راجی اسمبلی ءِ باسک نواب زادہ جمال خان رئیسانی ءَ پنجاب ءَ زمین چنڈ ءِ سبب ءَ جانی ءُ مال ءِ تاوان ءِ سر ءَ دلپدردی ءِ درشانی کتگ

کوئٹہ۔ 28 اگست (اے پی پی): پاکستان پیپلز پارٹی ءِ باسک راجی اسمبلی نواب زادہ جمال خان رئیسانی ءَ پنجاب ءَ گوستگیں ابر ءُ زمین چنڈ ءِ سبب ءَ جانی ءُ مال ءِ تاوان ءِ سر ءَ دلپدردی ءُ اپسوز ءِ درشانی کتگ ءُ گوشت کہ اے سانحہ مئے دمگ ءَ موسمیاتی بدلی ءِ مزنیں ھترہ آنی ھواریں آسر آنی پدریں ثبوت اِنت۔ پنچ شمبے ءِ روچ ءَ وتی کلوہ ءِ تہ ءَ راجی اسمبلی ءِ باسک نواب زادہ جمال خان رئیسانی ءَ گوشت کہ آماچیں ھاندان آنی غم منی زاتی غم انت ءُ بلوچستان ءِ الس پنجاب ءِ وتی برات ءُ گہار آنی گوما شانہ ماں شانہ ءَ اوشتاتگ انت۔ آئی ءَ ریسکیو ءُ ریلیف ادارگ آنی کوشست آناں ساڑات ءُ گوشت کہ اے گرانیں جاور آنی تہ ءَ ادارگ ہر ممکنیں کرد ءَ پیلو کنگ ءَ اَنت۔ راجی اسمبلی ءِ باسک نواب زادہ جمال خان رئیسانی ءَ ھم الس ءَ چہ اپیل کتگ کہ آ محتاط بہ بنت، ایمنی ءِ گامگیج بہ زور اَنت ءُ ریسکیو ادارگ آنی گوما سرجمی ءَ کمک بہ کن اَنت تانکہ ریلیف آپریشن موثر جوڑ کنگ بہ بنت۔ آئی ءَ دعا کت کہ اللہ تعالیٰ مئے وتن پاکستان ءُ مئے راج ءَ را ھمک ھتر ءُ تاوان ءَ چہ بہ رکھین ایت ۔ آمین