اسلام آباد اٹی اِرادے ئی بین الپارلیمانی اسپیکر ز کانفرنس امن، سلامتی وپائیدار شونداری نا مون آ دننگ کن پاکستان نا ودوک آکڑد انا چیدہ قرار

اسلام آباد۔ 11 نومبر (اے پی پی) اِرادے ئی بین الپارلیمانی اسپیکرز کانفرنس نا بناسے شنبےنادے اسلام آباد اٹی مس، کانفرنس اٹی دنیا نا 40 آن زیات ملک آتا اسپیکرز، ڈپٹی اسپیکرز و پارلیمانی ڈل آک بشخ ہلنگ ءُ۔ دااہم سفارتی اجتماع جہانی امن، سلامتی و پائیدار شونداری نا مون آ دننگ کن پاکستان نا ودوک آ کڑد انا چیدہ گوندنگ انگ ءِ ۔ بنائی دیوان نا بناتلاوت قرآن مجید آن مس، اوکان پد قومی ترانہ ءِ پیش کننگا۔ وزیراعظم محمد شہباز شریف ، چیئرمین سینیٹ سید یوسف رضاگیلانی و چندی جہانی تنظیم تا نمائندہ غاک داوخت آ ساڑی ئسر ۔ داسال انا کانفرنس نا سرحال ’’امن، سلامتی و شونداری‘‘ ءِ، ہرا دا ودوک آ جہانی امنائی سلاہ نا عکاسی ءِ کیک کہ پائیدار شونداری و جہانی سوگوی اسہ ایلو تون گنڈوک ءُ۔ بین الپارلیمانی یونین(آئی پی یو) نا سیکرٹری جنرل مارٹن چونگونگ جنیوا غان تینا ویڈیو کلہو اٹی کانفرنس کن نیک است خواہی نا درشانی ءِ کرے۔ اوپارے کہ امن، سلامتی و شونداری اسہ ایلو تون تفوک ءُ، و ننے جہانی شونہالی و انصاف کن اسیجائی کوشست آتے برجاتخوئی مریک۔ آئی ایس سی (آئی ایس سی) نا سفیر مصباح کھار مہمان تے بخیرکرساپارے کہ مچ آ دنیا غان پارلیمانی راہشون تا بشخ ہلنگ داہیت انا چیدہ ءِ کہ اختلاف نا جاگہ غا گپ وتران ءِ اولیت تننگ انگ ءِ۔ اوپارے کہ دا کانفرنس سیوت و ہم گرنچی نا چیدہ ءِ و چیئرمین سینیٹ نا دا وژن نا درشانی ءِ ہرا 40 آن زیات پارلیمانی راہشون تے اسہ پلیٹ فارم آ یکجاکرے۔ ہراتم امن مفک تو شونداری ہم سلک۔ آئی ایس سی نا سیکرٹری جنرل ای۔کے۔ناتھ دھاکل تینا تران اٹی پارے کہ اسلام آباد اٹی شرفمند آ مہمان تا مہمانداری ننکن شرفمندی اسے۔ اوپارے کہ آئی ایس سی اسہ کثیر الجہتی بین الحکومتی ادارہ نا وڑاٹ جہانی ویل مثلا چاگڑدی چیلنج و امن کن کمکاری ءِ مون آدیک۔ اوغٹ بشخ ہلوک آتیا زور شاغا کہ او امن، سلامتی و شونداری نا ایجنڈاءِ مون آ دننگ کن اسیجائی کوشست کیر۔ چیئرمین سینیٹ سید یوسف رضاگیلانی پارلیمان و الس پاکستان نا کنڈآن مہمان تے بخیر اٹ پارے و پارے کہ داکانفرنس وزیراعظم شہباز شریف و صدر آصف علی زرداری نا کماشی ٹی پاکستان نا دا عزم انا درشانی ءِ کہ نن جہانی ہم گرنچی و کمکاری ءِ مون آ دننگ خوانہ۔ اوپارےکہ امن و سلامتی لازم وملزوم ءُ۔ و ہراتم اسکان امن مفک، پائیدار شونداری ممکن اف۔ بنائی دیوان نا ایسر آ وزیراعظم محمد شہباز شریف آئی ایس سی نا سیکرٹری جنرل ای۔کے۔ناتھ دھاکل و آئی ایس سی نا سفیر مصباح کھار ءِ یات گاری شیلڈ پیش کرے۔