وفاقی وزیر کانود ءُ انصاف سینیٹر اعظم نظیر تارڑ ءَ آئین ءِ ترمیم ءِ بیست ءُ ہپتمی بل ایوان بالا ءَ پیش کتگ

اسلام آباد۔8نومبر  (اے پی پی):وفاقی وزیر ءِ کانود ءُ انصاف ءِ سینیٹر اعظم نظیر تارڑ ءَ شمبے ءِ روچ ءَ ایوان بالا ءَ 27می آئین ءِ ترمیم ءِ بل پیش کتگ۔ وزیر ءِ کانود ءَ گوشت کہ اے بل پارلیمنٹ ءِ یکجائی کمیٹی ءَ پیش کنگ بوھگ ءَ انت تانکہ بل ءِ توامیں بند آنی سر ءَ سرجمیں ءُ بامردیں گپ ءُ تران کنگ بہ بیت۔ آئی ءَ گوشت کہ حکومت اے عمل ءِ تہ ءَ ھچ وڑیں عجلت ءَ نہ اِنت، مول ءُ مراد ایوک ءَ کانود سازی ءِ تہ ءَ سرجمیں شور ءُ سلاھ ءُ تپاکی ءِ گوما دیم ءَ روگ اِنت۔ ما لوٹیں کہ بل ءِ سر ءَ راجی اسمبلی ءُ سینیٹ ءِ باسک آنی تہ ءَ ھواریں مشترکہ کمیٹی ءَ سرجمیں رنگ ءَ گپ ءُ تران کنگ بہ بیت۔ وزیر ءِ کانود ءَ گوشت کہ اے کمیٹی وتی کار ءِ ساھت ءَ سرکاری رنگ ءَ ھما باسک آناں ھم دعوت دنت تانکہ گیش ءَ چہ گیش ھیال ءُ لیکہ زورگ بہ بنت۔ سینیٹر اعظم نظیر تارڑ ءَ گیش گوشت کہ وفاقی کابینہ ءِ منظوری ءَ چہ پد آئین ءِ بیستمی ترمیم ءَ را یکجائی کمیٹی ءَ دیم دیئگ ءِ پیسلہ کنگ بوتگ۔ ما لوٹیں کہ بل ءِ ہر بند ءِ سر ءَ سرجمیں گپ ءُ تران ءَ پد گڈی رائے ءِ درشان کنگ بہ بیت۔ وزیر ءِ کانود ءَ گوشت کہ اے آئین ءِ ترمیم ءِ مسودہ اتحادی گل آں گوں سرجمیں شور ءُ سلاہ ءَ پد تیار کنگ بوتگ۔ جمہوریت ءِ منشور ءِ تہا آئینی آمید گس ءِ جوڑ کنگ ءِ بابت ءَ ہم تپاکی بوتگ ءُ نوں ایشی ءِ سرا عمل کنگ ءِ ھاتر ءَ گامگیج زورگ بوھگ ءَ انت۔ آئی ءَ گوشت کہ پیش کرتگیں ترمیم ءِ چیر دستی ءَ جج آنی بدل ءَ ھوالگ ءَ معاملہ جوڈیشل کمیشن ءِ سپرد کنگ بوھگ ءَ انت تانکہ شفاف، غیر جانبدار ءُ کارآمدیں نظام جوڑ کنگ بہ بیت۔ گوستگیں وھد ءَ اے درگت ءَ لھتیں اعتراض بوتگ کہ مزن وزیر یا صدر ءِ کرد ءَ چہ شفافیت ءَ را تاوان رسیت پمیشکا نوں اے ذمہ واری جوڈیشل کمیشن ءَ را دیگ بوھگ ءَ اِنت۔ اعظم نظیر تارڑ ءَ گوشت کہ آرٹیکل 243 ءِ چیر دستی ءَ فوجی تعیناتی آنی ھوالگ ءَ گوستگیں تجربت آں مارا سک باز سکین داتگ۔ ستراتیژیک ءُ دفاعی جیڈھ مدام دمگ ءِ ملکاں گپ ءُ تران بوتگ انت۔ انوگیں پاک ءُ ہندوستان ءِ کش ءُ گور ءَ مارا یک پدریں سبقے داتگ کہ جنگ ءِ دروشم ءُ حکمت عملی نوں سرجم ءَ بدل بوتگ۔ آئی ءَ درائینتگ کہ اے ترمیم ءِ وسیلگ ءَ آئین ءِ تہ ءَ لہتیں فوجی ءُ اعزازی عہدگ آناں ھاسیں رنگ ءَ ھوار کنگ ءِ تجویز دیگ بوتگ۔ اے رد ءَ فیلڈ مارشل، ایئر چیف ءُ نیول چیف ءِ وڑیں مزنیں اعزازی عہدہ ھوار اَنت۔ دنیا ءِ دگہ ملکاں ہم اے دود ءُ ربیدگ است کہ راجی بامرداں وتی کارکردگی ءِ سرا اعزازی یا یادگاری لقب دیگ بیت۔ آئی ءَ گوشت کہ اے داد ایوک ءَ فوجی رینک نہ انت بلکینگ ءَ راجی ازمت آنی پجارگ انت۔ اے عہدہ عزت ءُ احترام ءَ گوں ہمگرنچ انت، آہانی کمانڈ ءُ ذمہ واری قانون ءِ رد ءَ منظم کنگ بنت، ءُ اے درگت ءَ المی ترمیم پارلیمنٹ ءِ دیم ءَ ایر کنگ بنت۔ مزن وزیر نظیر تارڑ ءَ گوشت کہ آئین ءِ تہ ءَ ھرچ ترمیم ءِ واستہ دو تہائی اکثریت ءِ منظوری لوٹ ایت کہ آ دائمی بھر جوڑ بہ بیت، ءُ حکومت اے رھبند ءِ سر ءَ سرجمی ءَ عمل کنت۔ وزیر ءِ کانود ءَ گوشت کہ 27می آئین ءِ ترمیم راجی تپاکی ءَ گوں کنگ بوھگ ءَ اِنت، ایشی ءِ مول ءُ مراد انصاف ءُ کانود ءِ نظام ءَ را گیش کارآمد، منصفانہ ءُ نوکیں لوٹ آنی رد ءَ جوڑ کنگ اِنت۔ وزیر ءِ کانود ءَ گوشت کہ بلوچستان ءُ سندھ ءَ کابینہ ءِ کساس ءَ را گیش کنگ ءِ تجویز داتگ۔ اے صوبہ آنی سفارش ءِ رد ءَ کابینہ ءِ کساس ءَ را انوگیں یازدہ درسد ءَ چہ سی ءُ یک درسد ءَ گیش کنگ ءِ گپ بوتگ۔ آئی ءَ گوشت کہ آرٹیکل 243 ءِ ھوالگ ءَ ھم سرجمیں رنگ ءَ گپ ءُ تران بوتگ کہ آ راجی سلامتی ءُ دفاعی ڈھانچہ ءَ گوں سیادی دار ایت۔ آئی ءَ گوشت کہ مارا اے وڑیں اسٹریٹجک جیڈھ آنی سر ءَ سک باز احتیاطی، شرپ ءُ زمہ واری ءِ گوما گپ ءُ تران کنگی اِنت۔ گچین کاری اصلاحات ءِ ھوالگ ءَ وزیر ءِ کانود ءَ گوشت کہ ابہام ءُ بے یقینی ءِ ھلاسی ءِ واستہ سینیٹ ءِ گچین کاری یکیں وھد ءَ کنگ بنت۔ آئی ءَ گوشت کہ مطحیدہ قومی موومنٹ ءُ بلوچستان عوامی پارٹی ءَ اے درگت ءَ دو جتا جتائیں بل پیش کتگ اَنت وھدیکہ عوامی نیشنل پارٹی ءِ نیمگ ءَ ھم تجویز پیش کنگ بوتگ۔ وزیر کانود ءَ گوشت کہ اے این پی ءِ سروک ایمال ولی خان ءَ اے سوج داتگ کہ اے صوبہ ءِ نام ”پختونخوا“ ایر کنگ بہ بیت، اے سوج ءَ را بل ءِ سر ءَ گپ ءُ تران ءَ ھیال ءَ دارگ بیت۔ اعظم نظیر تارڑ ءَ گوشت کہ مئے لوٹ اِنت کہ توامیں تجویز آنی جوانیں رنگ ءَ چار ءُ تپاسی کنگ بہ بیت تانکہ ترمیم راجی تپاکی ءَ چہ منظور کنگ بہ بیت۔ مارا اے بل ءِ سر ءَ سیاست ءِ گوما نہ بلکیں آئینی استحکام ءِ جذبہ ءِ گوما دیم ءَ روگی اِنت۔