اسرائیل ءَ چہ پسو ءَ رکھوکیں ملک وتی پالیشیانی سر ءَ چار ءُ تپاسی بہ کن اَنت، پاکستانی نمائندہ ءَ سلامتی کونسل ءِ دیوان ءَ گشتانک

اقوام متحدہ۔28اگست (اے پی پی): اقوام متحدہ، پاکستان ءَ گشتگ کہ اسرائیل ءَ را وتی جرم ءِ احتساب ءَ چہ رکھینگ ءُ سلامتی کونسل ءَ را غزہ ءَ امن ءُ ایمنی ءِ بحالی ءِ ھاتر ءَ گامگیج زورگ ءَ چہ رکینوکیں ملک وتی پالیشیانی سرا سنجیدگی ءَ گوں چار ءُ تپاسی بہ کن انت کہ ایشی ءِ آسر ءَ فلسطینیانی ”قتل عام“ بوتگ۔ اقوام متحدہ ءِ تہا پاکستان ءِ دائمی نمائندہ عاصم افتخار احمد ءَ 15باسکی سلامتی کونسل ءَ گوں تران کنان ءَ گشتگ کہ قبضہ گیریں طاقت ءِ حمایت کنوک وتی رویہ ءِ سرا ھیال ءُ لیکہ بہ کن انت ءُ وتی پالیسیانی آسراں معروضی رنگ ءَ چار ءُ تپاسی بہ کن انت۔ اگاں اے شریکداری نہ اِنت گڑا چے اِنت؟ حقیقت ایش انت کہ اسرائیل ءِ وتی جرمانی سزا ءَ چہ استثنیٰ آئی ءِ سپر جوڑ بوتگ ءُ اے کونسل ءِ بے تواری آئی ءِ حمایت انت۔ آئی ءَ گوشت کہ سلامتی کونسل نوں تماشائی ءِ بستار ءَ نشت نہ کنت، کونسل ءَ نوں وتی ذمہ واری پیلو کنگی انت ءُ جزم ءَ گوں گامگیج زورگ لوٹ ایت تانکہ میاں اوستمانی امن ءُ ایمنی بحال بہ بیت۔ سفیر عاصم افتخار ءَ تنظیم اسلامی تعاون ءِ نوکیں منظور بوتگیں قرارداد ءِ حوالہ داتگ کہ ایشی ءِ تہا سلامتی کونسل ءَ را باب ہفتمی ءِ رد ءَ اسرائیل ءِ زوراکی ءُ قبضہ گیریں فورسز ءِ خلاف ورزی ءِ بند کنگ ءِ ھاتر ءَ گامگیج زورگ ءِ لوٹ کنگ بوتگ۔ آئی ءَ گوشت کہ غزہ ءَ تاں انوگ ءَ 62 ھزار ءَ چہ گیش لس مردم بیران بوتگ کہ ایشانی تہ ءَ گیشتریں مردم زالبول ءُ زھگ اَنت۔ اے گپ ءِ جواز ءَ کئے دات کنت؟ اے حادثاتی تاوان نہ اِنت بلکیں مزنیں کچے ءَ کشتار اِنت۔ آئی ءَ گوشت کہ بے مٹیں فوجی اُرش برجاہ اَنت پرچا کہ اسرائیلی آنی گمان اِنت کہ آ وتی کار آنی سر ءَ ھچ وڑیں راستیں احتساب ءِ دیم ءَ نہ اَنت۔ مزنیں کساسے ءَ کُشگ، آوار جنگ، قحط، آبادی ءِ ھلاس کنگ ءُ چاگرد ءِ ھلاس کنگ درست یکیں آسر ءَ ھوار بنت ءُ اے نسل کشی ءِ یک منظمیں مہمے کہ ھرکس ءِ چمّانی دیم ءَ پچ بوھگ ءَ اِنت۔ پاکستانی نمائندہ ءَ گوشت کہ اسرائیل ءِ فوجی آپریشن ءُ غزہ شہر ءِ سرجمیں قبضہ کنگ ءِ منصوبگ انگت یک دگہ انسانی سانحہ یے کہ ایشی ءَ چہ گیش لاکھوں مردم بے لوگ بوت کن اَنت۔ گند ءُ نند ءِ بندات ءَ اقوام متحدہ ءِ مزنیں کارندہاں غزہ ءِ تباہ کنوکیں جاور ھال، برجاھیں زوراکی، مغربی کنارہ ءِ آبادی آنی تہ ءَ گیشی ءُ اسرائیل ءِ غزہ ءِ سرجمیں قبضہ ءِ منصوبگ ءِ سر ءَ سک باز جیڈھ ءِ درشانی کتگ۔ اقوام متحدہ ءِ میاں اوستمانی امن عمل ءِ ڈپٹی کوآرڈینیٹر رامز الاکبروف ءَ گشتگ کہ مرچی دنیا گوں ترس ءُ بیم ءَ چارگ ءَ انت کہ مقبوضہ فلسطین ءِ سرزمین ءِ جاور ھال یک نازرکیں کچے ءَ سر بوتگ انت۔ آئی ءَ گیش کرتگ کہ 22 ماہ ءِ جنگ ءِ سبب ءَ بے گناہیں شہری آنی بیرانی گیش بوتگ، مزنیں کچے ءَ آوار جنگ ءُ نوں قحط ءِ سبب بوتگ۔ اقوام متحدہ ءِ انسانی کمک ءِ معاون جوائس ماسویا ءَ کونسل ءَ گوں تران کنان ءَ گشتگ کہ 22اگست ءَ یکجاھیں فوڈ سیکیورٹی ءِ درجہ بندی ءُ فوڈ ریویو کمیٹی ءَ اے گپ ءِ تصدیق کتگ کہ غزہ ءَ قحط ءِ بندات بوتگ۔ آئی ءَ گوشت کہ اے وھد ءَ 5لکھ ءَ چہ گیش مردم گریبی، گریبی ءُ مرگ ءِ ھترہ ءِ آماچ اَنت ءُ لھتیں ھپتگ ءَ پد اے کساس 640ھزار ءَ سر بوت کنت ءُ پنچ سال ءَ کمیں 132ھزار زھگ چہ شدیدیں نادراھی ءَ آماچ اَنت کہ ایشانی تہ ءَ 43ھزار مرگ ءِ ھترہ ءَ اَنت۔ آئی ءَ گیش کرتگ کہ حاملہ ءُ شیر ءِ ورگ ءِ زالبول آنی کساس 55 ہزار ءَ سر بوتگ کہ آ بدترین جاوراں گوں دوچار انت۔ آئی ءَ گوشت کہ اے تباہی زانت ءُ زانت ءَ کنگ بوھگ ءَ اِنت، 22 ماہ ءِ کمک ءِ بندش، میتگ آنی تباہی ءُ یتیم آنی بیرانی اے بحران ءِ مستریں سوب اَنت۔ آب ءُ صفائی ءِ نظام ءِ ھلاس کنگ ءَ ھاسیں روچانی تہا صفائی ءِ ھاتر ءَ زالبول ءُ زھگانی واستہ کابوسی جوڑ کتگ۔ آئی ءَ یات دات کہ میاں اوستمانی کانود ءِ رد ءَ بھوک ءَ را جنگی سلاہ ءِ رنگ ءَ کارمرد کنگ ءِ سرا پابندی انت۔ سفیر عاصم افتخار ءَ وتی تران ءِ تہ ءَ سلامتی کونسل ءَ چہ لوٹ کتگ کہ آ زوتیں، دائمی ءُ بے شرطیں جنگ بندی ءِ جار ءَ بہ جنت، غزہ ءَ انسانی کمک ءِ سر کنگ ءِ سر ءَ سرجمیں بندشاں ھلاس بہ کنت، سرجمیں یرغمال ءُ فلسطینی بندیگ آنی یلہ کنگ ءَ آسراتی بہ دنت، اسرائیل ءِ گروہ بندیں منصوبگ ءَ را رد بہ کنت ءُ مغربی کنارہ ءُ مشرقی بیت المقدس ءَ آبادی ءِ توسیع ءُ الحاق ءِ سرا کار کنگ بوتگ۔ آئی ءَ اے گپ ءِ سر ءَ زور پر دات کہ یک برجاھیں امن ءِ واستہ یک انچیں سیاسی راہ ءِ لوٹ اِنت کہ آ میاں اوستمانی کانود ءِ سر ءَ بنیات بہ بیت ءُ ایشی ءِ آسر ءَ 1967 ءَ پیسر ءِ سیمسر آنی سر ءَ یک آجوئیں ءُ وت واجہیں فلسطینی ریاست ءِ جوڑ کنگ بہ بیت کہ ایشی ءِ دارالحکومت بیت المقدس بہ بیت۔ آئی ءَ اے گپ پدر کت کہ قبضہ ءِ ھلاس کنگ المی اِنت۔ وتی کلوہ ءِ گڈ ءَ سفیر عاصم افتخار ءَ گوشت کہ ھمک ساھت ءَ لاپرواہی ءِ سبب ءَ درد گیش بوھگ ءَ انت، غم گیش بوھگ ءَ انت ءُ میاں اوستمانی کانود ءِ ھلاپ ورزی بوھگ ءَ انت۔ دنیا چارگ ءَ اِنت۔ تاریخ تاخیر ءَ نہ معاف کنت، بے عملی ءَ نہ شموشیت۔ شورا سلامتی وتی منشور ءِ رد ءَ گامگیج زورگ لوٹیت۔