مزن وزیر شہباز شریف ءَ دیوان ءِ سروکی ءَ کنان ءَ جناح میڈیکل کمپلیکس ءِ زوت سرجمی ءَ رکاوٹ آناں دور کنگ ءِ پنت ءُ شون

اسلام آباد۔11نومبر  (اے پی پی): مزن وزیر محمد شہباز شریف ءَ توامیں سیادی داروکیں ادارگ آنی وت مہ وتی کمک ءَ گوں جناح میڈیکل کمپلیکس ءِ زوت سرجم کنگ ءِ تہ ءَ رکاوٹ آناں زوتاں چہ زوت دور کنگ ءُ کوالٹی ءِ جوڑیشت ءُ نوکیں آسراتی آناں دل یکیمی کنگ ءِ پنت ءُ شون کتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ جناح میڈیکل کمپلیکس ءُ ریسرچ سینٹر ءِ جوڑیشت ءِ دیمروئی ءِ ھوالگ ءَ مزن وزیر محمد شہباز شریف ءِ سروکی ءَ چار ءُ تپاسی دیوان برجم دارگ بوت۔ گند ءُ نند ءَ وفاقی وزیر برائے منصوبہ بندی احسن اقبال، وفاقی وزیر جان سلامتی مصطفیٰ کمال، وفاقی وزیر اقتصادی امور احد خان چیما ءُ ایندگر سیادی داروکیں سرکاری حکام ءَ شریک بوتگ۔ مزن وزیر ءَ گند ءُ نند ءَ پنت ءُ شون کت کہ جناح میڈیکل کمپلیکس ءِ توامیں جدید میڈیکل آسراتی آنی گوما معیاری جوڑیشت یک ٹوھیں حکمت عملی ءِ چیر دستی ءَ سرجم کنگ بہ بیت۔ کمپلیکس ءِ زوت سرجمی ءِ تہ ءَ دیم ءَ اتکگیں درستیں رکاوٹ آناں ھمگرنچیں ادارگ آنی یکوئی کمک ءَ گوں زوتاں چہ زوت گیش ءُ گیوار کنگ بہ بیت ءُ جناح میڈیکل کمپلیکس ءِ چیردستی ءَ یک سب میڈیکل سنٹر ءِ جوڑ کنگ ءِ سر ءَ کار کنگ بہ بیت تانکہ دمگی آبادی ءَ را طبی آسراتی دیگ بہ بیت۔ مزن وزیر ءَ جناح میڈیکل کمپلیکس ءِ جوڑیشت ءُ نوکیں علاج ءِ پجاری ءِ تہ ءَ لوٹ ءِ رد ءَ میاں اوستمانی ماہرین آنی ازمت آناں زورگ ءِ ھم پنت ءُ شون کتگ۔ بریفنگ ءِ تہ ءَ مزن وزیر ءَ را گوشگ بوت کہ جناح میڈیکل کمپلیکس ءِ واستہ لوٹوکیں زمین ھزور کنگ بوتگ ایشی ءِ واستہ ڈیزائن کنسلنٹ گچین کنگ بوتگ۔ مزن وزیر ءِ پنت ءُ شون ءِ رد ءَ منصوبگ ءِ سیمی فریق ءِ توثیق ءَ را ہم دل یکیمی کنگ بیت۔ گند ءُ نند ءَ مزن وزیر ءَ را جناح میڈیکل کمپلیکس ءُ ریسرچ سینٹر ءِ جوڑیشت ءِ ھوالگ ءَ انوگ ءَ تاں کتگیں بندوبست، کارکردگی ءُ پیشرفت ءِ ھوالگ ءَ سرپد کنگ بوت۔ مزن وزیر ءَ درستیں سیادی داروکیں وزارت ءُ ادارگ آناں ھاسیں پنت ءُ شون دات کہ آ وت مہ وتی کمک ءَ گوں اے منصوبگ ءَ را زوتاں چہ زوت سرجم بہ کن اَنت۔