بنجاھی حکومت ءِ ھست نہ بوھگ ءَ جمہوریت ءِ سسا  ناسرجم اِنت، راجی پجار، فیڈریشن ءُ پاکستانی ءِ ھوالگ ءَ جیڈھ آنی سر ءَ دلگوشی دیگ المی اِنت، دفاع ءِ وزیر خواجہ محمد آصف ءَ راجی اسمبلی ءَ وتی ھیالانی درشانی

اسلام آباد۔11نومبر  (اے پی پی): دفاع ءِ وزیر خواجہ محمد آصف ءَ گشتگ کہ جمہوریت ءِ تصور بید ءَ بنجاہی حکومت ناسرجم انت، المی انت کہ راجی پجار، فیڈریشن ءُ پاکستانی ءِ ھوالگ ءَ جیڈھانی سرا دلگوشی دیگ بہ بیت، دفاع ءُ وام ءِ پچ گرگ سرجمیں ملک ءِ جیڈھ انت ءُ یک مشترکہ مول ءُ مراد انت۔ سئے شمبے ءِ روچ ءَ راجی اسمبلی ءَ 27می آئین ترمیم ءِ ھوالگ ءَ گپ ءُ تران ءِ ساھت ءَ وزیر دفاع ءَ گوشت کہ بنیاتی جمہوریت ءَ ابید جمہوریت ءِ تصور سرجم نہ بیت۔ جمہوریت ھما وھد ءَ نا سرجم اِنت کہ اقتدار چہ لس مھلوک ءَ دیم دیگ مہ بنت۔ ویں ترمیم ءَ پد اختیارات ءِ سرا لس مھلوک ءِ تک ءَ دیم دیگ نہ بوتگ۔ آئی ءَ گوشت کہ پاکستان ءَ آمر آمراں بنجاہی حکومت آنی نظام دیم ءَ آؤرتگ ایشانی شری ءُ ھرابی آنی سر ءَ گپ ءُ تران کنگ بوت کنت۔ ایوب خان ءَ بنجاہی جمہوریت ءِ نظام داتگ، ضیاء الحق ءُ جنرل مشرف ءَ ہم بنجاہی حکومت ءِ نظام داتگ، البت جمہوری دوراں اے درگت ءَ ہچ وڑیں دیمروئی نہ بوتگ۔ بنجاہی حکومت ءِ ہست نہ بوہگ ءَ وفاق ہم مھکم نہ بیت۔ ما درست جمہوریت ءِ دعویٰ کنیں بلے مئے دود ءُ ربیدگ ءُ ڈی این اے جمہوری نہ انت۔ بنجاہی حکومت پاکستان ءُ مہلوک ءِ نپ ءَ انت ۔ منی دزبندی انت کہ بنجاہی حکومت ٹیکس ءِ اختیار دیگ بہ بنت۔ اے کار ءَ چہ استان آنی سر ءَ بار کم بیت ءُ فدراسیون ءُ منابع ضلع ءُ شہری حکومت آنی سر ءَ اتک کن اَنت۔ آئی ءَ گوشت کہ طاقت ءُ واک ءُ واک پیسر ءَ مرکز ءِ گون ءَ بوتگ نوں صوبائی حکومت آنی گون ءَ انت۔ اوگان جہاد ءِ واستہ پاکستان ءَ نصاب بدل کنگ بوتگ۔ ادا نیرا یونیورسٹی ءِ نصاب ءِ بندات کنگ بوتگ۔ یک جوانیں نسلے اے نصاب ءِ وانگ ءَ مزن بوتگ۔ تاریخ ءُ جغرافیہ ملک ءِ ہچ جاہ ءَ یک وڑ ءَ وانینگ نہ بنت۔ پاکستان ءِ وفاقی پجار ءُ پاکستانی ءِ واستہ ھم کار کنگ بہ بیت۔ گوادر ءُ چترال ءَ یک وڑیں وانگ ءُ زانگ بہ بیت ۔ آئی ءَ گوشت کہ سپر پاور ءِ سیت ءِ واستہ ھرچی وانینگ بوتگ ایشی ءَ گوں اے زمین ءَ ھچ سیادی نیست ءُ مذھب ءَ چہ انتہا پسندی ءُ زوراکی ءِ ذھنیت چہ ھمے نصاب ءَ پیداک بوتگ، مقبوضہ زمینانی سر ءَ مسیت ءُ مدرسہ جوڑ کنگ بوھگ ءَ انت۔ وزیر دفاع ءَ گوشت کہ راجی پجار، یکوئی ءُ پاکستانی ءِ واستہ اے جیڈھ آنی سر ءَ دلگوشی دیگ المی انت، دفاع ءُ وام آنی پچ گرگ سرجمیں ملک ءِ جیڈھ انت ءُ یک مشترکہ مول ءُ مراد انت۔ اے جیڈھ ملک ءُ قوم ءَ گوں سیادی دار اَنت ءُ سرجمیں پارلیمنٹ ایشانی سر ءَ دلگوشی بہ دنت ۔ وزیر دفاع ءَ گوشت کہ راج ءَ را اے پیغام دیگ بہ بیت کہ ما یک ایں، گوستگیں جنگ ءَ سرجمیں راج یکجاہ بوتگ، مارا یک راجے ءِ بستار ءَ وتی پجار دیگی اِنت ءُ آئین ءِ رکھینگ ءَ ھم دیگی اِنت۔