ثالثی عدالت نا سندھ طاس معاہدہ نا رداٹ بھارت نا برخلاف پاکستان نا درخواست آ ثالثی نا گڑاس پلو آتیا فائدہ ئی وضاحت، ترجمان دفترخارجہ نا بیان

اسلام آباد ۔ 12 نومبر (اے پی پی) ترجمان دفترخارجہ پارینے کہ پاکستان سندھ طاس معاہدہ نا دفعہ غاتا رداٹ بھارت نا برخلاف پاکستان نا کنڈآن بناکروک ثالثی نا رداٹ ثالثی عدالت نا ساڑی آ فیصلہ نا نوٹس ءِ ہلکنے ہراٹی عدالت نا 8 اگست 2025نا ’’ایوارڈ آن ایشوز آف جنرل انٹرپریٹیشن آف دی انڈس واٹر ٹریٹی‘‘ نا ثالثی نا گڑاس پلو آتیا فائدہ ئی وضاحت کننگانے۔ چارشنبے نادے آ ترجمان دفترخارجہ نا کنڈآن جاری بیان اٹی پاننگانے کہ پاکستان دا فیصلہ نا متوازی وڑاٹ جاری کروک پروسیجرل آرڈر نا ہم نوٹس ءِ ہلکنے ہراداہیت ءِ پک کیک کہ عدالت ریسہ وار دا کارروائی تے برجاتخک و سندھ طاس معاہدہ نا آرٹیکل IXو اوڑتون ضمنی دستاویز ایف نا رداٹ بے کنڈ ہلوک ماہر نا مون آ مروک آ کارروائی ءِ مون آ تخک۔ ترجمان پارے کہ بے کنڈ ہلوک چاہندار آتا کارروائی بھارت نا خواست آ بناکننگاسس ہرانا بروک آ ریسہ ویاناٹی شیڈول نا رداٹ 17 آن 21 نومبر اسکان مننگ نا ءِ، ولے بھارت تینا شرکت ءِ توننگ نا فیصلہ کرینے، پاکستان نیک نیتی اٹ بے کنڈ ہلوک چاہندار آتا کارروائی ٹی پورو وڑاٹ بشخ ہلنگ ءِ برجاتخانے۔ دابابت نیوٹرل ایکسپرٹ فیصلہ تسنے کہ بھارت نا بشخ ہلپننگ مون آ ہنوک آ کارروائی ٹی اڑاند جوڑ مننگ کپک۔