وزیراعظم شہباز شریف و ایرانی صدر ڈاکٹر مسعود پزشکیان نا اوڑدہی

تیانجن۔ 01 ستمبر (اے پی پی) وزیراعظم محمد شہباز شریف و ایران نا صدر ڈاکٹر مسعود پزشکیان پاکستان و ایران نا تعلقداری ٹی مثبت پیش رفت آ است جمی نا درشانی ءِ کرسا چندی بشخ آتیٹی ہڑتوم آ کنڈآتا کمکاری ءِ مون آ دننگ نا عزم انا درشانی ءِ کرینو ۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف داڑے شنگھائی کمکار تنظیم (ایس سی او) نا باسک ملک آتا سربراہان نا کونسل نا دیوان نا وخت آ اسلامی جمہوریہ ایران نا صدر مسعود پزشکیان تون اوڑدہی کرے۔ نائب وزیراعظم و وزیرخارجہ اسحاق ڈار، چیف آف آرمی اسٹاف فیلڈ مارشل سید عاصم منیر و بنجائی وزیرآک ہم اوڑدہی ٹی ساڑی ئسر۔ اوڑدہی ٹی وزیراعظم ہمسایہ ملک ایران تون تینا تاریخی و ایلمی تعلقداری کن پاکستان نا عزم انا درشانی ءِ کرے و اسیجائی تاریخ، دودوربیدہ ئی میرات و عقیدہ غا تالان تعلقداری نا سوگو بنداوتے تالان کرے۔ ہڑتوم آ راہشونک چندی بشخ آتیٹی ہڑتوم آ کنڈآتا کمکاری نا حالیت آتا جاچ ءِ ہلکر و پاکستان ایران تعلقداری ٹی مثبت رفتار آ است جمی نا درشانی ءِ کریر۔ صدر مسعود پیز شکیان ایران کن پاکستان نا پدریسہ مخ تفی نا ستاءِ کرے و تین پہ تینی است خواہی نا چندی بشخ آتیٹی ہڑتوم آ کنڈآتا کمکاری ءِ ودفنگ کن ایران نا عزم انا درشانی ءِ کرے۔ وزیراعظم ایرانی صدر نا اگست 2025 اٹی دورہ ءِ پاکستان نا ذکر ءِ کرسا پارے کہ دا دورہ ہڑتوم آملک آتا درمیانہ تعلقداری ءِ پین گچین و سوگو کننگ اٹ کمکار پک مس۔ اوپارے کہ ایران نا صدر نا ساڑی آ دورہ غا پاکستان نا الس بھاز خوش ئس۔ وزیراعظم ہڑتوم آ سنگت ملک آتا نیام اٹ سیاسی و اقتصادی تعلقداری ءِ پین سوگو کننگ نا اہمیت آ زور شاغا۔ اوایران نا الس و حکومت تون پاکستان نا بدل مفروک یکجہتی نا ہم درشانی ءِ کرے و علاقائی امن کن پاکستان نا عزم انا درشانی ءِ کرے و مذاکرات و سفارت کاری ءِ تناؤ ٹی کمتی و سوگوی نا کنڈآ اسٹ انگا عمل نا قابل کسر گوندا۔ ایران نا صدر پاکستان نا چندی علاقہ غاتیٹی برجانوکاپی حالیت آتیٹی نہادی جون تا نسخان و مالی نسخان تیا است ہسونی نا درشانی ءِ کرسا پارے کہ مشکل نا داساہت اٹی ایرانی حکومت و الس پاکستان تون تفوک ءُ۔