قائم مقام امریکی سفیر نیٹلی بیکر ءَ راجدپتری گولڑہ  ریلوے اسٹیشن ءُ ریلوے میوزیم ءِ ھاسیں تر ءُ تاب کتگ ءُ ریلوے ءِ وفاقی وزیر حنیف عباسی ءِ اصلاحات ءِ وژن ءِ توسیپ

اسلام آباد۔9نومبر  (اے پی پی): پاکستان ءَ امریکی قائم مقام سفیر نیٹلی بیکر ءَ یک شمبے ءِ روچ ءَ راجدپتری گلرا ریلوے اسٹیشن ءُ ریلوے میوزیم ءِ ھاسیں تر ءُ تاب کت۔ ریلوے ءِ وفاقی وزیر محمد حنیف عباسی ءَ شرپداریں مہمان ءَ را اسٹیشن ءُ میوزیم ءِ دود ءُ ربیدگ ءُ راجدپتری ارزشت ءُ انوگیں اپ گریڈیشن ءِ بابت ءَ سرپد کت۔ تر ءُ تاب ءِ ساھت ءَ وفاقی وزیر ءَ امریکی سفیر نیٹلی بیکر ءَ را گولرا اسٹیشن، قائد اعظم سیلون ءُ ہیریٹیج میوزیم ءِ سرجمیں تر ءُ تاب دات کہ اودا 19 ءُ 20می کرن ءِ کوھنیں لوکوموٹو، بوگی ءُ ریلوے ءِ سامان آنی نمائش کنگ بوتگ۔ امریکی جوڑ کتگیں ریلوے مشینری ءُ ساماناں خاص امریکی سفیر ءِ دلگوش گپتگ۔ وفاقی وزیر حنیف عباسی ءَ سفیر ءَ را پاکستان ریلوے ءِ تہ برجاھیں اصلاحات ءُ نوک کنگ ءِ گامگیج آنی بابت ءَ ھم سرپد کت۔ آئی ءَ گوشت کہ لاہور، راولپنڈی، کراچی ءُ فیصل آباد ءِ مزنیں ریلوے اسٹیشن آناں میاں اوستمانی معیار ءِ رد ءَ اپ گریڈ ءُ ڈیجیٹل کنگ بوتگ، وھدیکہ راولپنڈی ءَ پاکستان ءِ اولی ’’سیف اینڈ سمارٹ ریلوے اسٹیشن‘‘ جوڑ کنگ بوتگ۔ امریکی سفیر ءَ وفاقی وزیر ءِ اصلاحاتی وژن ءِ توسیپ کنان ءَ حنیف عباسی ءَ را یک راستیں ’’ریلوے اصلاح پسند‘‘ لیک اِتگ کہ آ ادارگ ءَ را نوکیں لیکہانی سر ءَ جوڑ کنگ ءَ اِنت۔ ریلوے ءِ ارزشت ءِ سر ءَ زور پر دیان ءَ وفاقی وزیر ءَ گوشت کہ پاکستان ریلوے نہ ایوک ءَ یک ھاسیں راجی اثاثہ اِنت بلکینگ ءَ ملک ءِ دود ءُ ربیدگی ورثہ ءُ میاں اوستمانی رابطہ ءِ علامت اِنت۔ گولرا ریلوے اسٹیشن ءِ زیبائی، ایمنی ءُ تاریخی دلکشی ءَ امریکی سفیر ءِ سرا گہتریں تاثر یلہ داتگ ءُ آئی ءَ ایشی ءِ تاریخی حیثیت ءُ زیبائی ءِ سک باز ستا کرتگ۔