مزن وزیر شہباز شریف ءَ باکو ءَ ترکی ءِ صدر رجب طیب اردوان ءَ گوں گند ءُ نند کتگ، وت مہ وتی مفاد ءِ دمگی ءُ میاں اوستمانی جیڈھ آنی سر ءَ نزیکیں رابطہ ءِ برجاہ دارگ ءِ سر ءَ تپاک

باکو۔ 8نومبر (اے پی پی): مزن وزیر محمد شہباز شریف ءُ ترکی ءِ صدر رجب طیب اردوان ءَ جتا جتائیں پڑ آنی تہ ءَ کمک ءَ را گیش شاھیگانی دیگ ءِ وتی جزم ءِ پدا پدر کتگ ءُ وت مہ وتی سیت ءِ دمگی ءُ میاں اوستمانی جیڈھ آنی سر ءَ نزیکیں رابطہ ءِ برجاہ دارگ ءِ سر ءَ تپاک کتگ۔ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ آذربائیجان ءِ سوبمندی ءِ روچ ءِ پریڈ ءِ موہ ءَ ترکی ءِ صدر رجب طیب اردوان ءَ گوں ادا گند ءُ نند کتگ۔ گند ءُ نند ءَ فیلڈ مارشل سید عاصم منیر ہم گون ات۔ گند ءُ نند ءِ ساھت ءَ دوئیں بامرد آں پاکستان ءُ ترکی ءِ نیام ءَ دو نیمگی سیادی آنی توامیں تک ءُ پھنات آنی سر ءَ چار ءُ تپاسی کت ءُ وت مہ وتی سیت ءِ شوبگ آنی تہ ءَ کمک ءَ را گیش پراھی کنگ ءِ جزم ءِ سر ءَ پدا زور دات۔ مزن وزیر ءَ ترکی ءِ جمہوریہ روچ ءِ موہ ءَ صدر اردوان ءُ ترکی ءِ براتیں اُلس ءَ را مبارک بات دات ءُ پاکستان ءُ ترکی ءِ دوستی ءِ دراجیں ءُ زندگیں مراگش آناں ساڑات کت ایشی ءَ چہ دوئیں ملک آنی نیام ءَ گہتریں ءُ برجمیں سیادی ءِ مھکمی ءِ درشان انت۔ مزن وزیر ءَ ترکی ءِ گوما وتی دیریں براتی سیادی آناں یک سرجمیں شریکداری ءِ تہ ءَ بدل کنگ ءِ پاکستان ءِ جزم ءِ سر ءَ زور پر دات کہ ایشی ءِ تہ ءَ سیاسی، دیمپانی، اقتصادی، بیپاری، سرمایہ کاری ءُ مردم آنی نیام ءَ سیادی ھوار بہ بنت۔ اے درگت ءَ پیسلہ کنگ بوت کہ زوت ترکی ءِ وزارتی ڈل پاکستان ءِ تر ءُ تاب ءَ کنت۔ دوئیں رہشون آں وت مہ وتی مفاد ءِ دمگی ءُ میاں اوستمانی جیڈھ آنی سر ءَ نزیکیں ھمگرنچی ءَ را برجاہ دارگ ءِ سر ءَ تپاک کت ءُ دمگ ءُ گیشیں مسلمانیں دگنیا ءَ امن، مھکم ءُ وشھالی ءِ دیمروئی ءِ واستہ وتی یکجائی واھشت ءِ درشان کت۔