بین الپارلیمانی اسپیکرز کانفرنس اٹی بشخ ہلنگ کن آذربائیجان آن ڈل ڈپٹی اسپیکر ملی مجلس آذربائیجان علی احمد یوف نا کماشی ٹی اسلام آباد آ سرمس

اسلام آباد۔ 10 نومبر (اے پی پی) بین الپارلیمانی اسپیکرز کانفرنس اٹی بشخ ہلنگ کن آذربائیجان آن ڈل ڈپٹی اسپیکر ملی مجلس آذربائیجان علی احمد یوف نا کماشی ٹی اسلام آباد آ سرمس۔ دوشنبےنادے آ سینیٹ سیکرٹریٹ آن جاری بیان نا رداٹ بین الپارلیمانی اسپیکرز کانفرنس چیئرمین سینیٹ سید یوسف رضاگیلانی نا قائدانہ لائخی تا درشانیءِ۔ کانفرنس اٹی بشخ ہلنگ کن ازبکستان نا ڈل ڈپٹی چیئرمین سینیٹ مجلس اعلیٰ ازبکستان صودق سیفووف نا کماشی ٹی اسلام آباد بالی پٹ آ سرمس۔ کیمرون نا پارلیمان نا باسک کماسے سائمن پوونا کماشی ٹی ڈل بین الپارلیمانی اسپیکرز کانفرنس اٹی بشخ ہلنگ کن اسلام آباد بالی پٹ آ سرمس۔ گوائٹے مالا نا مسکوہی صدر جمی مورالیس بین الپارلیمانی اسپیکرز کانفرنس اٹی بشخ ہلنگ کن اسلام آباد بالی پٹ آ سرمس۔ سینیٹ آف پاکستان نا سینئر ڈائریکٹر جنرل طارق بن وحید ڈل ءِ جم وجوش اٹ بخیرکرے۔ بڑزکو کمامدار و کمکار عملی ڈل اتون اوار ءِ۔ ڈل آتا بیابخیری کن سینیٹ نا بڑزکوکمامدار آک بالی پٹ آ ساڑیءُ۔ داکانفرنس چیئرمین سینیٹ سید یوسف رضاگیلانی  نا دوراندیش کماشی نا درشانی ءِ۔ کانفرنس 11 آن 12 نومبر 2025ء اسکان اسلام آباد اٹی برجاسلک۔ بین الپارلیمانی اسپیکرز کانفرنس جہانی امن و کمکاری تین پہ تینی نا مون آ دننگ اہم مزل نا نشان مریک۔ چندی ملک آتا پارلیمانی ڈل آتا نیام اٹ  تعلقداریتے سوگو تر جوڑ کیک۔