ترکیہ ءُ گتر  ءِ میانجی داری ءَ استنبول ءَ پاکستان ءُ اوگانستان ءِ سیمی رند ءِ گپ ءُ تران آسر بوتگ طاہرحسین اندرابی

اسلام آباد۔9نومبر  (اے پی پی):دری کارانی کارگس ءِ جارکش طاہرحسین اندرابی ءَ گوشت کہ براتیں ملک ترکیہءُگتر  ءِ میانجی داری ءَ استنبول ءَ پاکستان ءُ اوگانستان ءِ سیمی رند ءِ گپ ءُ تران آسر بوت۔ پاکستان ءَ اے دوئیں ملک آنی دلجمیں کوشست آناں سک باز ساڑاتگ کہ آہاں ناشرکاری ءِ جیڈھ ءِ سر ءَ پاکستان ءُ اوگانستان ءِ نیام ءَ جیڈھ ءِ گیش ءُ گیوار ءِ واستہ کوشست کتگ۔ گوستگیں چار سالانی تہ ءَ اوگانستان ءَ طالبان ءِ سرکار ءِ اقتدار ءَ آیگ ءَ پد اوگانستان ءِ سرزمین ءَ چہ پاکستان ءِ سر ءَ ناشرکاری اُرشانی تہ ءَ مزنیں گیشی یے اتکگ۔ اے اُرشانی باوجود پاکستان ءَ بے دروریں صبر ءُ اوپار ءِ درشانی کتگ ءُ بدلی ءِ رد ءَ وتی دست کش بوتگ۔ پاکستان ءَ گمان بوتگ کہ طالبان ءِ سرکار وھد ءِ گوزگ ءَ گوں اے اُرشانی بند کنگ ءِ ھاترا ٹھوس گامگیج چست کنت ءُ اوگان سرزمین ءِ سر ءَ ھستیں ٹی ٹی پی ءِ عناصر ءِ ھلاپ ءَ کارروائی کنت بلے چوش نہ بوت۔ پاکستان ءَ مدام اوگانستان ءِ گوما جوانیں سیادی ءَ را گیش کنگ ءِ کوشست کتگ، ایشی ءِ تہ ءَ تجارتی ترغیب، انسانی کمک، وانگ ءُ زانگ ءُ جان سلامتی ءِ ویزہ ءِ آسراتی ءُ میاں اوستمانی فورم آنی تہ ءَ اوگانستان ءِ واستہ جوانیں کرد پیلو کنگ ھوار اِنت۔ بلے اے درستیں جھد ءِ پسو ءَ چہ طالبان سرکار ءَ ایوک ءَ پوچیں وعدہ ءُ بے عمل گندگ بوتگ۔ یک شمبے ءِ روچ ءَ دری کارانی کارگس ءِ جارکش ءَ وتی بیان ءَ گوشت کہ پاکستان ءِ بنیاتی اُمیت ایش اِنت کہ اوگان سرزمین ءَ را پاکستان ءِ ھلاپ ءَ کارمرد کنگ ءِ اجازت دیگ نہ بیت بلے طالبان ءِ سرکار ایشی ءِ سر ءَ عمل کنگ ءَ ناکام بوتگ۔ آئی ءَ گوشت کہ اکتوبر 2025ءَ پاکستان ءِ پسو آئی ءِ اے جزم ءِ درشان اِنت کہ پاکستان وتی سرزمین ءُ الس ءِ رکھینگ ءِ واستہ ھچ وڑیں سنگ ءُ سنگ ءِ سرا یلہ نہ دنت۔ آئی ءَ اے گپ پدر کت کہ ٹی ٹی پی ءُ بی ایل اے پاکستان ءِ ریاست ءُ مہلوک ءِ دژمن اَنت ءُ ہرکس ایشانی ہمراہداری ءُ کمک ءَ کنت آ پاکستان ءِ خیرخواہ بوت نہ کنت۔ آئی ءَ گوشت کہ پاکستان امن ءُ سفارتکاری ءِ منوگر اِنت ءُ مُدام اے گپ ءِ سر ءَ باور کنت کہ زور ءِ کارمرد کنگ گُڈّی رپک اِنت۔ ھمے جذبہ ءِ تہ ءَ پاکستان ءَ ترکیہ ءُ گتر  ءِ مخلصیں میانجی داری ءَ بوتگیں پاک اوگانستان ءِ گپ ءُ تران ءَ بھر زرتگ۔ آئی ءَ گوشت کہ دوحہ ءَ اولی رند ءِ گپ ءُ تران ءَ دوئیں نیمگ ءَ وت مہ وتی کمک ءِ اصول آنی سر ءَ تپاک کنگ بوتگ ءُ پاکستان ءَ پہ وھد ءِ جنگ بندی ءِ واستہ وتی رضامندی درشان کتگ۔ بلے استنبول ءَ برجم داشتگیں دومی ءُ سیمی راؤنڈ ءَ طالبان ءِ نمائندگاں عملی گامگیجاں چہ رکّ اِتگ ءُ الزام ءُ آشوب ءِ وسیلہ ءَ چاگرد ءَ ھراب کنگ ءِ جھد کتگ۔ آئی ءَ گوشت کہ پاکستان وتی بنیاتی موقف ءِ سر ءَ مھکم اِنت کہ اوگان سرزمین ءِ سر ءَ استیں ناشرکاریں عناصر آنی ھلاپ ءَ ٹھوس ءُ تصدیق ءِ لائکیں گامگیج چست کنگ بہ بنت، ءُ آھانی کار آنی سر ءَ کنٹرول کنگ ءِ واستہ یک جوانیں نگرانی ءِ نظام جوڑ کنگ بہ بیت۔ آئی ءَ گوشت کہ طالبان ءِ سرکار اوگان سرڈگار ءِ سر ءَ ھستیں ناشرکار آنی جیڈھ ءَ را انسانی جیڈھ ءِ رنگ ءَ پیش دارگ ءِ کوشست ءَ کنگ ءَ اِنت، اگاں چہ راستی ءَ اے ناشرکار 2015ءِ آپریشن زرب آزب ءَ پد اوگانستان ءَ چہ شُتگ اَنت ءُ نوں چہ اودا پاکستان ءَ اُرش آنی منصوبگ جوڑ کنگ ءَ اَنت۔ آئی ءَ گوشت کہ پاکستان ءَ باز رند ءَ طالبان ءِ سرکار ءَ چہ اے ناشرکار آنی دست ءَ دیگ ءِ لوٹ کرتگ۔بلے طالبان ءِ سرکار اے کار ءَ چہ انکار کنگ ءَ اِنت ءُ اے جیڑہ ءَ چہ توانائی ءَ گیشتر نیت جوڑ کنگ ءَ اِنت۔ آئی ءَ گوشت کہ پاکستان ھرچ ​​پاکستانی شہری ءَ را پدا زورگ ءَ تیار اِنت بشرطیکہ آ تورخم یا چمن ءِ سیمسر ءَ باقاعدہ دیم دیگ بہ بنت ءُ گوں سلاہ ءُ گولہ بارود ءَ سیمسر ءَ چہ دیم ءَ کشگ مہ بنت۔ پاکستان کدی ھم کابل ءَ بُن ھشت ایریں کجام ھم سرکار ءِ گوما گپ ءُ تران ءَ چہ چک ءُ پد نہ بیت بلے پاکستان کجام ھم ناشرکاریں گل ءَ گوں گپ ءُ تران نہ کنت، آ ٹی ٹی پی بہ بیت یا بی ایل اے۔ آئی ءَ گوشت کہ طالبان حکومت ءِ تہ ءَ لھتیں عناصر است انت کہ آ پاکستان ءِ گوما سیادی ءَ را ھراب کنگ ءِ ایجنڈا ءِ رندگیری ءَ کنگ ءَ انت، آھاں درملکی کمک ھم است انت۔ اے عناصر وتی اندری ناکامیانی دیم ءَ دارگ ءِ ھاترا پاکستان ءِ ھلاپیں بیانیہ ءِ دیمروئی ءَ کنگ ءَ اَنت۔ آئی ءَ گوشت کہ پاکستان ءَ طالبان ءِ اے پروپیگنڈا ءِ برخلاف اوگان پالیشی ءِ سر ءَ ھچ رنگ ءَ ناتپاکی نیست۔ پاکستانی راج ءُ سرجمیں ریاستی ادارہ اے گپ ءَ منّ اَنت کہ پاکستان ءِ راج ءَ ناشرکاری ءِ بار زرتگ ءُ سلاہ بندیں اُرد راج ءِ جان ءُ مال ءِ رکھینگ ءِ ھاترا قربانی دیگ ءَ اَنت۔ آئی ءَ گوشت کہ پاکستان وتی توامیں اندری جیڈھ آں چہ سرپد اِنت ءُ ایشانی گیواری ءِ واستہ سرجمی ءَ وس ءُ واک ءِ واھند اِنت ءُ اے درگت ءَ آئی ءَ باز رند ءَ طالبان ءِ سرکار ءَ گوں لوٹ کتگ کہ آ پاکستان ءِ ھلاپ ءَ ناشرکارانی کمک ءَ بند بہ کنت۔ ترجمان ءَ گوشت کہ اگست 2021 ءَ پد اوگانستان ءَ چہ پاکستان ءَ ناشرکاری ءِ واکیہ آنی تہ ءَ مزنیں گیشی بوتگ ایشی ءِ ثبوت پدر ءُ ناقابل تردید انت۔ آئی ءَ گوشت کہ طالبان حکومت ءِ لھتیں عناصر ھم پاکستان ءَ پشتون راجدپتر ءِ دیم ءَ آرگ ءِ کوشست ءَ کنگ ءَ اَنت، اگاں چہ پاکستان ءَ پشتون کمیونٹی یک متحرک ءُ بااثریں کمیونٹی یے کہ ہر پڑ ءَ سروکیں کرد پیلو کنگ ءَ اِنت۔ آئی ءَ اے گپ ءِ سر ءَ زور پر دات کہ طالبان ءِ سرکار پاکستان ءَ زبانی یا نسلی بھر ءُ بانگ ءِ جوڑ کنگ ءِ بدل ءَ وتی سرکار ءِ سر ءَ دلگوشی بہ دنت ۔ آئی ءَ گوشت کہ طالبان حکومت ناشرکاری ءَ را پاکستان ءِ تہی جیڈھ لیک ایت بلے اے گپ ءَ چہ چماں شانک دنت کہ اوگانستان ءَ انچیں عناصر است انت کہ آ پاکستان ءِ سر ءَ اُرش آنی شریعت جواز ءَ دنت ءُ پاکستان ءِ تہ ءَ کار کنوکیں ناشرکاریں گل آنی تہ ءَ مزنیں کساسے ءَ اوگان شہری ھوار انت۔ آئی ءَ گوشت کہ ناشرکاری ءِ ھلاسی ءِ واستہ پاکستان ءِ سلاہ بندیں اُرد، پارلیمنٹ ءُ الس یکجائی ءَ انت ۔ آئی ءَ گوشت کہ پاکستان دو نیمگی اختلاف آنی گیواری ءِ واستہ گپ ءُ تران ءُ سفارتکاری ءِ سر ءَ ایمان داریت، البت اوگان سرزمین ءَ چہ ناشرکاری ءِ ھلاسی اولی شرط انت۔ آئی ءَ گوشت کہ پاکستان ءِ الس ءُ پاکستان ءِ سلاہ بندیں اُرد آنی وتی ما ناشرکاری ءِ آفت ءَ چہ سرزمین ءَ را پاک کنگ ءُ ایشی ءِ حمایت کنوک، کمکار ءُ مالی کمک کنوک آنی ھلاپ ءَ مھکمیں گامگیج زورگ ءِ واستہ جزم ایں ۔