بنجائی وزیر جام کمال خان، رانا تنویر حسین، خصوصی کمکار ہارون اخترخان و وزیر مملکت خزانہ و ریلوائی بلال اظہرکیانی نا نیام اٹ اوڑدہی

اسلام آباد۔ 11 نومبر (اے پی پی) بنجائی وزیر واپار جام کمال خان، بنجائی وزیر قومی غذائی رکھ رانا تنویرحسین، وزیراعظم نا خصوصی کمکار ہارون اخترخان و وزیرمملکت خزانہ و ریلوائی بلال اظہرکیانی نا اوڑدہی مس۔ سے شنبے نادے آ وزارت صنعت وپیدوار نا کنڈآن جاری بیان نا رداٹ اوڑدہی ٹی وزیراعظم شہباز شریف و ملک انا ٹاپ 20 کمپنی تا سی ای او تا وزیراعظم محمد شہباز شریف تون سلاہ ئی اوڑدہی آ سرجمی اٹ سجفنگا۔ بشخ ہلوک آک سی ای اوتے وزیراعظم تون اوڑدہی نا سلہ خلنگ نا امر آ سلابت کریر وپاکستان اٹ زرکاری نا مون آ دننگ کن پبی گام گیج آتیا گپ وتران کریر۔ وزیراعظم نا خصوصی کمکار ہارون اختر خان پارے کہ پاکستان دنیا کن سٹریٹجک وڑاٹ بے کچ اہم ءُ ملک اسے، ہراٹی زرکاری نا گیشتر وارخواہی ارے۔ اوپارے کہ سی ای او تا وزیراعظم تون اوڑدہی ملکی زرگزران کن گیم چینجر اس جوڑمریک۔ ہارون اخترخان مستی پارے کہ غٹ سفیر آتون اوڑدہی پاکستان نا مثبت تاثر ءِ تالان کننگ نا کوشست آتا بشخ ءِ، وخت اس کہ حکومت نا زرکاری دوست پالیسی تا مثبت نتیجہ مون آبننگ ءِ۔ بنجائی وزیرواپار جام کمال خان پارے کہ واپار نامون آ دننگ کن پالیسی تے پوسکن آ خواست آتون ہم گرنچ کننگ انگ ءِ و حکومت نجی بشخ ءِ سوگو شریدار نا وڑاٹ ہرک۔ بنجائی وزیر قومی غذائی رکھ رانا تنویرحسین داوخت آپارے کہ کشاری پیدوار ءِ ودفنگ کن پوسکن آ ٹیکنالوجی ءِ تینا کننگ وخت انا اہم گرج ءِ۔ وزیر مملکت خزانہ و ریلوائی بلال اظہرکیانی پارے کہ زرکاری نا بشخ اٹی سوگوی آن روزگار نا پوسکن ءُ وارخواہی ودی مریک، ہراڑآن زرگزران پین سوگو مریک۔ بشخ ہلوک آک داہیت آ امنا کریر کہ پاکستان نا اسٹریٹجک اہمیت ءِ جہانی کہول آ پین تالان کننگک تانکہ زرکاری نا درگہ بھلن مرے و ملکی زرگزران ءِ پین سوگو بنداوتیا استوار کننگ مرے۔