اسپیکر قومی اسمبلی سردار ایاز صادق تون ایران نا ڈپٹی اسپیکر علی نیک زاد نا ڈل اتون اوار اوڑدہی

اسلام آباد۔ 12 نومبر (اے پی پی) اسپیکر قومی اسمبلی سردار ایاز صادق تون ایران نا ڈپٹی اسپیکر علی نیک زاد پارلیمانی ڈل اتون اوار اوڑدہی کرے ہراٹی پاک ایران تعلقداری، پارلیمانی کمکاری ، اقتصادی شریداری و چندی بشخ آتیٹی ہڑتوم  آ کنڈآتا است خواہی نا امور نا بارواٹی سرجمی اٹ گپ وتران کننگا۔ قومی اسمبلی سیکرٹریٹ نا رداٹ اسپیکر سردار ایاز صادق علاقائی سوگوی و شونداری کن کمکاری ءِ ودفنگ نا گرج آ زور شاغسا پارے کہ پاکستان وایران برادرانہ ہمسایہ ملک ءُ ہرا اسیجائی تاریخ، مذہب و دودوربیدہ نا سوگو رشتہ غاتون گنڈوک ءُ۔ اسپیکر ایرانی ہم منصب ڈاکٹر محمد باقر قالیباف نا ساڑی آ دورہ ءِ ہڑتوم آ کنڈآتا تعلقداری سوگو کننگ و پارلیمانی رابطہ غاتے مون آ دننگ اٹ اہم مزل نا نشان گوندا۔ ہڑتوم آ راہشونک پارلیمانی کہول آکمکاری ءِ ودفنگ، السی رابطہ غاتا مون آ دننگ، مسلم ملک آتا نیام اٹ سیوت و یکجہتی نا گرج آ ہم زور شاغا۔ سردار ایاز صادق پارے کہ پاکستان ایرانی الس کن ارٹ میکو اُرا ءِ، بھارت تون جنگ اٹی ایرانی مخ تفی آ اونا منت وار اُن۔ اوپارے کہ پاکستان 7 رافیل جہاز خلک بِٹے و بھارت ءِ شکست تس، پاکستان مدام جھیڑہ غاتا پرامن ایسری نا خواہندار ءِ، اوغانستان نا گل زمین پاکستان اٹ دہشت گردی کن کاریم اٹ اتنگ انگ ءِ۔ پاکستان دہشت گردی نا پورو چٹفنگ کن سنبرینگوک ءِ۔ اسپیکر سردار ایاز صادق پارے کہ اسرائیل ایران آ جلہو کرے تو پاکستان پارلیمنٹ یک زبان قرارداد نا کمک اٹ اسرائیلی جارحیت نا مذمت ءِ کرے  ، ایران وپاکستان نا اسیجائی دشمن ہم ارے ہرافتے ٹی اسرائیل اوار ءِ ، ایران نا اسرائیل ءِ پبی ورندی آ مبارکبادی پیش کیوہ۔ اوایرانی ڈپٹی اسپیکر نا بروک آپنچ سال انا شونداری پروگرام کن نیک است خواہی نا درشانی ءِ کرے۔ ایرانی ڈپٹی اسپیکر اسلام آباد اٹی ساڑی آ دھماکہ ٹی زوال کروک آتیکن ہڑزخواہی نا درشانی ءِ کرے، او12 دے ئی جنگ اٹی پاکستانی مخ تفی نا ستاءِ کرے و اودے یات گار گوندا۔ اوپارے کہ ہڑتوم آملک آتا نیام اٹ چندی بشخ آتیٹی کمکاری ءِ ودفنگ نا گیشتر وارخواہی ساڑی ءِ۔