سرجمیں دگنیا ءَ برجاھیں جنجالاں امن ءِ ارزشت ءَ را گیش پدر کتگ، پاکستان ءَ اے گپ ثابت کتگ کہ آ وتی حاکمیت ءُ سرزمین ءِ یکوئی ءِ رکھینگ ءِ واستہ ھرچ وڑیں قیمت ءِ ادا کنگ ءَ تیار اِنت، مزن وزیر شہباز شریف بین پارلیمانی اسپیکر کانفرنس ءَ گوں تران

اسلام آباد۔11نومبر  (اے پی پی): مزن وزیر محمد شہباز شریف ءَ امن ءُ ایمنی ءَ را پائیدار دیمروئی ءِ بنیات گشگ ءِ وھد ءَ گوشت کہ سرجمیں دگنیا ءَ برجاھیں جیڈھ آناں امن ءِ ارزشت ءَ را گیش پدر کتگ، پاکستان ءَ اے گپ ثابت کتگ کہ آ وتی حاکمیت ءُ امن ءِ دمگ ءِ رکھینگ ءِ واستہ ھرچ وڑیں قیمت ءِ ادا کنگ ءَ تیار اِنت۔ رابطہ، دیمروئی ءُ وشحالی ءِ ھاتر ءَ اوگان عبوری حکومت ٹی ٹی پی ءُ ایندگر گلانی ھلاپ ءَ موثر گامگیج بہ زوریت، ھچ ملک ایوک ءَ دیمروئی نہ کنت، پاکستان جامع اقتصادی اصلاحات کنگ ءَ انت۔ اے ھیالانی درشانی آئی ءَ سئے شمبے ءِ روچ ءَ بین الاقوامی اسپیکر کانفرنس ءَ گوں گشتانک دیان ءَ کت۔ اے موہ ءِ سر ءَ سینیٹ ءِ چیئرمین سید یوسف رضا گیلانی، سیکرٹری جنرل آئی ایس سی اکناتھ ڈھکل ھم ساڑی اتنت۔ کانفرنس ءَ سرجمیں دگنیا ءِ نمائندہ ءُ پارلیمانی ڈلاں بہر زرتگ ات۔ مزن وزیر ئَ گوشت کہ کانفرنس ئِ تہ ئَ بھر زوری ئِ واستہ سرجمیں دگنیا ئَ چہ گشتانک دیوک، پارلیمنٹرین ئُُ نمائندہ آناں وش اتک کناں۔ آئی ءَ گوشت کہ اے ھاسیں کانفرنس ءِ میزبانی کنگ پاکستان ءِ واستہ شرپ ءِ گپ اِنت ایشی ءِ وسیلگ ءَ پارلیمانی سروکی امن ایمنی ءُ دیمروئی ءِ یکجائی وژن ءِ سر ءَ گپ ءُ تران کنگ ءِ واستہ ادا یکجا بوتگ اَنت۔ آئی ءَ ھاسیں رنگ ءَ چیئرمین سینیٹ ءُ آئی ایس سی ءِ بانی چیئرمین سید یوسف رضا گیلانی ءِ کوشست ءُ عزم ءِ ساڑات کت کہ آھانی کوشست ءُ جزم ءَ اے فورم ءَ را حقیقت جوڑ کت۔ مزن وزیر ءَ گوشت کہ اے کانفرنس ءِ بنگپ ’’امن، ایمنی ءُ دیمروئی‘‘ سک باز وھد ءِ سر ءَ انت ءُ بے دروریں المی انت۔ اے بنگپ ادا ھستیں درستیں ملکانی واستہ المی انت بلے پاکستان ءِ واستہ ھاسیں ارزشت ءِ واھند انت۔ آئی ءَ گوشت کہ 1947ءَ چہ آجوئی ءَ پد پاکستان مدام گپ ءُ تران ءُ سفارتکاری ءِ وسیلگ ءَ امن ءِ کمک کنوک بوتگ۔ ما دلجمی ءَ گوں باور کنیں کہ امن ءُ ایمنی راجی ءُ دمگی دیمروئی ءِ برجائی ءِ بنیات اِنت۔ امن ءِ راستیں ارزشت گیشتر ہما ​​وہد ءَ محسوس بیت کہ ما ہما تنازعات ءِ دیم ءَ کپیں کہ مرچی ہم دنیا ءَ سُتکگ انت۔ مزن وزیر ءَ یات دات کہ پاکستان ءَ ھم اے بحران ءَ را براہ راست ءُ بالواسطہ رنگ ءَ گوں دیم پہ دیم بوتگ بلے امن ءُ ایمنی ءِ ھاترا مدام وتی جہد ءُ کوشست ءَ را برجاہ داشتگ۔ آئی ءَ ھواریں مردماں سرپدی دات کہ اے سال ءِ مئی ءَ پاکستان ءَ را رودرآتکی سیمسر ءِ نیمگ ءَ چہ بے سوبیں زوراکی ءِ دیمپانی بوتگ، ایشی ءِ تہ ءَ مئے پیشہ وار ءُ بہادریں سلاہ بندیں اُرداں جوانیں تیاری ءُ جوانیں کارکردگی ءِ درشانی کتگ ءُ زمینی ءُ ھوائی دفاع ءِ واستہ مئے وھد ءُ پاس ءِ سر ءَ ءُ فیصلہ کنوکیں گامگیج ءَ نہ ایوک ءَ دژمن ءِ ارادہ ناکام کتگ بلکیں پاکستان ءَ را چہ دگنیا ءَ را ھم ناکام کتگ۔ آئی ءِ دفاع، حاکمیت ءُ علاقائی یکوئی ءَ ہر قیمت ءَ چہ ہلاس کنت۔ مزن وزیر ءَ گوشت کہ پرامن اوگانستان دمگی رابطہ، دیمروئی ءُ وشھالی ءِ کلیت انت۔ بدبھتی ءَ اودا امن ءِ رسگ دہائیاں ناکام بوتگ بلے پاکستان ءَ ھچبر اُمیت یلہ نہ داتگ۔ ما پرامن ہمساہگی ءِ سرا باور کنیں ءُ ہمے مول ءُ مراد ءِ ہاترا مدام کار کنگ ءَ ایں ۔ آئی ءَ گوشت کہ اے سک باز بدبھتی ءِ گپ اِنت کہ جنگولی گل نہ ایوک ءَ اوگانستان ءِ تہ ءَ بلکیں سیم سر ءِ درگت ءَ ھم امن ءَ را ھترہ ءِ آماچ کنگ ءَ اَنت۔ گوستگیں ماہ ءَ وھدے مئے سیمسر ءِ پوسٹانی سر ءَ اوگانستان ءِ اُرش بوتگ گڑا مئے پسو ھشکیں ءُ فیصلہ کنوکیں بوتگ۔ ما ھما عناصراں ناقابل فراموشیں سبق داتگ کہ آہاں پاکستان ءِ سرا اُرش کنگ ءِ جرات کتگ۔ اے درگت ءَ مزن وزیر ءَ براتیں ملک ھاسیں رنگ ءَ ترکیہ ءُ قطر ءِ کوشست آناں ساڑات کہ ایشاں چہ پاکستان ءُ اوگان طالبان ءِ نیام ءَ گپ ءُ تران ءَ آسراتی رستگ۔ آئی ءَ گوشت کہ اوگانستان ءَ اے گپ ءَ سرپد بوھگی اِنت کہ دائمی امن ھما وھد ءَ ممکن اِنت کہ ٹی ٹی پی ءُ اوگان سرزمین ءَ چہ کار کنوکیں ایندگر گل آناں کنٹرول کنگ بہ بیت۔ آئی ءَ گوشت کہ پاکستان اے ھوالگ ءَ عملی گامگیج چست کنگ ءَ تیار اِنت بشرطیکہ اوگانستان ءِ عبوری حکومت ھم مئے جائز جیڈھ آنی گیواری ءِ واستہ ٹھوس ءُ بامردیں گامگیج چست بہ کنت۔ مزن وزیر ءَ گوشت کہ پاکستان ءَ مدام مظلوم آنی حق ءَ توار چست کتگ، آ غزہ ءِ معاملہ بہ بیت یا بھارتی ناجائزیں قبضہ ءِ چیر ءَ جموں ءُ کشمیر ءِ مظلومیں الس یا ھما درستیں راج کہ انگت ءَ وتی بنیاتی ھک ءُ آجوئی ءَ چہ زبھر اَنت۔ آئی ءَ گوشت کہ مئے مدامی عزم امن ءُ ایمنی ءِ دیمروئی ءِ واستہ اِنت، آ اقوام متحدہ، او آئی سی، ایکو، ایس سی او یا ایندگر ھاسیں گلوبل پلیٹ فارم بہ بنت۔ آئی ءَ گوشت کہ دگنیا ءَ جیڈھ آنی آتش گریبی، نابرابری ءُ ناانصافی ءَ چہ تالان کنگ بیت، محرومی بے رھبندی ءَ را ودی کنت۔ بے رھبندی ءُ جیڈھ آناں گر ءُ چیل بوھگ ءِ واستہ دیمروئی ءِ گامگیج آنی ضلورت ءِ سر ءَ زور پر دیان ءَ آئی ءَ گوشت کہ پاکستان ءَ مئے حکومت ءَ سرجمیں اصلاحات ءِ بندات کتگ ایشی ءِ مول ءُ مراد درست آنی بھر زوری ءَ گوں دیمروئی ءِ راہ ءِ نیمگ ءَ روگ، ادارگی مھکم کنگ ءُ ورنا ءُ زالبول آناں توانمند کنگ اِنت۔ آئی ءَ گوشت کہ کسان ءُ میاں اوستمانی ادارگ معیشت ءِ ریڑھ ءِ ھڈ انت، ایشی ءِ سبب ءَ ما ایس ایم ای فنانسنگ ءَ را گیش کنگ ءَ ایں تانکہ روزگار ءِ پیداک کنگ، نوکیں چیز جوڑ کنگ ءُ وسیع بنیات ءِ اقتصادی شمولیت ءِ اہل کنگ بہ بیت۔ آئی ءَ شریکیں مردم آناں گوشت کہ حکومت زالبول آناں ڈیجیٹل مہارت آنی پجارینگ، مالی وسیلگ آناں رسگ ءِ آسراتی دیگ ءُ سروکی ءِ موہ پجارینگ ءِ سر ءَ دلگوشی دیگ ءَ اِنت تانکہ آ پاکستان ءِ اقتصادی ءُ چاگردی بدلی ءِ تہ ءَ وتی سرجمیں توان ءَ کمک بہ کن اَنت۔ مزن وزیر ءَ گوشت کہ میاں اوستمانی محاذ ءِ سر ءَ پاکستان میاں اوستمانی مالیاتی ادارگ ءُ دیمروئی شراکت دار آنی گوما مالیاتی اصلاحات، موسمیاتی لائک ءُ سرمایہ کاری ءَ را دیم ءَ برگ ءِ واستہ کار کنگ ءَ انت، اے یک مھکم ءُ وشھالیں آیوکیں وھد ءِ واستہ ناگزیر انت۔ مئے گمان اِنت کہ ہچ راج ایوک ءَ دیمروئی کت نہ کنت۔ مئے مقدر یکے دومی ءَ گوں بندوک اَنت۔ مزن وزیر ءَ پارلیمنٹ ءَ را الس ءِ واھشت آنی امانت دار لیکگ ءِ ساھت ءَ گوشت کہ اے راجی ءُ جھان ءِ سفر ءَ الس ءِ گچین بوتگیں نمائندگ آنی سک باز ارزشتی ایں کرد اِنت۔ ما وتی راج ءِ مقدسیں امانت ءِ نگہبان ایں ءُ مارا ایشانی توقعات ءِ سرا عمل کنگی اِنت۔ مارا وتی راج ءِ اجتماعی گہتری ءِ ھاترا گوں وتی سرجمیں توان ءُ نیکیں نیتاں کار کنگی اِنت۔ آئی ءَ اے امیت سہرا کت کہ کانفرنس ءِ ساھت ءَ بامردیں گپ ءُ تران ءَ چہ نوکیں راہ ءُ درانی درشان کنگ ءُ یکجائی کوشست آناں دیم ءَ برگ ءَ کمک رسیت۔ آئی ءَ اے گپ ءِ سر ءَ زور پر دات کہ درستیں راج آنی مردم امن ءِ دیمروئی ءِ واستہ یکجاہ بہ بنت، برجمیں دیمروئی ءِ ھاترا ءُ اجتماعی ایمنی ءَ را مھکم بہ کن اَنت دانکہ ما دائمی امن ءُ یک مشترکہ وشھالیں آیوکیں وھد ءِ جوڑ کنگ ءَ بہ کن ایں ۔