اوغانستان اٹی پوسکن آ سلہہ و گولہ بارود آتا ساڑی گری ہمسایہ ملک  آتیکن براہ راست خطرہ اسے، پاکستان

اقوام متحدہ۔ 11 نومبر (اے پی پی) اقوام متحدہ ٹی پاکستان اوغانستان اٹی پوسکن آ سلہہ و گولہ بارود آتا ساڑی گری آ گڑتی نا درشانی ءِ کرسا پارینے کہ دا ہمسایہ ملک آتیکن براہ راست خطرہ اسے۔ اقوام متحدہ نا سلامتی کونسل آن تران کرسا پاکستان نا آخبتی مندوب عاصم منیر افتخار پارینے کہ ننتون ہندن ءُ پک حوال ارے ہرا سلہہ غاتے دہشت گردی نا کارروائی تیکن ہمسایہ ملک آتیٹی اسمگل کننگ نا بابت ءُ۔ اونا مستی پاننگ ئس کہ پاکستان و اوغانستان نا سیم آ ضبط کروک آ سلہہ غاتا سرا درملکی فوج آتا کنڈآن ہلنگا و اوغانستان نا بلیک مارکیٹ آتیٹی بہامروک آ سلہہ غاتون ملک۔ اوپارے کہ جہانی بارڈر نا پار غیر رجسٹرڈ سلہہ غاتا ات و در علاقائی سلامتی کن خطرہ اسے انتئے کہ داڑآن ہمو غیرریاستی سلہہ گروپ، دہشت گرد نیٹ ورک و کسبی ڈوہدار ٹولی تا کمک مریک ہرا علاقائی سلامتی و سوگوی ءِ نسخان تننگ خوارہ۔ اومستی پارے کہ ننے اوغانستان اٹی ہلوک آ سلہہ غاتا ساڑی گری و دہشت گرد ٹولی تا کنڈآن اوفتا دوئی کننگ نا کوشست آتیا ہم بھاز گڑتی ءِ و داپاکستان و ڈیہہ اکن سنگین ءُ خطرہ اس جوڑ مسنے۔ اوپارے کہ دہشت گرد تنظیمک  بشمول داعش خراسان، اقوام متحدہ نا دہشت گرد آتا لڑ اٹی اوار ٹی ٹی پی فتنۃ الخوارج ، بی ایل اے و مجید بریگیڈ اوغانستان آن کاریم کیرہ، دا ڈیہہ اٹی نزوری ودی کروک آ اہم زموار آتا پیشن نا مالی کمک و مخ تفی کاریم کننگ ءِ و دا سلہہ غاتے کانود نافذ کروک آ ادارہ غاتا کارندہ و پاکستانی شاری تا برخلاف کاریم اٹ ایسُر ہراڑآن ہزار آتا کچ اٹی کودک انسانی جونک ہنار۔ اوزور شاغا کہ دہشت گرد گروہ تسکان غیرکانودی سلہہ غاتا رسینگ ءِ توننگ کن جہانی وڑاٹ کوشست کننگے و داہیت ءِ پک کننگے کہ اوغانستان نا کمامدارآک دا رداٹ تینا جہانی زموار و قول آتا پاسداری ءِ کیر۔ اوپارے کہ جہانی برادری ءِ جہانی و علاقائی امن وسلامتی ءِ مون تروک داوڑنا خطرہ غاتون گچین وڑاٹ مون تننگ کن تینا کوشست آتے ترند کننگ نا گرج ءِ۔