چیئرمین سینیٹ سید یوسف رضاگیلانی نا سینیٹر عرفان صدیقی نا کزیت آ غم انا درشانی

اسلام آباد۔ 11 نومبر (اے پی پی) چیئرمین سینیٹ سید یوسف رضاگیلانی پاکستان مسلم لیگ (ن) نا سینیٹ اٹی پارلیمانی لیڈر، پنی آ دانشور، سینئر صحافی و پنی آکانود ساز سینیٹر عرفان صدیقی نا کزیت آ ڈکھیائی و است ہسونی نا درشانی ءِ کرینے۔ سے شنبے نادے آسینیٹ سیکرٹریٹ آن جاری بیان نا رداٹ چیئرمین سینیٹ تینا ہڑزخواہی کلہو اٹی ایماندار سینیٹر عرفان صدیقی نا قومی خذمت، علمی و ادبی لائخی و پارلیمانی کڑد ءِ زبردست لوز آتیٹی خراج عقیدت پیش کرساپارینے کہ عرفان صدیقی اسہ سنجیدہ، باوقار و اصول پسند پارلیمنٹرین اس ئس ہرا مدام قومی مفاد، جمہوریت نا سوگوی و السی آسودہی کن تینا توار ءِ بڑز تخا۔ اوپارے کہ ایماندار نئے بیرہ اسہ دانشور و کہنہ مشق قلم کار اس  ئس بلکن سینیٹ اٹی تینا متوازن سلاہ،شائستہ لہجہ و قومی باندات آتیا بصیرت نا سوب غٹ باسک آتا نیام اٹ شرف و پت انا چیدہ جوڑ مرسا کرے۔ چیئرمین سینیٹ نا رداٹ، سینیٹر عرفان صدیقی مسلم لیگ (ن) نا پارلیمانی لیڈر نا حیثیت اٹ مدام اسہ بردبار، بے کنڈ ہلوک و اصول کڑد اس ادا کرے، ہرا پارلیمانی روایت آتیکن کسر نا ڈیوا سلک۔ سید یوسف رضاگیلانی پارے کہ عرفان صدیقی ایماندار نا ادبی، تعلیمی و راجی خذمت ملک انا فکری و علمی سرمایہ نا بشخ ءِ، ہرافتے مدام یات تخنگک۔ اونا شخصیت اٹی وقار، علم و انکساری نا امتزاج ئس، ہرااودے اہل قل و ایوان ہڑتوم آتیٹی پنی ءُ ہند اس تس۔ چیئرمین سینیٹ ایماندار نا خاہوت تون ہمدردی و ہڑزخواہی نا درشانی ءِ کرسا دعاکرے کہ اللہ تعالیٰ سینیٹر عرفان صدیقی ایماندار ءِ جنت الفردوس اٹی بڑزکو ہند ا س عطاکے و اونا پدسلوک آتے دا صدمہ ءِ صبر وحوصلہ اٹ سگنگ نا توفیق ایتے۔