27می آئینی ترمیم اگہ اینو ٹیبل مریک تو ضرور پاس مریک، پاک فوج وانا ٹی 500 آن زیات طالب علم آتے ریسکیو کرے، داتاریخی آپریشن ءِ دنیا یات تخک، عطاء اللہ تارڑ

اسلام آباد ۔ 12 نومبر (اے پی پی) بنجائی وزیر حوالکاری و شینکاری عطاء اللہ تارڑ پارینے کہ اینو اگہ 27 می آئینی ترمیم ٹیبل مریک تو ضرور پاس مریک، پاک فوج وانا ٹی 500 آن زیات طالب علم آتے ریسکیوکرے، دا تاریخی آپریشن ءِ دنیا یات تخک۔ چارشنبے نادے آ داڑے پارلیمنٹ ہاؤس نا پیشن میڈیا تون گپ وتران کرسا بنجائی وزیر حوالکاری پارے کہ اگہ اینو 27 می آئینی ترمیم ٹیبل مریک تو ضرور منظور مریک، کاش اپوزیشن داڑآ سیر حاصل گپ وتران کروسس و شق وار شرہ ٹی بشخ ہلوسس۔ اوپارے کہ بل ءِ خواننگ آن بیدس شوروغل کننگ و بیانیہ جوڑ کننگ آن ہچ ءُ فائدہ اس دوئی مفک۔ اسہ سوج اسے نا ورندی ٹی بنجائی وزیر حوالکاری پارے کہ وانا ٹی پاک فوج 500 آن زیات طالب علم آتے بازیاب کرے، پاک فوج انا دا تاریخی آپریشن ئس ہراڑآ پاک فوج ءِ خراج تحسین پیش کینہ۔ اوپارے کہ پاک فوج انا دا تاریخی آپریشن ءِ دنیا یات تخک۔ وانا آپریشن دنیا نا ملٹری اکیڈمی تیٹی خوانفنگک۔ بنجائی وزیر پارے کہ دشمن ءِ کلہو ءِ کہ پاکستان تینے آن چار گنا بھلا دشمن ءِ شکست تسنے، دشمن مورچہ غاتے ہلسا نراسس، دا پراکسی وار تو ننکن ہچ ءُ ویل اس ہی اف، دشمن ءِ ہرپڑآ شکست ایتنہ۔ صحافی ناسوج کہ انت مسلم لیگ (ن) نا قائد محمد نواز شریف اینو پارلیمنٹ ہاؤس آ بننگ ءِ، آ بنجائی وزیر حوالکاری ورندی تس کہ نما ہم اوڑدہی کرفنہ۔