چیئرمین سینیٹ و بانی چیئرمین انٹر پارلیمانی اسپیکرز کانفرنس سید یوسف رضاگیلانی نا بین الپارلیمانی اسپیکرز کانفرنس نا بنائی دود آن تران

اسلام آباد۔ 11 نومبر (اے پی پی) چیئرمین سینیٹ و بانی چیئرمین انٹرپارلیمانی اسپیکرز کانفرنس (ISC)سید یوسف رضاگیلانی پارینے کہ پارلیمان دنیا ٹی امن و شونداری نا بیرہ ناظر اف بلکن پت انا جوڑ کروک، امنائی سلاہ نا مون آدروک و الس نا توار ءِ، پاکستان جہانی کہول آ امن، سلامتی و شونداری نامون آ دننگ کن سنبرینگوک ءِ۔ پاکستان نا دا عزم بیرہ بیان آتسکان محدود اف بلکن دانا عملی شاہدی پاکستان نا دہشت گردی نا برخلاف جہانی جنگ اٹ صف اول نا کڑد و اقوام متحدہ نا امن مشن تیٹی اہم شرکت ءِ۔ سے شنبےنادے آ اسلام آباد اٹی اڈ ہلوک جہانی اسپیکرز کانفرنس نا بنائی دیوان آن تران کرسا چیئرمین سینیٹ تینا تران نا بناٹی مہمان خاص وزیراعظم محمد شہباز شریف تون اوار قومی و صوبائی سرکڑدہ، درملکی شرفمند آمہمان، اسپیکرز، پارلیمان نا باسک، گورنرز، وزیراعلاک و جہانی مندوبین آتے بخیراٹ پارے۔ اوپارے کہ وزیراعظم پاکستان نا بطور مہمان خاص بشخ ہلنگ نئے بیرہ پارلیمان نا ادارہ نا شرف نا چیدہ ءِ بلکن دا پاکستان نا داعزم انا ہم پیدوار عکاسیءِ ہرا مکالمہ، کمکاری و کثیر الجہتی رابطہ غاتا مون آ دننگ نا بابت ءِ۔ چیئرمین سینیٹ پارے کہ اینو دنیا نا قطبی و سویلی بشخ آتیان تعلق تخوک آپارلیمانی راہشون اسہ چھت انا کیرغ مچ ءُ، ہرا اسہ پوسکن قول انا پارلیمانی یکجہتی نا بنداو ءِ ، دا تاریخی اجتماع مچ آ دنیا نا پارلیمانی راہشون تا یکجہتی، عزم و کمکاری نا چیدہ ءِ۔ اوپارے کہ کانفرنس نا سرحال امن، سلامتی و شونداری سیم و نظریہ غاتیان ایڑتر اسہ ہند ن ءُ کلہو اسے ہرا مچ آ انسانیت کن راہشونی فراوان کیک۔ اوپارے کہ ساڑی آ دور غیر یقینی، جھیڑہ، چاگڑدی بدلی، زرگزرانی لوڈو و ترند رفتار تکنیکی تغیرات آتون عبارت ءِ۔ چیئرمین سینیٹ پارے کہ امن ننا مون آ تالان مرسا کننگ ءِ دُن کہ نن غزہ، سوڈان و مقبوضہ کشمیر اٹی ظلم وبربریت نا دروشم اٹ خنان۔ اوزور شاغا کہ دُن انگا وخت اٹی پارلیمان ءِ راہشونی نا کڑد ءِ ادا کروئی مریک۔ پارلیمان دنیا نا ٹُکر آتیٹی بشخوک نظام ءِ گنڈنگوک آ روشنائی بایدے جوڑمرے۔ ننے سجفوئی، قول کننگ و یکجا عمل کروئی مریک۔ مکالمہ ننا پول و کمکاری ننا بایدے کسر مرے۔ چیئرمین سینیٹ پارے کہ امن، سلامتی و شونداری اسہ ایلو آن بیدس بے پورو ءُ۔ امن وسلامتی آن بیدس شونداری ممکن اف و شونداری آن بیدس امن پائیدار سلنگ کپک۔ اوپارے کہ اینو سلامتی نا مفہوم بیرہ سیم تا دفاع اسکان محدود سلتنے بلکن چاگڑدی سوگوی، خور و دِیر انا سلامتی، ڈیجیٹل رکھ و زرگزرانی خودکفالت کون آ زموار آتے ہم اوار کیک۔ سید یوسف رضاگیلانی پارے کہ پاکستان، ہرا جہانی کاربن اخراج اٹی اسہ درسد آن ہم کم بشخ شاغک۔ چاگڑدی بدلی تا بدترین اثرآتا گواچی ءِ۔ دااسہ خرین ءُ حقیقت اسے کہ چاگڑدی بدلی داسہ مرانا خطرہ اس اف بلکن اسہ ساڑی، غیر منصفانہ حقیقت اس جوڑ مسنے۔ چیئرمین سینیٹ پارے کہ صدر پاکستان آصف علی زرداری و وزیراعظم محمد شہباز شریف نا کماشی ٹی پاکستان جہانی کہول آ امن، سلامتی و شونداری نا مون آ دننگ کن سنبرینگوک ءِ۔ اوپارے کہ پاکستان نا دا عزم بیرہ بیان آتسکان محدود اف بلکن اونا عملی شاہدی پاکستان نا دہشت گردی نا برخلاف جہانی جنگ اٹی صف اول نا کڑد و اقوام متحدہ نا امن مشن تیٹی اہم بشخ ہلنگءِ۔ اوپارے کہ دے ٹکی و قطب دیکی سیم تیا ساڑی آ جارحانہ کارروائی تیان پد ہم پاکستان بردباری، زمواری و تحمل نا درشانی ءِ کرے۔ نن بے چیٹی ءِ کم کننگ کن ہرممکن کوشست کرین و جوان گپ وتران نا پیش کش ہم کرین ولے امن مدام ہڑتوم آ کنڈآتا سڑک ءِ ہراڑکن غٹ فریق آتے متقابل رویہ تینا کروئی مریک۔ سید یوسف رضاگیلانی پارے کہ دہائی تیا تالان پارلیمانی جاچ اودے دا باور کرفینے کہ پائیدار شونداری تنیائی ٹی دوئی کننگ مفک۔ شونداری اسہ  تین پہ تینی و مربوط ءُ عمل اسے۔ ہندا احساس دا جہانی کانفرنس نا اڈتننگ نا اصل تحریک جوڑ مس۔ اوپارے کہ کہ ببو دا اجتماع ءِ یات گار جوڑ کین، اسہ ہندن ءُ عزم اسے نا وڑاٹ ہرا دنیا ٹی اومیت، سیوت و سرکڑدہ غاتا پوسکن ءُ بشخ اس نوشتہ کے۔ چیئرمین سینیٹ غٹ مندوبین آتیکن اسلام آباد اٹی خوشگوار قیام و کانفرنس نا سرسہب اڈتننگ نا نیک است خواہی نا درشانی ءِ کرے۔