وزیراعظم شہباز شریف تون ایرانی پارلیمنٹ نا اسپیکر ڈاکٹر محمد باقر قالیباف نا ڈل اتون اوڑدہی

اسلام آباد۔ 07 نومبر (اے پی پی) وزیراعظم محمد شہباز شریف ایران تون ہڑتوم آ کنڈآتا واپار تون اوار چندی بشخ آتیٹی کمکاری ءِ ودفنگ نا است خواہی نا درشانی ءِ کرسا پارینے کہ ہڑتوم آ ملک آک جہانی امن، شونہالی و علاقائی کمکاری آ یقین و مسلم امہ نا سیوت و اسٹی کن اسیجائی عزم تخرہ۔ وزیراعظم محمد شہبا ز شریف تون ایرانی پارلیمنٹ نا اسپیکر ڈاکٹر محمد باقر قالیباف ڈل اتون اوار جمعہ نادے آ داڑے اوڑدہی کرے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف ایران تون برادرانہ تین پہ تینی تعلقداری نا ذکر ءِ کرسا ایرانی پارلیمنٹ نا اسپیکر و ڈل ءِ بخیرکرے۔ وزیراعظم ویل آتیکن گپ وتران و سفارتکاری کون آ پرامن وڑوڈول آتیا ہڑتوم آملک آتا بدل مفروک عزم انا درشانی ءِ کرے۔ وزیراعظم ایران نا سپریم لیڈر آیت اللہ علی خامنہ ای و صدر مسعود پزشکیان کن عزت و تکریم و خیرخواہی نا کلہو آتے تس۔ وزیراعظم پارے کہ ہڑتوم آملک آک ریاستی دہشت گردی و وتواجہ ملک آتا برخلاف بلااشتعال جلہو آتا ترندی اٹ مذمت ءِ کیرہ، پاکستان و ایران بدبختی اٹ دہشت گردی نا گواچی مسنو، ہڑتوم آملک آک مچ آدنیا کن امن و شونہالی و علاقائی کمکاری نا علمبردار ءُ۔ وزیراعظم پارے کہ پاکستان وایران مسلم امہ نا سیوت و اسٹی کن اسیجائی عزم تخرہ۔ وزیراعظم پارے کہ پاکستان ایران تون تین پہ تینی مفاد نا چندی بشخ خاص کر زرگزرانی کمکاری و ہڑتوم آ کنڈآتا واپار ءِ ودفنگ نا خواہندار ءِ۔ اسپیکر ایرانی پارلیمنٹ وزیراعظم، حکومت و پاکستان نا الس نا ساڑی آ ایران اسرائیل جنگ اٹی پبی کمکاری و مخ تفی آ منت واری نا درشانی ءِ کرے۔ اوپارے کہ ایران اسرائیل جنگ اٹی پاکستان نا مخ تفی نا ایرانی الس نا بھاز ستاءِ کیک، پاکستان و ایران دنیا نا امن و مسلم امہ نا سیوت آ یخین تخک۔ اوپاکستان تون چندی بشخ بشمول زرگزران و واپار اٹی کمکاری ءِ پین ودفنگ نا ایرانی عزم انا درشانی ءِ کرے۔ ایرانی اسپیکر ایران نا صدر مسعود پزشکیان نا کنڈآن وزیراعظم و پاکستانی الس کن جوزہ خیرخواہی نا ہم درشانی ءِ کرے۔ اوپاکستان اٹی دورہ ٹی مہمانداری آ ہم خاص منت واری ءِ ہرفے۔ اسپیکر قومی اسمبلی سردار ایاز صادق و وزیراعظم نا خصوصی خارجہ امور سید طارق فاطمی ئسک ہم اوڑدہی ٹی ساڑی ئسر۔