وزیراعظم محمد شہباز شریف نا کماشی ٹی پوسکن آ صنعتی پالیسی پاکستان نا زرگزرانی وتواجہی نا ضمانت مریک، خصوصی کمکار صنعت وپیداوار ہارون اخترخان

اسلام آباد۔ 12 نومبر (اے پی پی) وزیراعظم نا خصوصی کمکار صنعت وپیدوار ہارون اخترخان پارینے کہ وزیراعظم محمد شہباز شریف نا کماشی ٹی پوسکن آ صنعتی پالیسی پاکستان نا زرگزرانی وتواجہی نا ضمانت مریک۔ چارشنبے نادے آ پاکستان پراسپیریٹی فورم اٹی تینا تران اٹی اوپارے کہ پاکستان اینو تینا زرگزرانی تاریخ نا اسہ اہم ءُ موڑاسے آ سلوک ءِ، نن وختی گام گیج آخا بلکن دیرپازرگزرانی اصلاحات آ یخین تخنہ۔ ہارون اخترخان پارے کہ اقتصادی سوگوی اتفاق اسے نا نتیجہ اف بلکن مستقل مزاجی ، قابلیت و پیدوار وژن آن دوئی مریک۔ اوپارے کہ پوسکن آ قومی ٹیرف پالیسی تحفظ پسندی اٹ مقابلہ جاتی زرگزران نا کنڈآ اسہ بھلو گام اسے، ہرانا رداٹ بروک آ پنچ سال اٹی ڈیوٹی اسلاب ءِ چار کہول اسکان محدود کننگک۔ اوپارے کہ ٹیرف پالیسی نا نفاذ آن صنعت آتے 175 ارب روپئی نا خڑچ  اٹی بچت گمانی ءِ، وخت اس کہ ریگولیٹری گلوٹین اصلاحات نا نتیجہ ٹی کاروباری خڑچ اٹی سالانہ 250 ارب روپئی نا کمتی بسنے۔ مچ آملک اٹی 465 ریگولیٹری اصلاحات نا کمک اٹ لائسنسنگ و منظوری نا عمل ءِ آسان کننگانے۔ ہارون اخترخان مستی پارے کہ ’’آسان کاروبار ایکت 2025‘‘ دا اصلاحات نا کانودی تمبہ جوڑ مریک ، وخت اس کہ قومی صنعتی پالیسی 2025 پاکستان نا زرگزرانی بحالی نا خرُن آ خاکہ ءِ۔ اوپارے کہ وزیراعظم شہباز شریف نا کماشی ٹی پوسکن آصنعتی پالیسی پاکستان نا زرگزرانی وتواجہی نا ضمانت مریک۔ اوپارے کہ داپالیسی نا رداٹ زرکارآتاپت بحال مریک، پیداواری لائخی ٹی ودکی مریک و ناجوڑ صنعتی یونٹ آتا بحالی کن پوسکن ءُ فریم ورک اس ٹہیفنگانے۔