مچ آ دنیا ٹی برجا جھیڑہ غاک امن نا اہمیت ءِ پین تالان کرینو، پاکستان پک کرے او تینا وتواجہی و علاقائی سالمیت نا رکھ اکن ہر قیمت ءِ ادا کننگ کن تیار ءِ، وزیراعظم شہباز شریف نا بین الپارلیمانی اسپیکرز کانفرنس آن تران

اسلام آباد۔ 11 نومبر (اے پی پی) وزیراعظم محمد شہباز شریف امن وسوگوی ءِ پائیدار شونداری نا بنداو گوندساپارینے کہ مچ آدنیاٹی برجاجھیڑہ غاک امن نا اہمیت ءِ پین تالان کرینو، پاکستان پک کرے کہ او تینا وتواجہی و علاقائی سالمیت نا رکھ اکن ہر قیمت ءِ ادا کننگ کن تیار ءِ، پرامن و سوگو اوغانستان ہی علاقائی رابطہ، شونداری  و شونہالی نا کنجی ءِ، اوغان عبوری حکومت ٹی ٹی پی و ایلو گروپ آتا برخلاف گچین کارروائی کے، اسہ ملک اس ہم تنیا شون ہلپک، پاکستان جوان زرگزرانی اصلاحات کننگ ءِ۔ داخیال آتا درشانی ءِ او سے شنبے نادے آ داڑے بین الپارلیمانی اسپیکرز کانفرنس آن تران کرساکرے۔ داوخت آ چیئرمین سینیٹ سید یوسف رضاگیلانی ، سیکرٹری جنرل آئی ایس سی اکناتھ دھکل ئسک ہم ساڑی ئسر۔ کانفرنس اٹی مچ آ دنیا غان مندوبین و پارلیمانی ڈل آک بشخ ہلکر۔ وزیراعظم پارے کہ او مچ آ دنیا غان کانفرنس اٹی بشخ ہلنگ کن بروک آ اسپیکرز، پارلیمینٹرینز و مندوبین تے بخیر اٹ پاہک۔ اوپارے کہ پاکستان کن دااہم کانفرنس نا اڈتننگ شرفمندی نا سوب ءِ ہرانا کمک اٹ پارلیمانی سرکڑدہ غاک امن، سلامتی و شونداری نا اسیجائی وژن آ گپ وتران کن داڑے مُچ ءُ۔ اوچیئرمین سینیٹ و آئی ایس سی نا بانی چیئرمین سید یوسف رضاگیلانی نا خاص وڑاٹ ستاءِ کرے ہرانا کوشست و عزم دا فورم ءِ حقیقت اٹ شاغا۔ وزیراعظم پارے کہ داکانفرنس نا سرحال’’امن، سلامتی و شونداری‘‘ بھاز بروخت و بے کچ اہم ءِ۔ دُن تو دا سرحال داڑے ساڑی غٹ ملک آتیکن اہمیت تخک ولے پاکستان کن دا خاص اہمیت تخک۔ اوپارے کہ 1947اٹی آجوئی آن پد آن پاکستان مدام مذاکرات و سفارتکاری نا کمک اٹ امن نا مخ تف مسنے۔ نن پکا یخین تخنہ کہ امن و سلامتی ہی دیرپا قومی و علاقائی شونداری نا بنداو ءِ۔ امن نا حقی قدر ہمووخت آ غٹ آن زیات محسوس مریک ہراتم نن دا جھیڑہ غاتون مون ایتنہ ہرافتا سوب آن اینو ہم دنیا مون تننگ ءِ۔ وزیراعظم یات ترفے کہ پاکستان ہم دا تنکی کیفیت تون مون تننگ بلاواسطہ و بالواسطہ ہڑتوم آ وڑتے اٹ کرینے ولے نن مدام امن و سوگوی نا دوئی کننگ کن تینا جہد ءِ برجاتخان۔ اوبشخ ہلوک آتے معلومدار کرے کہ دا سال مئی ٹی پاکستان ءِ دے ٹکی سیم آن بلااشتعال جارحیت تون مون تروئی تما ہراٹی ننا کسبی و بہادر سلہہ بند فوج شاندار تیاری و گچین کارکڑد نا درشانی ءِ کرے و ننا زمینی و ہوائی دفاع کن وخت آ و فیصلہ کن کارروائی نئے بیرہ دشمن نا عزم ءِ بے سہب کرے بلکن مچ آ دنیا نا مون آ دا حقیقت ءِ آشکار کرے کہ پاکستان تینا دفاع ، وتواجہی و علاقائی سالمیت نا دفاع غان ہچ ءُ قیمت اسے آ پدی مفک۔ وزیراعظم پارے کہ اسہ پرامن اوغانستان  علاقائی رابطہ، شونداری و شونہالی نا کنجی ءِ۔ بدبختی اٹ ہموڑے امن نا دوئی کننگ کیہی دہائی آن بے سہب مسنے ولے پاکستان وخت اس ہم اومیت ءِ اِلیتنے۔ نن پرامن ہمسائیگی آ یخین تخنہ و دامسخت کن پدریسہ کوشست کننگ اُن۔ اوپارے کہ دا بے کچ بدبختی ءِ کہ عسکریت پسند گروہ نئے بیرہ اوغانستان نا تہہ ٹی بلکن سیم آن ایپار ہم امن ءِ خطرہ ٹی شاغانے۔ تدوک آ تُو ہراتم ننا سیمی چوکی تیا اوغانستان نا کنڈآن جلہو کننگا تو ننا ورندی دوٹوک و فیصلہ کن ئس۔ نن او زموار آتے ناقابل فراموش سبخ تسن ہرافک پاکستان آ جلہو کننگ نا جسارت کریر۔ وزیراعظم دارداٹ ایلم ملک خاص کر ترکیہ و قطر انا کوشست آتا ستاءِ کرے ہرافک پاکستان و اوغان طالبان تا نیام اٹ مذاکرات اٹی کمکاری کریر۔ اوپارے کہ اوغانستان ءِ سمجھوئی مریک کہ دیرپاامن ہمووخت آ ممکن ءِ ہراتم ٹی ٹی پی و ایلو گروپ آتے کنٹرول کننگے ہرا اوغان گل زمین آن کارروائی کننگ ءُ۔ اوپارے کہ پاکستان دارداٹ عملی گام گیج کننگ کن تیار ءِ، بشرطیکہ اوغان عبوری حکومت ہم ننا روا گڑتی تا ایسری کن پبی و بامعنی گام گیج کے۔ وزیراعظم پارے کہ پاکستان مدام مظلوم تا حق اٹی توار بڑز کرینے خواہ او غزہ نا باندات مرے یا بھارتی غیرکانودی کوزہ نا گواچی جموں وکشمیر نا مظلوم الس یا ہمو غٹ قومک ہرافتے اینو ہم بنداوی حق و آجوئی تیان محروم تخنگانے۔ اوپارے کہ ننا آخبت وابستگی امن وسلامتی نا مون آ دننگ تون ءِ، چائے او اقوام متحدہ مرے، اوآئی سی، ای سی او، ایس سی او یا ایلو اہم جہانی پلیٹ فارم۔ اوپارے کہ دنیا ٹی جھیڑہ غاتا خاخر نیزگاری، بے بریبری و ناانصافی آن لگک، محرومی نزوری ءِ ودی کیک۔ اونزوری و جھیڑہ غاتون مون تننگ کن شونداری نا گام گیج آتا گرج آ زور شاغسا پارے کہ پاکستان اٹ ننا حکومت جوان اصلاحات نا بناءِ کرینے ہرافتا مسخت غٹ انا شمولیت آن شونداری نا کسر آ ہِننگ ، ادارہ جاتی سوگوی و ورناو زالبول آتے واکدار کننگ ءِ۔ اوپارے کہ چنکا و درمیانہ درجہ نا کاروبار زرگزران نا مخ انا ملی ءِ، ہنداسوب آن نن ایس ایم ای فنانسنگ ءِ ودفنگ اُن تانکہ روزگار ودی مرے، جدت برے و زرگزرانی وسیع البنداو شمولیت ممکن مرے۔ اوبشخ ہلوک آتے پارے کہ حکومت زالبول آتے ڈیجیٹل مہارت فراوان کننگ آ چکار کننگ ءِ، مالی وسیلہ غاتسکان اوفتا رسینگ ءِ آسان جوڑ کننگ انگ ءِ، و سرکڑدہ ئی نا وارخواہی تننگ انگ ءِ تانکہ او تینا پورو لائخی اتون پاکستان نا زرگزرانی و راجی بدلی ٹی بشخ شاغنگ کرے۔ وزیراعظم پارے کہ جہانی پڑآ پاکستان جہانی مالیاتی ادارہ و شونداری شریدار آتون اواری اٹ مالیاتی اصلاحات، کلائمیٹ ریزیلیئنس و زرکاری نا مون آ دننگ کن سرگرم ءِ ہرا اسہ سوگو  وشونہال آخبت اسے کن المی ءِ۔ ننا ایمان ءِ کہ اسہ قوم اس ہم تنیا شون ہلنگ کپک۔ ننا تقدیر اسہ ایلو تون گنڈوک ءِ۔ وزیراعظم پارلیمان ءِ الس نا است خواہی تا امین گوندساپارے کہ الس نا گچین نمائندہ غاک دا قومی و جہانی سفر اٹی بے کچ اہم کڑد تخرہ۔ نن تینا الس نا مقدس امانت نا نگہبان اُن و ننے اوفتا اومیت آتیا پورو سلوئی ءِ۔ تینا مچ آ اہلیت و نیک نیتی اتون تینا قوم انا اجتماعی گچینی کن کاریم کروئی مریک۔ اودااومیت نا درشانی ءِ کرے کہ کانفرنس اٹی مروک آ بامسخت گپ وتران پوسکن ءُ کسر نشان ایتک و اسیجائی کوشست آتے مون آ دننگ اٹ کمک ایتک۔ اوداہیت آ زور شاغا کہ غٹ قوم تا الس امن نامون آ دننگ ، پائیدار شونداری نا دوئی کننگ و اجتماعی سلامتی نا سوگوی کن یکجا مریر تانکہ نن دائمی امن و اسیجائی شونہال آخبت اس جوڑ کننگ کین۔