وزیراعظم شہباز شریف ’’وکٹری ڈے‘‘ انا دود آتیٹی بشخ ہلنگ کن آذربائیجان نا دورہ ءِ کیک، دفترخارجہ

اسلام آباد۔ 07 نومبر (اے پی پی) وزیراعظم محمد شہباز شریف جمہوریہ آذربائیجان نا صدر الہام علیوف نا سلہ غا باکو ٹی ’’وکٹری ڈے‘‘ انا پنچ می سال دے انا وخت آ اڈ ہلوک دود آتیٹی بشخ ہلنگ کن آذربائیجان نا سرکاری دورہ ءِ کیک۔ ترجمان دفترخارجہ نا کنڈآن جمعہ نادے آ جاری بیان نا رداٹ دورہ ٹی وزیراعظم شہباز شریف ’’وکٹری ڈے ‘‘ انا سرکاری دود آتیٹی بشخ ہلیک و صدر الہام علیوف تون اوڑدہی کیک۔ گپ وتران اٹی ہڑتوم آ کنڈآتا تعلقداری نا غٹ پلو آتا جاچ ءِ ہلنگک وخت اس کہ واپار و زرکاری ، توانائی، دفاع، تعلیم و علاقائی رابطہ غاتون اوار متنوع بشخ آتیٹی کمکاری ءِ پین ودفنگ کن پوسکن آ کسر تا پیدواری آ چکار کننگک۔ پاکستان و آذربائیجان نا نیام اٹ متکن آ برادرانہ تعلقداری ءِ ہرافتا ماسک اسیجائی عقیدہ ، تاریخ، دودوربیدہ و تین پہ تینی پت اٹی پیوند ءُ۔ ہڑتوم آملک آتا علاقائی و جہانی فورم بشمول اسلامی کمکارتنظیم  ، اقتصادی کمکار تنظیم و اقوام متحدہ ٹی ہم خڑکی کمکاری برقرار ءِ۔ بیان نا رداٹ وزیراعظم نا دورہ آذربائیجان نا وتواجہی و علاقائی سالمیت کن پاکستان نا ثابت قدم مخ تفی و ہڑتوم آایلم ملک آتا نیام اٹ سٹریٹجک شریداری ءِ پین مون آ دننگ نا عزم انا درشانی ءِ کیک۔