دہشت گرد آتے ہچ ءُ حالیت اسے ٹی بلوچستان نا امن ءِ لتاڑنگ نا موکل تننگپک، وزیراعلیٰ بلوچستان میر سرفراز بگٹی

کوئٹہ۔ 03 ستمبر (اے پی پی) وزیراعلیٰ بلوچستان میر سرفراز بگٹی نا کماشی ٹی امن وایمنی نا بابت بڑزکو کہول انا دیوان چارشنبے نادے آ داڑے چیف منسٹرسیکرٹریٹ اٹی اڈ ہلک ہراٹی ایڈیشنل چیف سیکرٹری داخلہ حمزہ شفقات و آئی جی پولیس سعید وزیر، شاہوانی اسٹیڈیم اٹی تدوک آنن مروک آ دھماکہ نا بابت سرجمی اٹ حوال تسر ، دیوان آن تران کرسا وزیراعلیٰ بلوچستان پارے کہ بحالی ءِ امن کن کروک آ گام گیج آتے پین گچین کننگے الس نا جون ومال انا رکھ اکن ہچ ءُ ڈیوالئی اسے سگنگ پننگک، اوایڈیشنل چیف سیکرٹری داخلہ ءِ پارت کرے کہ تدوک آ نن پیش بروک آ واقعہ نا بابت الس ومیڈیا ءِ حکومتی گام گیج و راستی تیان معلومدار کننگے تانکہ ہوکاتا حوصلہ شکنی مرے و راستی تیا تالان حالیت الس نا مون آ برے، وزیراعلیٰ بلوچستان پارے کہ شاہوانی اسٹیڈیم دھماکہ نا زموار دہشت گرد آتے منطقی انجام اسکان سرکننگک و اوفتے ہر حال اٹ عدالت نا مون آ اتنگک ، اوداہیت آزور شاغا کہ دہشت گرد آتے ہچ ءُ حالیت اسے ٹی بلوچستان نا امن ءِ لتاڑنگ نا موکل تننگپک وزیراعلیٰ پارے کہ سانحہ نا شہید آتا خاہوت آتے تنیا اِلنگ پننگک و حکومت اوفتے تون سلوک ءِ ٹھپی تے گچین درمان نا آسراتی فراوان کننگ انگ ءِ اوپرمان کرے کہ بھاز ٹھپی تے ضرورت تمنگ آ حکومت بلوچستان نا فضائی سروسز نا کمک اٹ کراچی آ گدریفنگے تانکہ اوفتے پین گچین درمان فراوان مننگ کے، دیوان اٹی وزیراعلیٰ پارے کہ ساڑی آ تھریٹس الرٹ نا رداٹ سیاسی جماعت و الس ءِ حکومت و سیکورٹی ادارہ غاتون پبی کمک کروئی مریک ، دا وخت سیوت و یکجہتی نا ءِ تانکہ شرپسند زموار آک تینا ناپاک عزم اٹ بے سہب مریر ، وزیراعلیٰ بلوچستان 12 ربیع الاول نا پروگرام تیکن فول پروف سیکورٹی پلان اس جوڑ کننگ نا پارت کرسا پارے کہ الس جلوس و مچی تیٹی حکومت و ادارہ غاتون پورو کمک کیر تانکہ مذہبی مچی ءِ پرامن  وگچین وڑاٹ پک کننگ مرے ، دیوان اٹی چیف سیکرٹری بلوچستان شکیل قادر خان، ایڈیشنل چیف سیکرٹری داخلہ حمزہ شفقات، قائم مقام آئی جی پولیس بلوچستان سعید وزیر، پرنسپل سیکرٹری بابرخان، کمشنر کوئٹہ ڈویژن شاہ زیب کاکڑ، ڈی جی لیویز عبدالغفار مگسی تون اوار تعلقدار کمامدارآک بشخ ہلکر۔