بین الپارلیمانی اسپیکرز کانفرنس اٹی بشخ ہلنگ کن درملکی ڈل آتا اسلام آباد بننگ، بڑزکو کمامدارآک اوفتے بخیرکریر

اسلام آباد۔ 10 نومبر (اے پی پی) بین الپارلیمانی اسپیکرز کانفرنس اٹی بشخ ہلنگ کن چندی ملک آتا پارلیمانی ڈل آک دوشنبے نادے آ اسلام آباد آ سرمسر ہرافتے بالی پٹ آ بڑزکوکمامدارآک بخیرکریر۔سینیٹ سیکرٹریٹ آن جاری بیان نا رداٹ مراکش آن بروک آ ڈل انا کماشی ءِ اسپیکر ہاؤس آف کونسلرز مراکش محمد ولد الرشید کرے۔ ڈل انا بالی پٹ آ بننگ آ سینیٹ نا بڑزکو کمامدارآک اوفتے جم وجوش اٹ بخیرکریر۔ ہنداوڑ روانڈانا ڈل انا کماشی ءِ صدر سینیٹ فرانکیوس ژیویر کرے، مالدیپ نا پارلیمان نا اسپیکر عبدالرحیم عبداللہ، ملائیشیا نا ایوان بالا نا نائب صدر نور جزلان بن محمد و فلپائن نا پارلیمانی ڈل انا بڑزکوکمامدار و کمکار عملہ ہم سرمسر۔ سینیٹر سرمد علی چندی مکل آتیان بروک آ شرفمند آ مہمان تے بخیر کرساپارے کہ داکانفرنس جہانی پارلیمانی برادری نا نیام اٹ تعلقداری تے پین سوگو کننگ و کمکاری ءِ مون آ دننگ اٹ مزل نا نشان مریک۔ سعودی عرب نا ڈل انا کمکار عملہ نا بننگ تون کانفرنس نا تیاری تے پورو کننگانے۔ بین الپارلیمانی اسپیکرز کانفرنس 11 آن 12 نومبر 2025ء اسلام آباد اٹی اڈ ہلیک۔ داکانفرنس چیئرمین سینیٹ  سید یوسف رضاگیلانی نا دوراندیش کماشی و جہانی پارلیمانی رابطہ غاتا مون آ دننگ نا وژن نا عکاسی ءِ کیک۔ کانفرنس نا مسخت جہانی امن ، کمکاری و جمہوری قدر انا مون آ دننگ کن چندی ملک آتا پارلیمانی راہشون تے اسہ پلیٹ فارم اسے آ جمع کننگ ءِ۔