تیانجن۔1ستمبر (اے پی پی): مزن وزیر محمد شہباز شریف ءُ ایران ءِ صدر ڈاکٹر مسعود پزشکیان ءَ پاکستان ءُ ایران ءِ سیادی آنی تہ ءَ جوانیں پیشرفت ءِ سر ءَ دل یکیمی ءِ درشان کت ءُ جتا جتائیں شوبگ آنی تہ ءَ وت مہ وتی کمک ءَ را دیمروئی دیگ ءِ واستہ وتی جزم ءِ پد ءَ ھم زور پر دات۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءَ گوشت کہ شنگھائی کمکی گل ءِ سروک آنی کونسل ءِ دیوان ءِ ساھت ءَ مزن وزیر محمد شہباز شریف ءَ اسلامی جمہوریہ ایران ءِ صدر مسعود پزشکیان ءَ گوں گند ءُ نند کت۔ گند ءُ نند ءَ نائب مزن وزیر ءُ درئی کارانی وزیر اسحاق ڈار، چیف آف آرمی اسٹاف فیلڈ مارشل سید عاصم منیر ءُ وفاقی وزیر ھم ساڑی اتنت۔ گند ءُ نند ءِ ساھت ءَ مزن وزیر ءَ ھمساھگیں ایران ءِ گوما وتی روایتی ءُ براتی سیادی ءِ سر ءَ پاکستان ءِ گہتریں جزم ءِ سر ءَ زور پر دات ءُ یکجائی راجدپتر، دود ءُ ربیدگی میراس ءُ دوئیں سروکاں جتا جتائیں پڑ آنی تہ ءَ دو نیمگی کمک ءِ جاور ھال آنی سر ءَ چار ءُ تپاسی کت ءُ پاکستان ءُ ایران ءِ تہ ءَ جوانیں رپک ءِ سر ءَ دل یکیمی ءِ درشان کت۔ صدر مسعود پزشکیان ءَ ایران ءِ واستہ پاکستان ءِ برجاھیں کمک ءِ توسیپ کت ءُ وت مہ وتی مفاد ءِ جتا جتائیں شوبگ آنی تہ ءَ دو نیمگی کمک ءَ را گیش کنگ ءِ واستہ ایران ءِ جزم ءِ سر ءَ زور پر دات۔ مزن وزیر ءَ اگست 2025ءَ ایران ءِ صدر ءِ پاکستان ءِ تر ءُ تاب ءِ ذکر کنان ءَ گوشت کہ اے تر ءُ تاب دوئیں ملک آنی نیام ءَ دو نیمگی سیادی آناں گیش گہتری ءُ مھکم کنگ ءَ کمکی ثابت بوت۔ گوستگیں روچاں ایران ءِ صدر ءِ تر ءُ تاب ءَ چہ پاکستان ءِ الس سک باز وش انت ۔ مزن وزیر ءَ دوئیں دوستیں ملک آنی نیام ءَ سفارتی ءُ اقتصادی سیادی آناں گیش مھکم کنگ ءِ ارزشت ءِ سر ءَ زور پر دات۔ آئی ءَ ایران ءِ الس ءُ حکومت ءِ گوما پاکستان ءِ بے دروریں یکوئی ءُ دمگی امن ءِ واستہ پاکستان ءِ جزم ءِ ھم پدر کت ءُ گپ ءُ تران ءُ سفارتکاری ءَ را ڈی اسکالیشن ءُ استحکام ءِ نیمگ ءَ یکیں زندگ داروکیں راہ لیک ات۔ ایران ءِ صدر ءَ پاکستان ءِ جتا جتائیں دمگاں برجاھیں فرقہ وارانہ جاور ھال آنی سبب ءَ جانی تاوان ءُ مالی تاوان ءِ سر ءَ سک باز اپسوز ءِ درشانی کت ءُ گوشت کہ اے مشکل ءِ ساھت ءَ ایران ءِ حکومت ءُ پاکستان ءِ اُلس ءِ ھمراھی ءَ اوشتاتگ آں ۔
