چیئرمین و ڈپٹی چیئرمین سینیٹ نا کوئٹہ ٹی بی این پی نا جلسہ غا خودکش جلہو اٹی جونی و مالی نسخان تیا است ہسونی نا درشان

اسلام آباد۔ 03 ستمبر (اے پی پی) چیئرمین سینیٹ سید یوسف رضاگیلانی کوئٹہ ٹی بلوچستان نیشنل پارٹی (بی این پی) نا جلسہ غا مروک آ خودکش جلہو نا ترندی اٹ مذمت ءِ کرسا نہادی انسانی جون تا زیان آ ڈکھیائی و غم انا درشانی ءِ کرینے۔ چارشنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ قوم یکجہتی و سیاسی سرجزآتیٹی دہشت گردی نا کارروائی تیٹی بے گناہ شاری تا جون ہِننگ بھاز افسوزناک و سگ انا قابل اف۔ دا اصل اٹ پاکستان اٹ سیاسی و جمہوری رواداری آ جلہو ءِ ولے دہشت گرد آک تینا ناپاک عزم اٹی سرسہب مفسہ۔ چیئرمین سینیٹ پارے کہ 2 و 3 ستمبر 2025 ء نا نیامی نن مروک آ دا خودکش جلہو اٹی بی این پی نا کارندہ غاتون اوار چندی شاریک زوال و کیہیک ٹھپی مسنو ہرا مچ آ قوم اکن دلی صدمہ نا سوب ءِ ۔ اوخاہوت آتون ہمدردی و ہڑزخواہی نا درشانی ءِ کرسا ایماندار آتا درجہ غاتا بڑزی و ٹھپی تا زوت جان جوڑی کن دعاکرے۔ چیئرمین سینیٹ دااست ہسون سانحہ ٹی مسکوہی وزیراعلیٰ بلوچستان و بی این پی نا سروک سردار اخترمینگل نا قافلہ ءِ ہم شست کننگ آ اوڑتون ہمدردی و ہڑزخواہی نا درشانی ءِ کرے و پارے کہ او ڈکھیائی نا داساہت اٹی سردار اخترمینگل و اونا رفیق آتون سلوک اُن۔ اوٹھپی تے دمدستی و گچین طبی آسودہی فراوان کننگ نا پارت کرے و پارے کہ بنجائی و صوبائی حکومت آک کانود نافذ کروک آ ادارہ غاتا کمک اٹ واقعہ نا شفاف، جوان، ووخت آ جاست وپاست ءِ پک کیر تانکہ زموار آتے عدالت نا مون آ اتنگ مرے۔ چیئرمین سینیٹ الس آن خواست کرے کہ دا است ہسون سانحہ ءِ سیاسی فائدہ یا نسخان تا ذریعہ جوڑ مننگ کن اِلیپس بلکن ملکی سلامتی و کانود نا حکمرانی کن سیوت و یکجہتی نا درشانیءِ کیر۔ ڈپٹی چیئرمین سینیٹ ، سیدال خان ہم دا است ہسون سانحہ غا ڈکھیائی و است ہسونی نا درشانی ءِ کرسا پارے کہ مشکل نا داساہت اٹی او زہمی خاہوت و سردار اخترمینگل نا ڈکھیائی ٹی بریبرنا شریک ءِ ۔ اوایماندار کن بخشش نا دعا و ٹھپی تا زوت دراخ جوڑی کن دعاکرے۔