حضور پاک صلی اللہ علیہ و آلہ وسلم نا تعلیمات آتا پیروی اٹ نن ہر پڑاٹی سرسہبی دوئی کننگ کینہ، سید یوسف رضاگیلانی

ملتان۔ 02 ستمبر (اے پی پی) چیئرمین سینیٹ سید یوسف رضاگیلانی پارینے کہ تعلیم و تبلیغ ننا خواجہ حضرت محمد صلی اللہ علیہ و آلہ وسلم نا سنت ءِ، اونا رغاموک آتیان ہی مچ آ کائنات علم وامن نا گہوارہ جوڑ مس، اینو ہم نن اگہ خوانہ کہ دنیا ٹی انقلاب برپاکننگے تو تعلیم نا مون آ دننگ کن کاریم کروئی مریک۔ داخیال آتا درشانی ءِ او ملتان اٹی اڈ ہلوک سیرت النبی (ص) کانفرنس نا وخت آ کرے۔ سجادہ نشیں دربار موسیٰ پاک شہید سید ابوالحسن گیلانی، سینئر سیاستدان مخدوم جاوید ہاشمی، صدر انجمن اسلامیہ سید عمران حسن گیلانی، سید غلام یزدانی گیلانی، عامر حسن گیلانی، احمد مجتبیٰ گیلانی، جاوید اخترانصاری، عبدالوحید ارائیں، عبدالغفار ڈوگر، مظہر جاوید، امجد بخاری ، اکمل وینس، تون اوار عالم دین، شرفمند آ شاری و مخلوق نا بھلو کچ اس کانفرنس اٹی بشخ ہلکر۔ سید یوسف رضاگیلانی پارے کہ ننا خاہوت نا بزرگ آک داعلاقہ ٹی تعلیم ءِ تالان کننگ اٹ تاریخی کڑد ادا کریر۔ بھاز انگا تعلیمی درسگاہ مرے، ہرافتے ٹی اسلامیہ ہائی اسکولزحرم گیٹ، دولت گیٹ، شوکت کنڈرگارٹن و کالج آتا بنداو ننا سرکڑدہ غاک تخار۔ ہراڑے اینو خوان وخوانفنگ برجاءِ ۔ چیئرمین سینیٹ مستی پارے کہ ملتان اٹی اسلامیہ ہائی اسکولز و علمدار حسین ڈگری کالج گچین درسگاہ ءُ۔ گیلانی لاکالج ءِ دا شرف دوئی ءِ کہ ہموڑے 10 پی ایچ ڈی اسکالرز تعلیم تننگ ءُ و ہموڑے پی ایچ ڈی و ایل ایل ایم کرفنگ انگ ءِ۔ ننا خاہوت مخلوق نا دین نا خذمت ءِ کریر۔ سید یوسف رضاگیلانی پارے کہ خواجہ حضور پاک صلی اللہ علیہ و آلہ وسلم نا رغاموک آتا پیروی اٹ نن ہرپڑاٹی سرسہبی دوئی کننگ کینہ۔