اقوام متحدہ، سلامتی کونسل نا گچین مروک آ باسک آتا سیکرٹری جنرل تون اوڑدہی ، غزہ نا حالیت و پیس کیپنگ ویل آتیا گپ وتران

اقوام متحدہ۔ 12 نومبر (اے پی پی) اقوام متحدہ نا سلامتی کونسل نا 10 گچین مروک باسک(ای10) و پنچ پوسکن گچین مروک آ باسک(ہرا جنوری 2026 آن تینا رکنیت ءِ سنبھالرہ) نا اعزاز اٹی پاکستان نا آخبتی مندوب و ای 10 نا نومبر کن کوآرڈینیٹر عاصم افتخار احمد دے انا اِرغ نا بست وبند کرے ہراٹی یواین سیکرٹری جنرل انتونیوگوتریش ہم بشخ ہلک، باسک آک انتونیوگوتریش تون اہم جہانی امور نا بارواٹی گپ وتران کریر۔ اقوام متحدہ ٹی پاکستانی مشن آن جاری بیان نا رداٹ انتونیوگوتریش تون گپ وتران اٹی باسک آک ہمو امور آ گپ وتران کریر ہرا داوخت آ سلامتی کونسل نا ایجنڈاغاٹی ءِ ، اوٹی غزہ نا حالیت و اقوام متحدہ نا امن مشن تون تعلقدار پیش رفت ہم اوار ءِ۔ یات سلے کہ سلامتی کونسل نا کل 15 باسک ءُ ہرافتے ٹی 5 آخبتی باسک آتیٹی چین، فرانس، روس ، برطانیہ و امریکہ اوار ءُ و 10 بے آخبتی باسک ہم ارے ہرا اِرا سال انا مد اکن گچین کننگرہ۔ یواین جنرل اسمبلی ہر سال 5 بے آخبتی باسک آتا گچین کاری ءِ کیک تانکہ دزکش مروک آ باسک آتا جاگہ غا پوسکن آ باسک آتا نمائندگی ءِ پک کننگ مرے۔