وفاقی وزیر ءُ مزن وزیر ءِ ھاسیں کمکار ءَ مزن وزیر شہباز شریف ءُ ٹاپ 20 کمپنی آنی سی ای او آنی نیام ءَ پیش کرتگیں گند ءُ نند ءِ سر ءَ گپ ءُ تران کنگ ءِ واستہ دیوان برجم

اسلام آباد۔11نومبر  (اے پی پی): وفاقی وزیر تجارت جام کمال خان، راجی فوڈ سیکیورٹی ءِ وفاقی وزیر رانا تنویر حسین، مزن وزیر ءِ ھاسیں کمکار ہارون اختر خان ءُ خزانہ ءُ ریلوے ءِ وزیر مملکت بلال اظہر کیانی ءَ سئے شمبے ءِ روچ ءَ مزن تک ءِ گند ءُ نند ءَ بہر زرتگ۔ وزارت صنعت ءُ پیداوار ءِ نیمگ ءَ جاڑی بوتگیں بیان ءِ رد ءَ دیوان ءَ مزن وزیر شہباز شریف ءُ پاکستان ءِ ٹاپ 20 کمپنی آنی چیف ایگزیکٹو آفیسر آنی نیام ءَ استیں دیوان ءِ تیاری آنی سر ءَ ھیال ریچی کنگ بوتگ۔ وفاقی وزیراں دیوان ءِ بندوبست ءُ سی ای اوز آناں دعوت دیگ ءِ طریقہ کار ءِ سر ءَ سرجمیں رنگ ءَ چار ءُ تپاسی کت۔ گند ءُ نند ءَ پاکستان ءَ سرمایہ کاری ءَ را دیمروئی دیگ ءُ جھان ءِ تک ءَ ملک ءِ اقتصادی ءُ جغرافیائی ارزشت ءَ را پدر کنگ ءِ واستہ اسٹریٹجک گامگیج آنی سر ءَ ھم ھیال ریچی کنگ بوت۔ مزن وزیر ءِ ھاسیں کمکار ہارون اختر خان ءَ گوشت کہ پاکستان ءِ دگنیا ءِ تہ ءَ سک باز ھاسیں اسٹریٹجک پوزیشن ءِ واھند اِنت ءُ جتاجتائیں شوبگ آنی تہ ءَ سرمایہ کاری ءِ مزنیں موہ پجاری کنت۔ آئی ءَ گوشت کہ مزن وزیر ءِ مزنیں سی ای اوز آنی گوما گند ءُ نند پاکستانی معیشت ءِ واستہ گیم چینجر ءِ رنگ ءَ ثابت بیت۔ وفاقی وزیر تجارت جام کمال خان ءَ گوشت کہ تجارت ءِ دیمروئی ءِ واستہ پالیشی آناں نوکیں جھان ءِ رجحان آنی گوما یکجا کنگ بوھگ ءَ اِنت تانکہ پائیدار اقتصادی دیمروئی ءَ را دل یکیمی کنگ بوھگ ءَ اِنت، وھدیکہ رانا تنویر حسین ءَ اے گپ ءِ سر ءَ زور پر دات کہ نوکیں ٹیکنالوجی ءَ را زورگ زرعی پیداوار ءَ را گیش کنگ ءِ واستہ وھد ءِ ضلورت اِنت۔ وزیر مملکت بلال اظہر کیانی ءَ گوشت کہ سرمایہ کاری ءِ شوبگ ءَ برجائی ءَ چہ روزگار ءِ موہ گیش بنت ءُ برجمیں اقتصادی دیمروئی ممکن بیت۔ ھاسیں کمکار ہارون اختر خان ءَ گیش کت کہ حکومت ءِ سفیر ءُ میاں اوستمانی شریک آنی گوما گند ءُ نند پاکستان ءِ جوانیں عکس ءِ پیش کنگ ءِ یک مزنیں کوشست ءِ بھر انت۔ وفاقی وزیر آں اے جزم ءِ درشان کت کہ حکومت نجی شوبگ ءَ را راجی دیمروئی ءِ تہ ءَ یک مھکم ءُ کلیدی شریک ءِ رنگ ءَ گندیت۔ آہاں گوشت کہ مزن وزیر شہباز شریف ءِ سرمایہ کاری دوستیں پالیشی آں چہ جوانیں ءُ ٹھوس آسراتی رسگ ءَ انت، ایشی ءَ چہ ملکی معیشت ءِ برجائی ءِ ضمانت انت۔