔ داوخت آ ڈبلیو ایچ او نا کنڈآن میڈیکل پروڈکٹ آتا آب اٹ گچینی و اوفتے جہانی آب انا رداٹ جوڑ کننگ کن چندی سلاہ و سوج پیش کننگا۔ بنجائی وزیر جان جوڑی مصطفیٰ کمال پارے کہ ڈبلیو ایچ او نا چاہندار آتا سلاہ و سوج آتیا پورو عملدرآمد کننگک تانکہ پاکستان جہانی کہول آ جان جوڑی نا آب ءِ پین گچین کننگ کے۔ اومستی پارے کہ دا سلاہ و سوج آتیا پیش رفت کن زوت غٹ صوبہ غاتا اسہ سلابتی دیوان اس بٹنگک۔ وزیرجان جوڑی پارے ک ڈبلیو ایچ او لیول تھری نا دوئی کننگ آن پد پاکستان تینا دوائی  تے 68 ملک آتیٹی برآمد کننگ نا قابل مریک ، ہرا ملکی زرگزران کن اسہ بھلو مزل نا نشان اس مریک۔ مصطفیٰ کمال پارے کہ حکومت دوائی تا برآمد آتیٹی ودکی و جان جوڑی نا بشخ اٹی گچینی کن سنبرینگوک ءِ۔ اویقین ظاہر کرے کہ ڈبلیو ایچ او پاکستان زوت آن زوت لیول تھری نا ہدف ءِ دوئی کیک۔