بین پارلیمانی اسپیکر کانفرنس ءِ تہا بہر زورگ ءِ ھاتر ءَ ڈل اسلام آباد ءَ سر بوتگ

اسلام آباد۔9نومبر  (اے پی پی):مراکش، صومالیہ، کانگو ءُ گوانانا ءِ پارلیمانی ڈل ءُ یونیورسل پیس فیڈریشن ءِ صدر ڈاکٹر تاج الدین ابراہیم حمد اسلام آباد ءَ سر بوتگ انت کہ آ سینیٹ ءِ سروکی ءَ برجم دارگ بوھوکیں بین پارلیمانی اسپیکر کانفرنس ءَ بہر زور انت۔ ادا جاڑی بوتگیں بیان ءِ رد ءَ دو روچی کانفرنس ءِ مول ءُ مراد 11ءَ چہ 12نومبر 2025ءَ برجم دارگ بوھگ ءَ اِنت ایشی ءِ مول ءُ مراد جھان ءِ امن ءِ دیمروئی، کمک ءَ را مھکم کنگ ءُ بھر زوروکیں ملک آنی نیام ءَ پارلیمانی سیادی آناں گیش کنگ اِنت۔ اقوام متحدہ ءِ اقتصادی ءُ چاگردی کونسل (یونیسکو) ءَ گوں سیادی داروکیں گل یونیورسل پیس فیڈریشن ءِ نمائندگی کنوکیں ڈاکٹر تاج الدین ابراہیم حمد ءَ را اسلام آباد ءِ میاں اوستمانی بالی پٹ ءَ سینیٹ ءِ سیکرٹریٹ ءِ مزنیں کارندہ آں گوں جوش ءُ جزبگ ءَ وش اتک کت۔ ایوان الس ءِ اولی نائب صدر صدیہ یاسین سومالیہ ءَ چہ وتی ڈل ءِ گوما سر بوتگ۔ کانگو ءِ پارلیمنٹ ءِ باسک پروسپر کاسونگو لوکالی ٹنڈا ءُ گوانانا ءِ راجی امن ءِ گامگیج ءِ ڈائریکٹر ابراج نارائن ھم اے دیوان ءَ بھر زوری کنگ ءِ ھاترا اسلام آباد ءَ سر بوتگ اَنت۔ مراکش ءِ ڈل ءِ تہ ءَ ایوان ءِ کونسلر ءِ اسپیکر ھوار ات ءُ آئی ءِ کارندہ ھم ھوار اتنت کہ ایشی ءِ تہ ءَ اسپیکر ءِ ایگزیکٹو ڈائریکٹر، مزنیں اھوالکار، جارکش ءُ دگہ کارندہ ھوار اتنت۔ سینیٹر فیصل سلیم رحمان ءَ سینیٹ سیکرٹریٹ ءِ مزنیں افسر آنی گوما بالی پٹ ءَ سرجمیں تر ءُ تاب کنوکیں ڈل آناں جوش ءُ جزبگ ءِ گوما وش اتک کت۔ بین پارلیمانی اسپیکر کانفرنس گپ ءُ تران ءُ مشترکہ جمہوری اصول آنی وسیلگ ءَ جھان ءِ مفاہمت، امن ءُ پارلیمانی کمک ءِ دیمروئی ءِ نیمگ ءَ مزنیں گامگیج اِنت۔