کراچی- یکم ستمبر (اے پی پی) :
سندھ مدرسہ الاسلام یونیورسٹی ءِ 141می بُن ھشت ءِ روچ دارگ بوت۔ سندھ یونیورسٹیانی پرو چانسلر/صوبائی وانگ ءُ زانگ ءِ وزیر سید سردار علی شاہ ءَ گشتگ کہ سندھ مدرسہ الاسلام برطانوی حاکماں جوڑ نا کتگ بلکیں سندھ ءِ دمگی مردماں جوڑ کتگ۔ آئی ءَ گوشت کہ ما ھما بامرد آنی پجار ءَ بہ کن ایں کہ آیاں نوآبادیاتی دور ءَ نوکیں وانگ ءُ زانگ ءِ ادارگ جوڑ کتگ اَنت چوشکہ حسن علی آفندی ءَ ایس ایم آئی ءِ جوڑ کتگ، ڈاکٹر نور محمد لاکھیر نور محمد اسکول حیدرآباد ءِ بُن ھشت ایر کنوک اِنت، میر غلام محمد تالپور اسکول ءِ بُن ھشت ایر کنوک شندوبہ دی ایچ اِنت۔ نوشیروفیروز ءِ جوڑیشتکار الہندو شاہ انت، سندھ مدرسہ الاسلام ءِ 141می بُن ھشت ءِ روچ ءِ مراگش ءَ گوں تران کنان ءَ سید سردار علی شاہ ءَ گوشت کہ خان بہادر حسن علی آفندی سردار یا جاگیردار نہ بوتگ بلکیں آئی ءَ کراچی ءَ یک نوکیں وانگ ءُ زانگ ءِ ادارگ ءِ جوڑ کتگ کہ چہ ایشی ءَ قائداعظم محمد علی جناح، سر شاہنواز بھٹو، سر عبداللہ ہارون، ڈاکٹر عمر بن محمد داؤدپوتا ءُ دگہ بازیں مردماں وتی بنداتی وانگ ءُ زانگ زرتگ۔ آئی ءَ گوشت کہ مرچی آئی ءَ را ایس ایم آئی ءِ بُن ھشت ءِ روچ ءِ مراگش ءَ بھر زوری کنگ ءَ چہ وشی ءُُ فخر اِنت کہ نوں یونیورسٹی ءِ بستار ءَ کار کنگ ءَ اِنت۔ یونیورسٹی آنی بابت ءَ گپ ءُُ تران کنان ءَ سندھ یونیورسٹی آنی پرو چانسلر سید سردار علی شاہ ءَ گوشت کہ صوبگ ءِ 68 یونیورسٹی آنی تہ ءَ چہ 30 یونیورسٹی سرکاری پڑ ءَ کار کنگ ءَ اَنت پمیشکا چہ آھاں ارزشتی ایں پٹ ءُُ پولی کار ءِ اُمیت اِنت۔ آئی ءَ گوشت کہ وھدے یک زرعی یونیورسٹی ءِ یک فصل ءِ نوکیں بُن ءِ ایجاد کنت ءُُ یک میڈیکل یونیورسٹی ءِ نوکیں ویکسین جوڑ کنت گڈا آھانی کار ءَ را دگنیا ءَ را پیش دارگ ءِ وس ءُُ واک بیت۔ صوبائی وزیر ءَ گیش کت کہ ایس ایم آئی یونیورسٹی نوکیں یونیورسٹی اِنت بلے کوالٹی ءِ وانگ ءُ زانگ ءِ تہ ءَ آئی ءِ کرد دلگوش کرز اِیت۔ آئی ءَ گوشت کہ یونیورسٹی آناں کوھنیں نصاب وانینگ مہ بیت بلکینگ ءَ ایشی ءِ چار ءُُ تپاسی کنگ بہ بیت ءُُ سائنس ءِ شوبگ ءَ نوکیں دیمروئی آناں ھوار کنان ءَ نوکیں نصاب جوڑ کنگ بہ بیت۔ آئی ءَ اے ھم گوشت کہ سندھ سرکار ءِ وانگ ءُ زانگ ءُ وانندگی ءِ محکمہ ھم اسکول ءُ کالج آنی واستہ نوکیں نصاب ءِ سر ءَ کار کنگ ءَ اِنت ءُ مرچیگیں راستی آنی رد ءَ تیار کنگ ءَ اِنت۔
صوبائی وانگ ءُ زانگ ءِ وزیر ءَ گوشت کہ سندھ حکومت سندھ مدرسہ الاسلام یونیورسٹی ءِ دیمروئی ءِ واستہ ھمک رنگ ءِ کمک ءَ کنت۔ آئی ءَ ایس ایم آئی یو ءِ وائس چانسلر، فیکلٹی، افسر ءُ نودربر آناں بُن ھشت ءِ روچ ءِ مراگش ءَ مبارکی دات۔ وتی گشتانک ءِ تہ ءَ ایس ایم آئی یو ءِ وائس چانسلر ڈاکٹر مجیب سہرائی ءَ گوشت کہ سندھ مدرسہ الاسلام ءِ بن ھشت ایر کنوک خان بہادر حسن علی آفندی مئے ھیرو اِنت۔ آئی ءَ انگریز ءِ ھاکمی ءِ دور ءَ سکیں گرانیں جاوراں ادا سندھ مدرسہ الاسلام ءِ بُن ھشت ایر کتگ۔ آئی ءَ گوشت کہ خان بہادر حسن علی آفندی ءِ سیادی چہ میاں اوستمانی ٹک ءَ بوتگ آئی ءَ 55سال ءِ عمر ءَ ایس ایم آئی ءِ بُن ھشت ایر کتگ، ایشی ءِ مول ءُ مراد مسلمانیں زھگ آناں نوکیں وانگ ءُ زانگ ءِ پھجارینگ اِنت۔ آئی ءَ گوشت کہ اے موہ ئَ مارا آئی ءَ را ندر بکنت۔ خان بہادر حسن علی افندی ءِ بائیوگرافی ءِ حوالہ ءَ ڈاکٹر سہرائی ءَ گوشت کہ ایس ایم آئی یو ءَ خان بہادر حسن علی افندی ءِ زند، کوشست ءُ ھزمتانی سر ءَ مرزا قلیج بیگ ءِ کتاب ءِ انگریزی رجانک چاپ کتگ کہ اے کار ءَ را یونیورسٹی ءِ اسسٹنٹ پروفیسر سندھ مدرسہ الاسلام ءَ جوانیں رنگے ءَ کتگ۔ آئی ءَ وفا منصور برڑو ءَ جوانیں رجانک ءِ سرا مبارکی دات۔ آئی ءَ جار جت کہ حسن علی آفندی چیئر ھم جوڑ کنگ بیت۔ اے درگت ءَ آئی ءَ وزیر سید سردار علی شاہ ءَ چہ کمک لوٹ اتگ۔ آئی ءَ سر وزیر سندھ سید مراد علی شاہ ءُ سید سردار علی شاہ ءِ شگر گپت کہ آہاں ایس ایم آئی یو ماڈل اسکول ءَ را جتاھیں بجٹ داتگ۔ ایس ایم آئی یونیورسٹی ءِ بابت ءَ گپ جنان ءَ ڈاکٹر مجیب سہرائی ءَ گوشت کہ پنچ سال پیسر وھدے من ایس ایم آئی یو ءَ ھوار بوتگ آں گڑا آئی ءَ نودربر آنی آبادی ءَ را گیش کنگ، پٹ ءُ پولی دود ءُ ربیدگ ءَ را مھکم کنگ ءُ ایس ایم آئی یو ءَ را نان ڈیفیسٹ ادارگ جوڑ کنگ ءِ کوشست کتگ ءُ آئی ءَ اے وڑیں مول ءُ مراد سرجم کتگ اَنت۔ نامداریں وانگ ءُ زانگ زانت سید جعفر احمد ءَ گوشت کہ حسن علی آفندی ءِ وڑیں بازیں مردماں راجی جوڑیشت ءِ تہ مزنیں کردے پیلو کتگ۔ آئی ءَ گوشت کہ مارا اے مزنیں شخصیت آناں شرپ ءُ ازت پیش کنگی انت کہ آہاں وتی جوڑ کتگیں وانگ ءُ زانگ ءِ ادارگ آنی وسیلگ ءَ چاگرد ءِ چاگردی ءُُ سیاسی جاور بدل کتگ انت۔ ایس ایم آئی یو ءِ چاگردی ءُ دیمروئی ءِ زانت ءِ شعبہ ءِ چیئرپرسن ڈاکٹر سبھاش بابو ءَ ایس ایم آئی ءِ پیسریگیں نودربر آنی کرد ءِ سر ءَ چمشانک دات کہ آہاں چاگرد ءِ تہ ءَ مزنیں بدلی آورتگ۔ پدا سید سردار علی شاہ ءَ گوں ڈاکٹر مجیب سہرائی، شہناز وزیر علی، اکبر لغاری ءُ دگہ وانگ ءُ زانگ ءِ زانتکاراں حسن علی آفندی ءِ رجانک کتگیں زندنامہ کہ مرزا قلیچ بیگ ءَ نبشتہ کتگ ءُ اسسٹنٹ پروفیسر وفا منصور برڑو ءِ انگریزی رجانک شنگ کتگ۔
اے موہ ءِ سر ءَ وزیر وانگ ءُ زانگ ءَ ایس ایم آئی ءِ پیسریگیں نودربر ءُ وائس چانسلر ءُ ایندگر مہمان آنی گوما شمع ءِ رژنائی ءَ گوں ایس ایم آئی ءِ پیسریگیں نودربر انجمن ءِ جوڑ کنگ ءِ بندات ھم کت۔ سکور آئی بی اے یونیورسٹی ءِ وائس چانسلر ڈاکٹر آصف شیخ ءَ کہ آ ھم ایس ایم آئی ءِ پیسریگیں نودربر اِنت آئی ءَ وتی ھیال ءُ لیکہ آن لائن ءَ درشان کتگ اَنت۔
مراگش ءَ مزنیں کساسے ءَ جتا جتائیں یونیورسٹی آنی وائس چانسلر، اکیڈمک، سرکاری کارندہ، ایس ایم آئی یو ءِ ڈین، اساتذہ ءُُ نودربر آنی بھر زوری بوتگ۔ مہمان آناں سوغات ھم پیش کنگ بوت انت
