لاہور۔30اگست (اے پی پی): مزن وزیر محمد شہباز شریف چین ءِ سرکاری تر ءُ تاب ءَ تیانجن ءَ شتگ۔ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ چینی صدر شی جن پنگ ءَ مزن وزیر ءَ را چین ءِ تر ءُ تاب ءِ دعوت داتگ۔ آئی ءِ ھمراہی ءَ نائب مزن وزیر ءُ درئی کارانی وزیر محمد اسحاق ڈار، وزیر ءِ ھال ءُ اھوال عطا اللہ تارڑ ءُ مزن وزیر ءِ مشیر طارق فاطمی ھم ھوار انت۔ مزن وزیر وتی تر ءُ تاب ءِ ساھت ءَ شنگھائی کوآپریشن آرگنائزیشن ءِ 25می سروک دیوان ءَ بھر زوری ءُ گشتانک دنت۔ آئی ءَ دمگ ءَ امن ءِ واستہ پاکستان ءِ کوشست آنی ھوالگ ءَ پاکستان ءِ موقف ھم پیش کنت، دمگی رابطہ ءَ را گیش کنگ ءُ دمگ ءِ الس آنی دیمروئی ءَ را دیم ءَ برگ ءِ واستہ پاکستان ءِ کوشست آناں ھم پیش کنت۔ محمد شہباز شریف دمگ ءِ ملک آنی سر ءَ موسمی بدلی ءِ زیانکاریں اثرات ءِ نوکیں چیلنج آنی سر ءَ رژنائی ءِ شنگ کنت ایشی ءِ تہ ءَ قدرتی آفت آنی گیش بوھوکیں کساس ھوار اِنت۔ مزن وزیر سروک دیوان ءَ بہر زوروکیں جھان ءِ سروک آنی گوما ھم گند ءُ نند کنت ۔ ایشی ءَ چہ پد مزن وزیر چین ءِ بنجاھی شہر بیجنگ ءِ تر ءُ تاب ءَ کنت اودا آ صدر شی جن پنگ ءِ ھاسیں دعوت ءِ رد ءَ چین ءِ کمیونسٹ پارٹی ءِ ھلاپ ءَ چین ءِ راجی مزاحمتی جنگ ءِ سوبمندی ءِ 80 سالی مراگش ءَ بھر زوری کنت۔ مزن وزیر چین ءِ صدر شی جن پنگ ءُ مزن وزیر لی کی کیانگ ءِ گوما ھم دو نیمگی گند ءُ نند کنت۔ مزن وزیر چین ءُ پاکستان ءِ بیپاری سیادی ءَ را دیمروئی دیگ ءُ پاکستان ءَ چینی سرمایہ کاری ءِ تہ ءَ گیشی ءِ واستہ چین ءَ دومی بزنس ٹو بزنس سرمایہ کاری کانفرنس ءِ ھم سروکی ءَ کنت۔ مزن وزیر محمد شہباز شریف چینی کمپنیانی سروکاں گوں گند ءُ نند کنت ءُ آہاں حکومت ءِ سرمایہ کار دوستیں پالیسیانی بابت ءَ سرپدی دنت ءُ آہاں پاکستان ءَ سرمایہ کاری ءِ دعوت دنت۔
