مزن وزیر شہباز شریف چین ءِ سرکاری تر ءُ تاب ءَ تیانجن ءَ سر بوتگ

تیانجن ۔30اگست (اے پی پی): مزن وزیر محمد شہباز شریف چین ءِ سرکاری تر ءُ تاب ءَ تیانجن ءَ سر بوتگ۔ مزن وزیر شنگھائی کوآپریشن آرگنائزیشن ءِ سروکیں دیوان، بیجنگ ءَ چینی راجی جنگ ءِ سوبمندی ءِ 80می سالروچ ءُ ایندگر ھاسیں سرکاری دیوان آنی تہ ءَ بھر زوری کنت۔ مزن وزیر ءِ ھمراہی ءَ پاکستانی ڈل ءِ تہ ءَ نائب مزن وزیر ءُ درئی کارانی وزیر محمد اسحاق ڈار، منصوبگ بندی ءُ دیمروئی ءِ وفاقی وزیر ڈاکٹر احسن اقبال، اھوالکاری ءُ شنگکاری ءِ وزیر عطا اللہ ترار ءُ مزنیں سرکاری کارندہ ھوار اَنت۔ تیانجن بالی پٹ ءَ مزن وزیر ءَ را چین ءِ کسٹم ءِ جنرل ایڈمنسٹریشن ءِ سی پی سی کمیٹی ءِ وزیر ءُ سیکرٹری سن میجون، تیانجن میونسپل پیپلز کانگریس ءِ قائمہ کمیٹی ءِ چیئرمین ءُ پارٹی سیکرٹری یونلین، پاکستان ءَ چین ءِ سفیر ءُ پاکستان ءِ تہ ءَ چین ءِ سفیر کھادور چین جیانگ زیڈونگ ءَ وش اتک کت۔ مزن وزیر شہباز شریف 31اگست ءَ چہ یکم ستمبر 2025 ءَ تیانجن ءَ برجم دارگ بوھوکیں شنگھائی کمکی گل ءِ کونسل آف ہیڈز آف ایف ایل دیوان ءَ بھر زوری کنت ءُ گشتانک دنت۔ چین ءِ تر ءُ تاب ءِ ساھت ءَ مزن وزیر چین ءِ نامداریں کاروباری مردم آنی گوما گند ءُ نند کنت ءُ 4ستمبر ءَ بیجنگ ءَ پاکستان ءُ چین ءِ دومی بی ٹو بی سرمایہ کاری کانفرنس ءِ ھم سروکی ءَ کنت۔ مزن وزیر شہباز شریف شنگھائی کوآپریشن آرگنائزیشن ءِ دیوان ءِ ساھت ءَ اے دگہ باسکیں ملک آنی سروک آں گوں ھم گند ءُ نند کنت۔