ہری پور ءَ گوگل ءِ اسمبلی لائن ءِ  جوڑیشت وش آتکیں دیمروئی اِنت، مزن وزیر شہباز شریف ءَ گوگل ءِ سرمایہ کاری ءَ را وش آتک کتگ

اسلام آباد۔7نومبر  (اے پی پی): مزن وزیر شہباز شریف ءَ گوگل ءِ سرمایہ کاری ءُ پاکستان ءَ کارگس جوڑ کنگ ءِ وش اتک کنان ءَ گوشت کہ ہری پور ءَ گوگل ءِ اسمبلی لائن ءِ جوڑ کنگ یک وشیں دیمروئی یے ۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گوشت کہ گوگل میاں اوستمانی آئی ٹی کمپنی آنی نیمگ ءَ پاکستان ءَ کاروبار ءُ سرمایہ کاری ءِ تہ ءَ آسانی ءِ دیمروئی ءِ واستہ حکومت ءِ عزم ءِ سر ءَ دل یکیمی ءِ درشان کنگ ءَ اِنت۔ آئی ٹی پروڈکٹس ءِ لوکل پروڈکشن ءَ چہ پاکستانی الس ءِ واستہ اے پروڈکٹس نہ ایوک ءَ ارزان بنت بلکینگ ءَ وتی ایکسپورٹ انڈسٹری ءَ را دیمروئی دیگ ءَ چہ زرّ ءِ کمائی ءَ ھم گیش کنت۔ آئی ءَ گوشت کہ اولی روچ ءَ چہ حکومت ءَ پاکستان ءَ را ڈیٹا نیشنل جوڑ کنگ ءَ اولی ترجی داتگ۔ حکومت آئی ٹی ءِ شوبگ ءَ ورنا آناں بااختیار جوڑ کنگ ءِ واستہ ھمک رنگ ءِ گامگیج کنگ ءَ اِنت۔ گوگل ءِ گوما پاکستانی ورنا آناں آئی ٹی ءِ تہ ءَ تربیت دیگ ءِ مفاہمت اے زنجیر ءِ یک لنکک اِنت۔ آئی ءَ گوشت کہ وفاقی حکومت یک لکھ ازمکاریں  ورنا آناں لیپ ٹاپ پجاری کنگ ءَ انت ءُ آئی ٹی شوبگ ءَ آوانی دیمروئی ءِ واستہ وسیلگ پجاری کنگ ءَ انت۔ آئی ٹی ءِ شوبگ ءَ سرجمیں ملک ءَ زالبول آنی ھوار ورنا آنی واستہ تربیتی پروگرام برجم دارگ بوھگ ءَ انت۔ مزن وزیر ءَ گوشت کہ تربیتی پروگرام آنی وسیلگ ءَ میاں اوستمانی سروس انڈسٹری ءَ ورنا آنی مقابلہ ءِ توان گیش بوھگ ءَ انت ءُ ورنا شرپ مندیں روزگار ءِ تہ ءَ وت واجہ بوھگ ءَ انت۔ پاکستان ءَ را خطہ ءِ انفارمیشن ٹیکنالوجی ءِ مرکز جوڑ کنگ ءِ واستہ گیشیں گامگیج آنی سر ءَ کار کنگ بوھگ ءَ اِنت۔ آئی ءَ ملک ءَ آئی ٹی ءِ شوبگ ءِ دیمروئی ءِ واستہ انفارمیشن ٹیکنالوجی ءِ وفاقی وزیر ءُ آئی ءِ ٹیم ءِ کوشست آناں ساڑات۔