وزیراعظم شہباز شریف نا کیش لیس زرگزران نا بابت گام گیج آتیا است جمی نا درشان، وضع کروک ہدف آتے معینہ مد اٹی دوئی کننگ ناپارت

اسلام آباد۔ 10 نومبر (اے پی پی) وزیراعظم محمد شہباز شریف کیش لیس زرگزران نا بابت گام گیج آتیا است جمی نا درشانی ءِ کرسا وضع کروک ہدف آتے معینہ مد اٹی دوئی کننگ نا پارت کرینے۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی کیش لیس زرگزران نا بابت برجا گام گیج آتیاجاچ دیوان اس اڈ ہلک۔ دیوان اٹی بنجائی وزیر احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، وزیر مملکت بلال اظہر کیانی، گورنر اسٹیٹ بینک جمیل احمد، چیئرمین نادرا لیفٹیننٹ جنرل محمد منیر افسر، چیئرمین ایف بی آر راشد محمود لنگڑیال و تعلقدار بڑزکو کمامدارآک بشخ ہلکر۔ وزیراعظم دیوان آن تران کرساپارےکہ زرگزران ءِ کیش لیس کننگ کن برجا گام گیج آتا ملکی زرگزران نا پائیدار شونداری ٹی اہم کڑد مریک۔ اوپارت کرے کہ پورو وڑاٹ کیش لیس زرگزران و غیررسمی زرگزران نا چٹفنگ کن خلقی علاقہ غاتیٹی آگاہی ءِ ودفنگے، مچ آ دنیا ڈیجیٹل زرگزران نا کنڈآ ترندی اٹ ہِننگ ءِ، پاکستان ءِ دنیا تون گام ملفسا چلینگوئی مریک، اولیکو دے آن پاکستان ءِ ڈیجیٹل نیشن جوڑ کننگ کن گام گیج آتے اولیت تس ہرانا مثبت نتیجہ مون آ بننگ ءِ۔ وزیراعظم پارے کہ روچہ مبارک اٹی ملکی تاریخ اٹی اولیکو وار حقدار آتے بینظیر انکم سپورٹ پروگرام نا زر ڈیجیٹل والٹس نا کمک اٹ گدریفنگا، کیش لیس زرگزران نا کمک اٹ گورننس نا گچینی و کرپشن اٹی خاطر خواہ کمتی بریک۔ وزیراعظم پارت کرے کہ کیش لیس زرگزران نا وضع کروک ہدف آتا معینہ مد اٹی دوئی کننگ ءِ پک کننگے۔ اوساڑی آ پیش رفت ءِ است جم گوندا و وزارت خزانہ ، وزارت انفارمیشن  ٹیکنالوجی، ایف بی آر، اسٹیٹ بینک و تعلقدار ادارہ غاتاکاریم نا ستاءِ کرے۔ دیوان ءِ وزیراعظم نا کیش لیس زرگزران نا وژن نا رداٹ حکومتی گام گیج آتیا پیش رفت آن معلومدار کرسا پاننگاکہ بجلی و گیس انا بل آتیا راست  کیو آرکوڈز انا کمک اٹ ادائیگی ءِ کیش لیس کننگ انگ ءِ ہرانا سوب ارب آ روپئی نا بل آتا ادائیگی داسہ ڈیجیٹل نظام نا کمک اٹ ممکن مسنے۔ وزیراعظم ءِ بینظیر انکم سپورٹ پروگرام نا رداٹ اسہ کروڑ ڈیجیٹل والٹس آ پیش رفت آن ہم معلومدار کننگا۔ دیوان ءِ پاننگاکہ والٹس برجاتُو انا ایسر اسکان پورو وڑاٹ فعال مریک و حقدار آتے زر آتا بروک آ قسط ہندانا کمک اٹ گدریفنگک۔ داکان بیدس اسلام آباد اٹی سرکاری سروسز نا دوئی کننگ کن جوڑ موبائل ایپلی کیشن ءِ راست اتون گنڈنگانے و ادائیگی اونا کمک اٹ کننگ انگ ءِ۔ اسلام آباد اٹی پوسکن آکاروبار ملنگ کن لیسن تے ڈیجیٹل ادائیگی تا نظام تون مشروط کننگانے و ساڑی آ غٹ دوکان تیا راست کیو آر کوڈ انا کمک اٹ ادائیگی تا آسراتی فراوان کننگانے، ملک اٹی ڈیجیٹل بینک آتا قیام کن لیسن جاری کننگ انگ ءِ۔ دیوان ءِ پاننگاکہ دا گام گیج آتیان داتم اسکان ملک انا 68 درسد آبادی نا فنانشل انکلوژن کننگانے وخت اس کہ بروک آ سال داٹی پین ودکی کننگک۔ وزیراعظم پارت کرے کہ مالی شمولیت نا کاریم نا دنگ ءِ پین ودفنگے۔ دیوان ءِ بروک آ سال انا ہدف آتا بابت ہم حوال تننگا۔ وزیراعظم کیش لیس زرگزران نا بابت گا م گیج آتا پیش رفت آ است جمی نا درشانی ءِ کرسا وضع کروک ہدف آتے معینہ مد اٹی پورو کننگ نا پارت کرے۔