مزن وزیر ءِ ھاسیں کمکار ہارون اختر خان ءَ چینی کمپنی ہواگوان ءِ سی ای او ءَ گوں گند ءُ نند

اسلام آباد۔29اگست (اے پی پی): مزن وزیر ءِ صنعت ءُ تجارت ءِ ھاسیں کمکار ہارون اختر خان ءَ چیک کمپنی ہواگوان ءِ چیف ایگزیکٹو آفیسر ءَ گوں گند ءُ نند کتگ۔ گند ءُ نند ءَ الیکٹرک گاڑی، لتیم بیٹری، روبوٹکس ءُ ڈرون ٹیکنالوجی ءِ شوبگ ءَ وت مہ وتی کمک ءِ موہ آنی ھوالگ ءَ ھیال ءُ لیکہ ءِ درشان کنگ بیت۔ وزارت صنعت ءُ تجارت ءِ رد ءَ مزن وزیر شہباز شریف ءِ وژن ءَ را پدر کنان ءَ ہارون اختر خان ءَ گوشت کہ الیکٹرک گاڑی آیوکیں وھد انت۔ آئی ءَ گوشت کہ چاگرد ءِ رکھینگ ءُ ملک ءِ درآمد ءِ بل ءِ کمی ءِ واستہ الیکٹرک گاڑی آناں زورگ المی اِنت۔ الیکٹرک گاڑی آنی ارزشت ءِ سر ءَ تران کنان ءَ آئی ءَ گوشت کہ ایشی ءِ تہ ءَ توانائی ءِ ذخیرہ کنگ ءِ بے دروریں گنجائش است اِنت ءُ آیوکیں توانائی ءِ منظر نامہ ءَ ھاسیں کرد پیلو کنت۔ ہواگوان کمپنی ءِ سی ای او ءَ گشتگ کہ آئی ءِ کمپنی زرعی مقاصد ءِ ھاتر ءَ الیکٹرک بیٹری ءِ سرا کار کنوکیں ڈرون ہم جوڑ کنگ ءَ انت۔ ہارون اختر خان ءَ اے موہ ءِ سر ءَ گوشت کہ جان سلامتی ، کشت ءُ کشاری ءُ ھمک روچی زندمان ءِ تہ ءَ روبوٹکس ءُ ڈرون آنی کارمردی روچ پہ روچ گیش بوھگ ءَ انت۔ آئی ءَ گیش گوشت کہ سیلاپ ءُ ایندگر قدرتی آفت آنی وھد ءَ ڈرون ریسکیو ءُ ریکوری آپریشن آنی تہ ءَ سک باز کمک ثابت بوت کنت۔ ہارون اختر خان ءَ اے گپ ءِ سر ءَ زور پر دات کہ مزن وزیر شہباز شریف ءِ آیوکیں چین ءِ تر ءُ تاب ءَ چہ دوئیں ملک آنی نیام ءَ سیادی گیش مھکم بنت۔ آئی ءَ گوشت کہ چین ءِ گوما یکجائی منصوبگ ءُ بزنس ٹو بزنس کمک اقتصادی شریکداری ءِ تہ ءَ سنگ میل ءِ رنگ ءَ ثابت بیت۔ گند ءُ نند ءِ گڈسرا آئی ءَ گوشت کہ اے تر ءُ تاب ءَ چہ سرمایہ کاری، کاروباری کمک ءُ نوکیں موہ آنی واستہ دروازگ پچ بنت، ایشی ءَ چہ پاکستان ءِ اقتصادی دیمروئی ءَ ھم کمک رسیت۔