پاکستان کینیڈا تون تعلقداری تے پین سوگو کننگ نا خواہندار ءِ، وزیراعظم شہباز شریف نا کینیڈین ہائی کمشنر طارق علی خان تون گپ وتران

اسلام آباد۔ 12 نومبر (اے پی پی) وزیراعظم محمد شہباز شریف پارینے کہ پاکستان کینیڈا تون تعلقداری تے پین سوگو کننگ نا خواہندار ءِ، پاکستان اٹ کانڑ کنی و معدنیات نا بشخ اٹی زرکاری نا گیشتر وارخواہی ساڑی ءِ، بیرک  گولڈ پاکستان نا کانڑ کنی نا بشخ اٹی شونداری نا کسر ءِ آوار کننگ تون اوار اوار پاکستان وکینیڈا نا نیام اٹ اقتصادی کمکاری نا سرسہبی نا سند پک مریک۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او کینیڈا نا پاکستان اٹی تعینات مروک آ ہائی کمشنر طارق علی خان تون گپ وتران کرساکرے ہرا وزیراعظم تون داڑے اوڑدہی کرے۔ داوخت آ خصوصی کمکار طارق فاطمی و سیکرٹری خارجہ ئسک ہم ساڑی ئسر۔ وزیراعظم کینیڈین ہائی کمشنر ءِ تقرری آ مبارکبادی تس و داپت انا درشانی ءِ کرے کہ اونا تعیناتی ٹی پاکستان وکینیڈا نا نیام اٹ متکن و دوستانہ تعلقداری پین سوگو مریک۔ اوکینیڈین سرکڑدہ غاتیکن خیرخواہی نا کلہو ہم تس۔ وزیراعظم پارے کہ پاکستان کینیڈا تون تعلقداری تا پین سوگوی نا خواہندار ءِ۔ وزیراعظم پارے کہ پاکستان اٹ کانڑ کنی و معدنیات نا بشخ اٹی زرکاری نا گیشتر وارخواہی ساڑی ءِ۔ ریکوڈک ڈٹ انا ذکر ءِ کرسا وزیراعظم پارے کہ بیرک گولڈ پاکستان نا کانڑکنی نا بشخ اٹی شونداری نا کسر ءِ آوار کننگ تون اواراوار پاکستان و کینیڈا اقتصادی کمکاری نا سرسہبی نا سند مریک۔ کینیڈین ہائی کمشنر وزیراعظم نا منت واری ءِ ہرفے و پاکستان و کینیڈا نا ہڑتوم آ کنڈآتا تعلقداری، خاص کر کشت وکشار، توانائی، واپار ، زرکاری، ٹیکنالوجی ، تعلیم و السی ہن و برءِ پین مون آ دننگ کن کاریم کننگ نا عزم انا درشانی ءِ کرے۔ وزیراعظم کینیڈا ٹی رہینگوک آ پاکستانی تا کینیڈا نا شونداری و شونہالی ٹی کڑد انا ستاءِ کرے و ہڑتوم آ ملک آتا نیام اٹ تعلقداری نا سوگوی کن پول انا کڑد ءِ ادا کیرہ۔