پاکستان ءِ حکومت اقبال ءِ فکر ءَ را راجی ءُ میاں اوستمانی تک ءَ دیم ءَ برگ ءِ ھاتر ءَ جامع ءُ عملی گامگیج زورگ ءَ انت، اورنگزیب خان کھچی

اسلام آباد۔9نومبر  (اے پی پی):راجی ورثہ ءُ دود ءُ ربیدگ ءِ وزیر اورنگزیب خان کھیچی ءَ گوشت کہ حکومت اقبال ءِ فکر ءَ را راجی ءُ میاں اوستمانی تک ءَ دیم ءَ برگ ءِ واستہ جامع ءُ عملی گامگیج زورگ ءَ انت۔ مشرق ءِ شاعر ڈاکٹر علامہ محمد اقبال ءِ پیدائش ءِ درگت ءَ وتی پیغام ءِ تہا آئی ءَ گشتگ کہ مرچیگیں جہانی چیلنجانی گیواری ایوک ءَ اقبال ءِ فکر ءِ تہا انت کہ آ انسانیت، وت، فکر ءِ آجوئی ءُ جہانی براتی ءِ پیغام ءَ دنت۔ وفاقی وزیر ءَ گوشت کہ حکومت ءَ علامہ اقبال ءِ 150 سالی سالروچ ءِ درگت ءَ مزنیں مراگش ءِ برجم دارگ ءِ واستہ ’’150 سالی کمیٹی‘‘ جوڑ کتگ کہ ایشی ءِ تہ ءَ سرکاری کارندہ، اقبال ءِ زانتکار، وانگ ءُ زانگ ءِ کارندہ ءُ پٹ ءُ پولکار ھوار اَنت۔ اے درگت ءَ اقبال اکیڈمی پاکستان مرکزی کرد پیلو کنگ ءَ اِنت، کہ آ چاریں صوبگ آزاد کشمیر ءُ گلگت بلتستان ءَ اقبال سنٹر جوڑ کنگ ءَ کمک کنت۔ اولی بھر ءَ سیالکوٹ ءَ ”اقبال پٹ ءُ پولی ءُ دود ءُ ربیدگ ءِ کمپلیکس“ ءِ بندات کنگ بوتگ کہ پٹ ءُ پول، تربیت ءُ علمی تبادلہ ءِ مرکز جوڑ بیت۔ اورنگزیب خان کھچی ءَ گوشت کہ اقبال اکیڈمی پاکستان علامہ اقبال ءِ لبز آناں میاں اوستمانی زبان آنی تہ ءَ رجانک کنگ ءِ منصوبگ ءِ سر ءَ عمل کنگ ءَ انت۔ پدا اقبال ءِ کتابانی پرتگالی رجانک 13 نومبر ءَ پاکستان اکیڈمی آف لیٹرز ءَ پیش کنگ بنت کہ ایشی ءِ تہا برازیل ءُ پرتگال ءِ سفیر ہم بہر زور اَنت۔ آئی ءَ گوشت کہ وتی دود ءُ ربیدگ ءِ دود ءُ ربیدگ ءِ رکھینگ ایشی ءِ تہ ءَ علامہ اقبال ءِ پکر ءُ آیوکیں نسل آنی تہ ءَ سر کنگ وزارت دود ءُ ربیدگ ءِ اولی ترجی انت۔ آئی ءَ گوشت کہ اقبال اکیڈمی ءُ ایندگہ ادارگ آنی کمک ءَ ما علامہ اقبال ءِ پکر آناں اردو زبان ءَ یکجاہ کنگ ءُ چاپ کنگ ءِ وسیلگ ءَ شنگ ءُ تالان کن ایں تانکہ اقبال ءِ وت واجہی ءُ راج جوڑی ءِ کلوہ ءَ چہ نوکیں پدریچ رژناہ بہ بیت۔ وفاقی وزیر ءَ گیش گوشت کہ حکومت علامہ اقبال ءِ پکر ءَ را راجی وانگ ءُزانگ ءِ نظام ءُ پالیسی ءِ تہ ءَ ہوار کنت تانکہ ورنائیں نسل اقبال ءِ وت مہ وتی، ایمان، عمل ءُ آجوئی ءِ پکر ءِ رھشونی ءَ بہ کنت۔ آئی ءَ گوشت کہ ازم، لبزانک ءُ دود ءُ ربیدگی چست ءُ ایر آنی وسیلگ ءَ علامہ اقبال ءِ وت واجھی، آجوئی ءُ وت واجھی ءِ سکین آنی رژن ءَ ورنا آناں متحرک کنگ بیت۔ اے موہ ءِ سر ءَ وزیر ءَ گوشت کہ مئے مشن راجدپتری جاگہ، یادگار ءُ دود ءُ ربیدگی مراگش آنی بحالی ءَ چہ علامہ اقبال ءِ انقلابی جذبہ ءُ راجی یکوئی ءِ پیغام ءَ را زندگ دارگ اِنت۔ وفاقی وزیر ءَ گوشت کہ اقبال ءِ فکر ءَ را میاں اوستمانی تک ءَ پدر کنگ ءِ واستہ یونیورسٹی، پٹ ءُ پولی ادارگ ءُ اسکالر آنی کمک ءَ اکیڈمک کانفرنس، نمائش ءُ گپ ءُ تران ءِ برجم دارگ بیت، تانکہ مشرق ءُ مغرب ءِ نیام ءَ فکری فرق کم کنگ بہ بیت ءُ پاکستان ءِ سائنسی ءُ دود ءُ ربیدگی پجار ءَ را پدر کنگ بہ بیت۔ آئی ءَ گوشت کہ اقبال ءِ وت مہ وتی ءِ فلسفہ مارا ایمان، محنت ءُ وت مہ وتی ءِ وسیلگ ءَ یک رژنائیں، شرپداریں پاکستان ءِ جوڑ کنگ ءِ کلوہ ءَ دنت۔ “ما یک راجے ءِ بستار ءَ اقبال ءِ ھیالاں وتی انفرادی ءُ اجتماعی زند ءِ بہرے جوڑ کنگی اِنت، پرچا کہ اقبال ءَ راج ءِ ورناہاں زانت، کردار ءُ عمل ءِ راہ پیش داشتگ۔” اورنگزیب خان کھچی ءَ گپ ءِ آسر ءَ گُشت کہ اقبال ءِ ھیالاں آجوئی ءِ جنبش ءَ را زند دات، اسلامی راج ءَ را وت ءَ چہ وتی سرا باور ءُ عمل ءِ نوکیں تبے دات ءُ برصغیر ءِ مسلماناں سرپدی، وت ءَ چہ وتی سرا انحصار ءُ آجوئی ءِ پیغام دات۔