تیانجن ۔31اگست (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ آدینگ ءِ روچ ءَ تیانجن ءَ لوبان ٹیکنیکل ءُ پیشہ وارانہ وانگ ءُ زانگ ءِ نمائش ہال ءِ تر ءُ تاب کت ایشی ءِ تہ ءَ آئی ءَ را لوبان ورکشاپ آنی کار ءُ پاکستان ءِ گوما برجاھیں کمک ءِ بابت ءَ سرپدی دیگ بوت۔ نائب مزن وزیر ءُ وزیر ءِ درئی کار ءَ چینی میزبان آنی گوما لوبان فریم ورک ءِ چیر دستی ءَ ھاسیں رنگ ءَ نوکیں ءُ نوکیں صنعت آنی تہ ءَ کمک ءَ را گیش گہتر کنگ ءِ ضلورت ءِ سر ءَ تران کت ءُ تکنیکی ءُ پیشہ وارانہ وانگ ءُ زانگ ءِ تہ ءَ یکجائی کوشست آناں گیش کنگ ءِ سر ءَ زور پر دات۔ آئی ءَ اے گپ ءِ سر ءَ زور پر دات کہ پاکستان ءُ چین ءِ نیام ءَ ٹی وی ای ٹی کمک ءَ را مھکم کنگ پائیدار اقتصادی دیمروئی ءِ واستہ موہ پیداک کنگ ءِ نیمگ ءَ یک ھاسیں گامگیج اِنت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ اے کمکی ءَ چہ نہ ایوک ءَ پاکستان ءِ انسانی وسیلگ گہتر بنت بلکینگ ءَ دوئیں ملک آنی نیام ءَ اقتصادی شریکداری ءَ را گیش ءُ گیوار کنت۔ تر ءُ تاب ءِ وھد ءَ نائب مزن وزیر ءَ پاکستانی نودربراں گوں ھم گند ءُ نند کتگ کہ آ لوبان انیشیٹیو ءِ چیر دستی ءَ تربیت کنگ ءَ اَنت۔ آئی ءَ گوں آھاں وتی وانگ ءُ زانگ ءِ تجربگ ءُ آیوکیں وھد ءِ بابت ءَ گپ ءُ تران کت ءُ اے گپ ءِ سر ءَ زور پر دات کہ پاکستان ءِ ورنا نسل ءَ را نوکیں تکنیکی مہارت آنی گوما لیس کنگ بدل بوھوکیں صنعتی لوٹ آناں پیلو کنگ ءِ واستہ وھد ءِ لوٹ اِنت۔ لوبان ورکشاپ ، تیانجن میونسپل اتھارٹیز ءِ نیمگ ءَ جوڑ کنگ بوتگ ، سرجمیں دنیا ءَ ہائی کوالٹی ءِ تکنیکی وانگ ءُ زانگ ءِ دیمروئی ءِ ھاتر ءَ یک جھان ءِ ماڈل جوڑ بوتگ ۔ 2016 ءَ چہ 30 ءَ چہ گیش ملک آنی تہ ءَ 36 ورکشاپ جوڑ کنگ بوتگ اَنت کہ ایشی ءِ تہ ءَ مہارت آنی دیم دیگ، تکنیکی تبادلہ ءُ مردم آنی نیام ءَ رابطہ ءِ دیمروئی کنگ بوتگ۔ پاکستان ءِ تہ لوبان ورکشاپ 2018 ءَ لاہور ءَ جوڑ کنگ بوتگ ءُ مکینیکل انجینئرنگ، آٹومیشن ءُ انفارمیشن ٹیکنالوجی ءِ وڑیں پڑ آنی تہ ءَ تربیت دیگ ءَ اِنت۔ پاکستان ءَ وانگ بوھوکیں نودربراں ابید اے وھد ءَ ھپت پاکستانی نودربر چین ءَ لوبان ءِ وانگ ءَ اَنت۔
